بۇگىن دوستىق ۇيىندە حالىقارالىق تۇركى اكادەمياسى جانە م.و. اۋەزوۆ اتىنداعى ادەبيەت جانە ونەر ينستيتۋتىنىڭ ۇيىمداستىرۋىمەن كورنەكتى اقىن, پەداگوگ, الاش قوزعالىسىنىڭ قايراتكەرى ماعجان جۇماباەۆتىڭ تۋعانىنا 130 جىل تولۋىنا وراي «ماعجان جۇماباەۆ مۇراسى: تۇركى دۇنيەسىنىڭ رۋحاني تۇتاستىعى مەن تاريحي ساباقتاستىعى» تاقىرىبىندا حالىقارالىق عىلىمي-تاجىريبەلىك كونفەرەنتسيا ءوتتى.
جيىندى م.اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى, فيلولوگيا عىلىمدارىنىڭ دوكتورى, ۇعا كوررەسپوندەنت مۇشەسى كەنجەحان ماتىجانوۆ اشىپ, ماعجان مۇراسىن زەرتتەۋدىڭ ماڭىزى جايىندا ايتىپ ءوتتى.
القالى جيىننىڭ ماڭىزدى ءبولىمى م.اۋەزوۆ اتىنداعى ادەبيەت جانە ونەر ينستيتۋتى عالىمدارى جارىققا شىعارعان «ماعجان جۇماباەۆتىڭ اكادەميالىق جيناعىن تانىستىرۋعا ارنالدى. اكادەميالىق باسىلىم سەرياسىمەن جارىققا شىققان ءۇش تومعا ماعجان جۇماباەۆتىڭ ولەڭدەرى, پوەمالارى مەن اۋدارمالارى, وقۋلىقتار مەن وقۋ قۇرالدارى, عىلىمي ماقالالارى ەنىپ وتىر.
ماعجان مۇراسى تۋعان ەلىنىڭ بوستاندىعى مەن ەركىندىگى, تۇركى الەمىنىڭ تۇتاستىعى مەن بىرلىگىنە ارنالدى. سوندىقتان ماعجان جۇماباەۆ شىعارمالارىنىڭ تۇركى رۋحانياتىنداعى ماڭىزىن اشۋ بۇگىنگى ۋاقىت تالابى, دەپ اتاپ ءوتتى وسى جيىندا حالىقارالىق تۇركى اكادەمياسىنىڭ ۆيتسە-پرەزيدەنتى, PhD اسحات كەسىكباەۆ.
جيىندا مىرزا ۇلىقبەك اتىنداعى وزبەكستان ۇلتتىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى ناسيمحون راحمونوۆ «ماعجان جۇماباەۆ - ۇلتتىق ويانۋ ادەبيەتىنىڭ باستى وكىلى» تاقىرىبىنا بايانداما جاساسا, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى دانداي ىسقاق ۇلى «ماعجان - تۇركى الەمىنىڭ دارا اقىنى» ەكەنىن ءوز بايانداماسىنا ارقاۋ ەتتى. ال تاريح عىلىمدارىنىڭ دوكتورى, پروفەسسور, ۇعا اكادەميگى مامبەت قويگەلدى «الاش پارتياسى جانە ماعجان» تۋراسىندا وي وربىتسە, ەۆرازيا عىلىمي-زەرتتەۋ ينستيتۋتىنىڭ ديرەكتورى, PhD, پروفەسسور سۋات بەيلۋر «تۇركى الەمىنىڭ ينتەگراتسياسىنداعى ماعجاننىڭ ورنى», قازاقستان جازۋشىلار وداعى توراعاسىنىڭ ورىنباسارى, فيلولوگيا عىلىمدارىنىڭ دوكتورى, پروفەسسور باۋىرجان جاقىپ «ماعجان پوەزياسىنىڭ كەيبىر ەرەكشەلىكتەرى» تاقىرىبىنداعى بايانداماسىمەن الاششىل اقىننىڭ مۇراسىنىڭ ماڭىزىن اشىپ قانا قويماي, ونى بۇگىنگى كۇن تۇرعىسىنان زەرتتەۋ ماسەلەسىن قوزعادى.
جيىندا سونىمەن بىرگە كينورەجيسسەر, دوكۋمەنتاليست ح.وماروۆ تۇسىرگەن «ماعجان جۇماباەۆ» دەرەكتى ءفيلمى كورسەتىلدى.
كونفەرەنتسياعا قاتىسقان عالىمدار ماعجاننىڭ اقىندىق الەمى, حح-ءححى عاسىرداعى ادەبي-مادەني بايلانىستار, ماعجانتانۋ جانە تۇركولوگيا سالاسى, كوركەم ادەبيەتتەگى ماعجاننىڭ اقىندىق ءداستۇرى, اعارتۋشىلىق قىزمەتى, قايراتكەرلىك تۇلعاسى جانە الاش قوزعالىسى, قازىرگى زامانعى وزەكتى ماسەلەلەرى, ارحيۆ, مۋزەي جانە سيرەك قولجازبا دەرەكتەرىندەگى ماعجان مۇراسىن زەرتتەۋگە بايلانىستى پىكىرلەرىن ورتاعا سالدى.
الماتى