پرەزيدەنت الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ ءححى وتىرىسىنا قاتىسۋشىلارعا ۇندەۋ جولدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆ جيىنعا قاتىسۋشىلاردى الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ ءححى وتىرىسىنىڭ اشىلۋىمەن قۇتتىقتادى.
«بيىل – العاشقى سەزدىڭ شاقىرىلعانىنا 20 جىل. بۇل يگى باستاما ءوزىنىڭ ومىرشەڭدىگىن دالەلدەپ, از ۋاقىت ىشىندە ماڭىزدى وركەنيەتارالىق ديالوگ الاڭىنا اينالدى. فورۋم دىنارالىق تاتۋلىق پەن كەلىسىمدى نىعايتۋعا, بۇكىل ادامزاتقا ورتاق تۇيتكىلدەردىڭ شەشىمىن تابۋعا جانە تولەرانتتىلىقتى دارىپتەۋگە سەپتىگىن تيگىزىپ كەلەدى. باسقوسۋ اياسىندا الەمنىڭ رۋحاني كوشباسشىلارى جاھان جۇرتىن الاڭداتقان وزەكتى ماسەلەلەردى تالقىلاپ, بەيبىتشىلىكتى ساقتاۋ جانە ءوزارا قۇرمەت پەن سىيلاستىقتى ناسيحاتتاۋ تۋرالى ويلارىن ورتاعا سالادى. قازىر گەوساياسي احۋال ۋشىعىپ, ءتۇرلى سىن-قاتەر كۇشەيىپ تۇر. وسى الماعايىپ كەزەڭدە ىزگىلىك, مەيىرىمدىلىك, باۋىرمالدىق, جاۋاپكەرشىلىك سياقتى قاعيداتتاردىڭ قادىرى ارتا ءتۇستى. سونداي-اق حالىقارالىق قاۋىپسىزدىكتىڭ جاڭا جۇيەسىن قالىپتاستىرۋ وتە ماڭىزدى ماسەلەگە اينالدى. ول ءۇشىن الەم حالقىن بەيبىتشىلىككە شاقىراتىن جاڭا جاھاندىق قوزعالىس قاجەت. بۇل رەتتە ءدىن كوشباسشىلارى ايرىقشا ءرول اتقارادى», دەدى مەملەكەت باسشىسى.
پرەزيدەنت حاتشىلىقتىڭ بۇگىنگى وتىرىسى مازمۇندى ءارى تابىستى وتەتىنىنە سەنىم ءبىلدىردى.
سونىمەن قاتار قاسىم-جومارت توقاەۆ قازاقستان دىنارالىق جانە وركەنيەتارالىق ىنتىماقتاستىققا نەگىز بولاتىن باستامالارعا ءاردايىم قولداۋ كورسەتەتىنىن, ونى سىرتقى ساياساتتىڭ نەگىزگى باسىمدىقتارىنىڭ ءبىرى رەتىندە ۇستاناتىنىن اتاپ ءوتتى.
پرەزيدەنت جيىن قاتىسۋشىلارىنا العىس ايتىپ, ولاردىڭ ىزگىلىك جولىنداعى ىستەرىنە تولايىم تابىس تىلەدى.