تارازداعى وڭالتۋ ورتالىعى

دەرەكتەرگە جۇگىنسەك, ءوڭىر بو­يىنشا 45 مىڭنان اسا مۇگە­دەك­تىگى بار ازامات تىركەلگەن ەكەن. مۇمكىندىگى شەكتەۋلى ازا­­ماتتاردى قاجەتتى وڭالتۋ قۇ­رىل­عىلارىمەن قامتاماسىز ەتۋ ماقساتىندا وسى جىلدىڭ وزىندە 3,6 ملرد تەڭگە قارجىعا نەگىزگى قۇرىلعىلار ساتىپ الىن­­عان. ارناۋلى الەۋمەتتىك قىز­م­ەتتەردى ۇسىنۋ ماقساتىندا 21 مەديتسينالىق مەكەمە قىز­مەت اتقارىپ وتىرعانىن ايتا كەتكەن ءجون. 1 689 ازامات سول مەكەمەلەرگە جۇگىنەدى. جالپى, قولعا الىنعان جۇمىستاردى جۇزەگە اسىرۋ ءۇشىن 7 ملرد تەڭ­گە قا­را­جات قاراستىرىلعان.

«مۇگەدەكتىگى بار ازامات­تار­دىڭ ءومىر ءسۇرۋ ساپاسىن ارتتىرۋ جانە ولارعا قولدان كەلگەنشە الەۋمەتتىك قولداۋ كور­سەتۋ – مەم­لەكەتتىك سايا­ساتتىڭ باسىم باعىت­تا­رىنىڭ ءبىرى. تاعدىر­دىڭ تاۋقىمەتىن تارتقان جەرلەستەرگە جەرگىلىكتى بيلىك مۇمكىندىگىنشە قولداۋ كورسەتۋگە ءازىر. قازىرگى كەزدە ەرەكشە قاجەتتىلىككە مۇقتاج ادام­­داردىڭ جاعدايىن جاقسار­تىپ, ولاردىڭ قوعامدا تەڭ مۇمكىندىككە قول جەتكىزۋىن قام­­تاماسىز ەتۋ, كوكەيكەستى ماسە­­لەلەرىنە قوعامنىڭ نازا­رىن اۋدارۋ, قۇقىقتارىن قور­­عاۋ بو­يىنشا جەرگىلىكتى ات­قارۋشى بيلىك تاراپىنان ءتۇرلى ءىس-شارا قولعا الىنىپ وتىرعانى بەلگىلى. مەملەكەت باسشىسى قاسىم-جومارت توقاەۆ ءوز جولداۋىندا «الەۋ­مەتتىك جاعىنان ءالسىز توپ­تاعى ازاماتتارعا قولداۋ كور­سەتەمىز» دەپ اتاپ وتكەنى ءما­لىم. ال بۇل جۇمىستاردى جۇ­يە­­لى تۇردە جۇزەگە اسىرۋ – ءبىز­دىڭ مىندەتىمىز. بيلىك تا­را­­پىنان جاسالىپ وتىرعان قام­قورلىقتىڭ ناتيجەسىندە ەلىمىز­دەگى مۇمكىندىگى شەكتەۋلى ازاماتتاردى وڭالتۋ مەن بەيىم­دەۋ جۇ­مىستارىنا ايرىق­شا كوڭىل ءبولىنىپ وتىر. جامبىل وبلىسىندا دا اۋىز تولتىرىپ ايتارلىقتاي جۇمىستار اتقارىلىپ جاتىر. ەڭ باستىسى, ءبىز بۇل باعىت بويىنشا قولعا الىن­عان جۇمىستاردى ۇز­دىكسىز جال­عاس­تىرامىز», دەي­­دى ءوڭىر باسشىسى ەربول قاراشوكەەۆ.

جاڭا ورتالىقتىڭ اشىلۋ سالتاناتىنا ارنايى قاتىسقان ەڭبەك جانە حالىقتى الەۋمەتتىك قورعاۋ ۆيتسە-ءمينيسترى نازگۇل ساعىندىقوۆانىڭ ايتۋىنشا, ەلىمىز بويىنشا اباي وبلىسىنىڭ ورتالىعى سەمەي قالا­سىندا جانە اۋليەاتا جەرىندە عانا زاماناۋي وڭال­تۋ ورتالىعى اشىلىپتى. مۇق­تاج جانداردىڭ يگىلىگىنە سالىنعان ورتالىقتاردىڭ قۇ­رى­لىسىنا 5,5 ملرد تەڭگە قارا­جات قاراستىرىلعان.

ءوڭىر تۇرعىندارىنىڭ يگىلى­گىنە بەرىلگەن الەۋمەتتىك وڭالتۋ ورتالىعىنىڭ جالپى اۋماعى 4,932 گەكتاردى قۇ­رايدى. وڭالتۋ ورتا­لىعى 5 بلوكتەن تۇرادى. مۇندا ءجۇزۋ باسسەينى, ءماجىلىس زالى, ەمدە­لۋ­شى­لەرگە ارنالعان سپورتزال, ءۇش قابات­تان تۇراتىن ەمدەۋ كورپۋسى جانە ەكى قاباتتان تۇراتىن ستاتسيو­نار بار.

جاۋاپتى ماماندار كەلتىر­گەن دەرەكتەرگە سەنسەك, ءى جانە ءىى توپتاعى مۇگەدەكتىگى بار ازاماتتاردى ەمدەۋ شارالارىن جۇرگىزۋگە قاجەتتى كابينەتتەردە ءتيىستى قۇرىلعىنىڭ بارلىعى بار. ناقتىراق ايتار بولساق, كەلۋ­شىلەر فيزيو-ەمدەۋ, ەلەكتر­مەن ەمدەۋ, ينەلى رەفلەكسوتەرا­پيا, وزاكەريت-پارافينمەن ەمدەۋ, ينگالياتسيا, ەمدىك شىنىقتىرۋ, جارىقپەن ەمدەۋمەن قامتىلعان.

سونداي-اق كەلۋشىلەردىڭ جەكە جانە توپتىق ساباقتارعا قاتىسۋىنا, كومپيۋتەرلىك تەحنيكانى ۇيرەنۋىنە, تابيعي ماتەريالدارمەن جۇمىس ىستە­ۋىنە, كەستە توقۋدى مەڭگەرۋىنە جانە وزگە بىرنەشە باعىت بويىن­شا ءوز-ءوزىن دا­مىتۋىنا مۇم­كىندىكتەر قاراس­تىرىل­عان.

تۇيىندەپ ايتساق, مۇمكىندىگى شەك­تەۋلى ازاماتتار اسىعا كۇت­كەن جاڭا ورتالىق ەندى ءتيىس­تى ساناتتاعى ادام­دار­دىڭ يگى­لىگى ءۇشىن قىزمەت ەتەدى. ما­مان­دار جىل سايىن 100 ازامات­تى وڭال­تۋدان وتكىزۋگە تاس-ءتۇيىن دا­يىن وتىر.

تاراز