پرەمەر-ءمينيستردىڭ ورىنباسارى تامارا دۇيسەنوۆا ءماجىلىستىڭ جالپى وتىرىسىندا حالىقتى جۇمىسپەن قامتۋ, شاعىن جانە ورتا بيزنەستى دامىتۋ جونىندەگى شارالار تۋرالى ايتتى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ول جاستار ساناتىنداعىلاردىڭ جاس مولشەرى 35-كە دەيىن ۇلعايتىلعانىن ەسكە سالدى. بۇل 6 ملن-عا جۋىق ازاماتتىڭ مەملەكەتتىك قولداۋ شارالارىن, ونىڭ ىشىندە جۇمىسپەن قامتۋ بولىگىن ءتيىمدى پايدالانۋعا مۇمكىندىك بەرگەن.
«2023 جىلى 20 وڭىردە جۇمىسپەن قامتۋ جوسپارى ىسكە اسىرىلىپ وتىر. ولاردا العاش رەت ايماقتاردىڭ وڭىرلىك ەڭبەك نارىعىنىڭ ەرەكشەلىگى ەسكەرىلىپ, تيىسىنشە مەملەكەتتىك قولداۋ شارالارى سارالاندى. 1 قازانداعى جاعداي بويىنشا 715 مىڭنان استام ادام جاڭا, بوس جانە مەملەكەت سۋبسيديالايتىن جۇمىس ورىندارىنا ورنالاستىرىلدى, ونىڭ جارتىسى – جاستار», دەدى ۆيتسە-پرەمەر.
پرەمەر-ءمينيستردىڭ ورىنباسارى ءمالىم ەتكەندەي, ۇكىمەت جۇزەگە اسىرىپ وتىرعان ينۆەستيتسيالىق جوبالاردىڭ ورنى ەرەكشە. ماسەلەن, بيىل جالپى سوماسى 273 ميلليارد تەڭگەدەن اساتىن قارجىعا 64 جوبا جۇزەگە اسىرىلا باستاعان. سونىڭ ارقاسىندا 12 مىڭنان اسا جۇمىس ورنى اشىلاتىنى كۇتىلىپ وتىر.
«جالپى, ۇكىمەت ونەركاسىپتىڭ ءتۇرلى سالالارىندا ساپالى جانە تۇراقتى جۇمىس ورىندارى اشۋ ءۇشىن الداعى جىلدارى وسىنداي 800 ينۆەستيتسيالىق جوبانى ىسكە اسىرۋدى جوسپارلاپ وتىر», دەدى تامارا دۇيسەنوۆا.
ول ۇكىمەتتە شاعىن جانە ورتا بيزنەستى قولداۋ جانە دامىتۋ جونىندە كەشەندى باعدارلاما ازىرلەنىپ جاتقانىن اتاپ ءوتتى.
«بۇگىندە «تازا پاراقتان رەتتەۋ» قاعيداتىن بايقاپ كوردىك. ءبىر جارىم جىل ىشىندە 44 سالا بويىنشا 128 مىڭ تالاپ ساراپتالدى. ونىڭ 9 مىڭى جاڭا رەتتەۋشى ساياساتتىڭ شارتتارىنا سايكەس كەلمەيدى», دەپ اتاپ ءوتتى ۆيتسە-پرەمەر.
ونىڭ ايتۋىنشا, تاياۋ ارادا كاسىپكەرلەر ءۇشىن سالىق ورگاندارى الدىندا ەسەپ بەرۋ ءۇردىسى ەداۋىر جەڭىلدەيدى. ماسەلەن, كورسەتكىشتەرى نولگە تەڭ بولسا, قۇزىرلى ورگاندارعا ەسەپ بەرۋدى مىندەتتەمەۋ جوسپارعا الىنعان. وسى ارقىلى كاسىپ يەسىنىڭ شوتى بۇعاتتالمايتىن بولادى. سالىق ورگاندارىنا بەرىلەتىن ەسەپتىلىك 30%-عا قىسقارماق. جوسپارلى تەكسەرۋلەر دە ازايادى.
«مەملەكەتتىك باقىلاۋ جانە قاداعالاۋ سالالارىندا تاۋەكەلدەردى باسقارۋ جۇيەلەرىن اۆتوماتتاندىرۋ ءىسى قولعا الىندى. بۇل قادام بيزنەستى جوسپارلى تۇردە تەكسەرۋدى 2 ەسە ازايتۋعا مۇمكىندىك بەرەدى», دەپ تۇيىندەدى تامارا دۇيسەنوۆا.