الداعى ۋاقىتتا تاراز قالاسى حالقىنىڭ سانى 570 مىڭنان اسىپ جىعىلاتىن بولدى. ويتكەنى شاھار ىرگەسىندەگى بايزاق پەن جامبىل اۋداندارىنان 14 ەلدى مەكەنى مەن ەكى ساياجايى تاراز قالاسىنىڭ اۋماعىنا قوسىلادى.
وبلىس ورتالىعىندا حالىق سانىنىڭ ارتۋىمەن كولىك قوزعالىسىنىڭ كوبەيەتىنى تۇسىنىكتى. بۇل ماسەلە كوپشىلىكتى تولعاندىرىپ تۇرعانى داۋسىز. تاراز قالاسىنىڭ اكىمى باقىتجان ورىنبەكوۆتىڭ ايتۋىنشا, تەمىرجولدىڭ ارعى جاعىنداعى اۋماق تۇرعىندارى مەن ورتالىقتى بايلانىستىرۋ ماقساتىندا جول وتكەلى سالىنادى.
«وتكەل جول سالۋدىڭ ماڭىزى زور ەكەنى ايتپاسا دا تۇسىنىكتى. وسى جىلى اباي داڭعىلىنىڭ بويىنان ەكى وتكەل جول سالۋ ءۇشىن جوبالىق-سمەتالىق قۇجاتتاما ازىرلەۋ كەرەك بولدى. قۇجاتتاردى دايىنداۋ, مەملەكەتتىك ساراپتامادان وتكىزۋ ءۇشىن جەرگىلىكتى قازىنادان قاجەتتى قاراجات قاراستىرىلىپ, كونكۋرس ناتيجەسىنە سايكەس «دەن-كو» جشس جوبالاۋشى بولىپ انىقتالىپ, كەلىسىمشارت جاسالدى. قازىرگى كەزدە جوبالاۋشى مەكەمەمەن جوبالىق-سمەتالىق قۇجاتتاردى دايىنداۋ جۇمىستارى جۇرگىزىلىپ جاتىر», دەيدى ب.ورىنبەكوۆ.
قالا اكىمىنىڭ ايتۋىنشا, تارازدىقتار ۇزاق ۋاقىت كۇتكەن كوپىردىڭ ۇزىندىعى ءبىر شاقىرىمعا جەتەعابىل. ال ەنى 17 مەتردى قۇرايدى. ءتيىستى قۇجاتتار تولىق ازىرلەنگەننەن كەيىن دە اتقارىلاتىن جۇمىس از ەمەس. ناقتىراق ايتساق, اباي داڭعىلىنىڭ اياق تۇسىنداعى 68 نىساندى مەملەكەت مەنشىگىنە قايتارۋ جۇمىستارى جۇرگىزىلمەك. ونىڭ قىرىقتان استامى جەكە تۇرعىن ءۇي بولسا, جيىرمادان استامى بيزنەس نىساندار ەكەن. جوسپارداعى جۇمىس ويداعىداي جۇزەگە اسسا, كوپىر قۇرىلىسى كەلەسى جىلدىڭ ەكىنشى جارتىسىندا باستالماق.
«شىنىن ايتساق, كوپىر سالۋ وڭاي شارۋا ەمەس. قولعا الىنعان جۇمىس مەملەكەتتىك م ۇلىك تۋرالى زاڭنىڭ 62-بابىنىڭ 3-تارماعىنىڭ 2-تارماقشاسىنا سايكەس جۇرگىزىلەدى. جەر ۋچاسكەسىن مەملەكەت مۇقتاجىنا الۋعا بايلانىستى يەلىكتەن شىعارىلاتىن جەر ۋچاسكەسىنىڭ نەمەسە وزگە دە مەملەكەتتىك م ۇلىكتىڭ نارىقتىق قۇنى وتەلەتىنىن ايتا كەتكەن ءجون. ايتكەنمەن باعانى جەرگىلىكتى اتقارۋشى بيلىك ەمەس, كونكۋرس ناتيجەسىندە جەڭىمپاز اتانعان كومپانيا بەلگىلەيتىنىن ەسكەرگەن ءلازىم. ءبىر سوزبەن ايتقاندا, بۇل جۇمىس جان-جاقتى زەردەلەنگەننەن كەيىن قۇرىلىس باستالادى», دەيدى قالا اكىمى.
قالاي دەسەك تە, تارازدىقتار تەمىرجولدىڭ ارعى جاعىنداعى تۇرعىندار مەن ورتالىقتى بايلانىستىراتىن وتكەلدىڭ قاجەتتىگىن جىلدار بويى وزەكتى ماسەلە رەتىندە كوتەرگەنى ءمالىم. جىل بۇرىن قالا اكىمى قىزمەتىنە كىرىسكەن ب.ورىنبەكوۆ تۇرعىنداردى تولعاندىرعان وتكىر ماسەلەنى وڭىنان شەشۋگە بار كۇشىن سالاتىنىن ايتقان ەدى. سوعان قاراعاندا الداعى بىرنەشە جىلدىڭ بەدەرىندە كوپىر سالۋ ماسەلەسى تولىقتاي شەشىمىن تاباتىن سەكىلدى.
تاراز قالاسى