ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ, وسك مۇشەلەرى ءسابيلا مۇستافينا, اسىلبەك سماعۇلوۆ اۋداندار مەن وبلىستىق ماڭىزى بار قالالار اكىمدەرىنىڭ سايلاۋىن ۇيىمداستىرۋ جانە وتكىزۋ ءىس-شارالارى شەڭبەرىندە قوستاناي, اباي, ۇلىتاۋ وبلىستارىنا باردى.
اتالعان وڭىرلەردە اكىمدەردى تىكەلەي سايلاۋ العاش رەت وتپەك. وسك مۇشەلەرىنىڭ وڭىرلەرگە بارۋىنىڭ ماقساتى – سايلاۋ كوميسسيالارىنىڭ مۇشەلەرىن وقىتۋ, ادىستەمەلىك جانە پراكتيكالىق كومەك كورسەتۋ.
قوستاناي وبلىسىنا بارعان وسك توراعاسىنىڭ ورىنباسارى كونستانتين پەتروۆ قارابالىق, فەدوروۆ, التىنسارين, دەنيسوۆ اۋداندارى مەن رۋدنىي قالاسى سايلاۋ ورگاندارىنىڭ سايلاۋعا دايىندىق بارىسىمەن تانىستى. ينسپەكتسيالىق ءىسساپار بارىسىندا ول ۋچاسكەلىك كوميسسيا مۇشەلەرىنە ارنالعان اۋداندىق سايلاۋ كوميسسيالارىنىڭ وقىتۋ سەمينارلارىنىڭ جۇمىسىنا قاتىستى. سونداي-اق ءوڭىردىڭ وبلىستىق, قالالىق جانە اۋداندىق اۋماقتىق سايلاۋ كوميسسيالارىنىڭ مۇشەلەرىمەن كەزدەسۋلەر وتكىزىپ, سايلاۋعا دايىندىقتى ۇيىمداستىرۋ, ۇگىت ناۋقانىنىڭ بارىسى, سايلاۋ كوميسسيالارىنىڭ سايلاۋ ۇردىسىنە قاتىسى بار باسقا دا قاتىسۋشىلارمەن ءوزارا ءىس-قيمىل ءتارتىبى ماسەلەلەردى تالقىلادى.
ورتالىق سايلاۋ كوميسسياسىنىڭ مۇشەسى ءسابيلا مۇستافينا ۇلىتاۋ وبلىسىنا بارىپ, قازىرگى سايلاۋ ناۋقانى شەڭبەرىندە وتەتىن وبلىستىق, ۇلىتاۋ اۋداندىق اۋماقتىق سايلاۋ كوميسسيالارىنىڭ جۇمىس بارىسىمەن تانىستى. اۋدان اكىمدەرىنىڭ سايلاۋىن وتكىزۋگە دايىندىق ماسەلەلەرى بويىنشا ۇلىتاۋ اۋدانىنىڭ سايلاۋ كوميسسيالارىنىڭ 165 مۇشەسىن كاسكادتىق ءادىس بويىنشا وقىتۋ ءىس-شاراسىنا قاتىستى.
سونداي-اق وسك مۇشەسى اسىلبەك سماعۇلوۆ اباي وبلىسىنىڭ اباي اۋدانىندا جانە كۋرچاتوۆ قالاسىندا ينسپەكتسيالىق ساپارمەن بولدى. 5 قاراشادا اكىمى سايلاناتىن اباي اۋدانىنداعى قارابۇلاق, وردا, قاراۋىل, ارحات اۋىلدارىنىڭ ۋچاسكەلىك سايلاۋ كوميسسيالارىنا بارىپ, الداعى سايلاۋعا دايىندىق بارىسىن تەكسەردى, سونداي-اق سايلاۋ كوميسسيالارى مۇشەلەرىنە ارنالعان وقىتۋ سەمينارىنا قاتىستى.
وسك مۇشەلەرى وتكىزىلەتىن وقىتۋ ءىس-شارالارى شەڭبەرىندە ءداستۇرلى تۇردە داۋىس بەرۋ كۇنىنە دەيىن جانە سايلاۋ كۇنى تىكەلەي ۋچاسكەلىك سايلاۋ كوميسسياسىنىڭ جۇمىسى بويىنشا تاجىريبەلىك كەيستەردى پىسىقتاۋعا, سايلاۋ قۇجاتتارىنىڭ نىساندارىن تولتىرۋ تارتىبىنە, ۋچاسكەلىك كوميسسيالار مۇشەلەرىنىڭ سايلاۋ ءۇردىسىنىڭ باسقا قاتىسۋشىلارىمەن ءوزارا ءىس-قيمىلىنا باسا نازار اۋداردى. ۋچاسكەلىك سايلاۋ كوميسسيالارىنىڭ مۇشەلەرىنە «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنىڭ نەگىزگى تالاپتارى, سايلاۋدى تاعايىنداۋدان باستاپ داۋىس بەرۋ كۇنىنە دەيىنگى سايلاۋ ناۋقانىن وتكىزۋ كەزەڭدەرى ءتۇسىندىرىلدى. بارلىق قويىلعان سۇراققا سايلاۋ زاڭناماسىنىڭ نورمالارى بويىنشا تولىق جاۋاپ بەرىلدى.
ايتا كەتەيىك, وسك مۇشەلەرى بۇعان دەيىن 9 وڭىرگە – سولتۇستىك قازاقستان, اقمولا, الماتى, اتىراۋ, شىعىس قازاقستان, جەتىسۋ, قاراعاندى, قىزىلوردا, پاۆلودار وبلىستارىنا بارعان بولاتىن.