قازاقستاندا 16 قازاننان باستاپ اۆتوبۋس جانە تاكسي جۇرگىزۋشىلەرى مەديتسينالىق كۋالاندىرۋدان ونلاين فورماتتا وتە الادى. اتالعان سالاعا تسيفرلىق شەشىمدەر ەنگىزىلەتىنىن كولىك مينيسترلىگىنىڭ ءباسپاسوز قىزمەتى حابارلادى, دەپ جازادى Egemen.kz.
ونلاين تەكسەرۋ كەزىندە زاڭناما تالاپتارىنا جاۋاپ بەرەتىن جانە جۇرگىزۋشىنىڭ جالپى دەنساۋلىعىن تەكسەرۋگە قابىلەتتى اۆتوماتتاندىرىلعان مەديتسينالىق كەشەندەر ارقىلى جۇرگىزۋشىلەر بيومەتريالىق جانە باسقا ادىسپەن سايكەستەندىرىلەدى, ونلاين ساۋالنامادان وتەدى, جۇرگىزۋشىلەردىڭ كوز قاراشىعىنىڭ جارىق تىتىركەندىرگىشىنە رەاكتسياسى تەكسەرىلەدى, الكوگولدىك احۋالى تەكسەرۋدەن وتەدى, سونىمەن قوسا دەنە تەمپەراتۋراسى مەن قان قىسىمى جانە ءپۋلستى ولشەۋ مۇمكىندىكتەرى بار.
اتالعان سالادا تسيفرلىق شەشىمدەردى ەنگىزۋ تاسىمالداۋشىلارعا, تاكسوپاركتەرگە, اۆتوبۋس پاركتەرىنە:
تەكسەرۋ جۇرگىزۋ راسىمدەرىندە اشىقتىقتى قامتاماسىز ەتۋگە; جۇرگىزۋشىلەر مەن مەديتسينا قىزمەتكەرلەرى اراسىنداعى سىبايلاس جەمقورلىق فاكتىلەرىن ازايتۋعا; جولاۋشىلار مەن باگاجدى تاسىمالداۋ كەزىندە قاۋىپسىزدىك شارالارىن ارتتىرۋعا; ۋاقىتتى ۇنەمدەۋگە; جۇرگىزۋشىلەردىڭ دەنساۋلىق جاعدايىنا تولىق تالداۋ جۇرگىزۋگە مۇمكىندىك بەرەدى.مينيستر بۇيرىعى 16 قازاننان باستاپ كۇشىنە ەنەدى.