جەتىسۋدا مۇمكىندىگى شەكتەۋلى جاندارعا مۇمكىندىك بەرەتىن سپورتتىق-وڭالتۋ ورتالىعى اشىلدى. تىرەك-قيمىل جۇيەسى زاقىمدانعان ادامداردى قالپىنا كەلتىرۋگە جاردەمدەسەتىن نىسان حالىققا تەگىن قىزمەت ەتەدى. ەڭ عاجابى, سوڭعى ۇلگىدەگى زاماناۋي تەحنيكامەن جابدىقتالعان. جۇزدەگەن جاننىڭ ءۇمىتىن جاققان ورتالىقتا بىلىكتى ماماندار جۇمىس ىستەيدى.
بۇل ورتالىقتا نەگىزىنەن ومىرتقانىڭ ءتۇرلى جاراقاتتارىنان, ينسۋلتتان, بالالاردىڭ تسەرەبرالدى سال اۋرۋى كەزىندە, ءى-ءىىى توپتاعى مۇگەدەكتىكتەن كەيىن وڭالتۋ جۇرگىزىلەدى. مەملەكەتتىك تاپسىرىس ارقىلى وبلىستىق بيۋدجەتتەن حالىققا وسى ورتالىقتا تەگىن نەگىزدە وڭالتۋ قىزمەتتەرىن كورسەتۋ ءۇشىن 80 ملن تەڭگە بولىنگەن. جىلىنا 400-گە دەيىن ادام قابىلداي الادى.
ماڭىزدى الەۋمەتتىك نىساننىڭ اشىلۋىنا وبلىس اكىمى بەيبىت يساباەۆ قاتىسىپ, ورتالىقتىڭ باسشىسى ءارى نەگىزىن قالاۋشى ەلدوس بايالىشباەۆقا العىسىن ءبىلدىردى:
«بۇگىن ءبىز تالدىقورعان قالاسىندا «اسار» وڭالتۋ كەشەنىنىڭ اشىلعانىنا كۋا بولىپ وتىرمىز. بۇل وڭالتۋ ورتالىعى ەرەكشە قاجەتتىلىكتەرى بار حالىققا ساپالى قىزمەت كورسەتۋگە جاردەمدەسەدى دەپ سانايمىن. بارشاعا كەدەرگىسىز, قولجەتىمدى ورتا قۇرۋ – مەملەكەتتىك ساياساتتىڭ ماڭىزدى باعىتى جانە بۇكىل قوعامنىڭ مىندەتى. بۇل تۋرالى مەملەكەت باسشىسى ۇنەمى ايتىپ وتىرادى. بيىل 162 الەۋمەتتىك نىساندى بەيىمدەۋگە 472,6 ملن تەڭگە ءبولىندى. بۇدان ءارى وسى باعىتتاعى جۇمىس جالعاسادى, دەدى ب.يساباەۆ.
جالپى, وڭىردە مۇمكىندىگى شەكتەۋلى جاندارعا قوعاممەن قاتار ءومىر ءسۇرۋ ءۇشىن جاعداي جاسالىپ كەلەدى. ماسەلەن, بيىل تالدىقورعاندا «قامقورلىق» قورىمەن بىرلەسىپ ءاۋتيزمى جانە باسقا دا اقىل-وي كەمىستىگى بار بالالارعا ارنالعان ورتالىق اشىلعان. قازىر ونىڭ بازاسىندا 18 جاستان اسقان ازاماتتار ءۇشىن دە جاعداي جاساۋ جوسپارلانىپ وتىر. ودان بولەك, الاكول اۋدانىنىڭ اقشي اۋىلىندا, شيپالى كولدىڭ جاعاسىندا بيىل كۇردەلى جوندەۋدەن وتكەن اۋداندىق رەزيدەنتسيا بازاسىندا جازعى دەمالىس ءۇشىن بالالاردى وڭالتۋ لاگەرى اشىلدى. وسى جازدا 140 بالا دەمالعان. بۇعان قوسا بالقاش كولىنىڭ جاعاسىندا دا وسىنداي ورتالىق سالۋ جوسپاردا بار. ەڭ عاجابى وندا قابىلدايتىن ادام سانى الاكولدەگى لاگەردەن كوبىرەك بولادى. بۇل ءۇشىن الدىمەن جولدى اياقتاپ, سودان كەيىن ينجەنەرلىك ينفراقۇرىلىم سالۋ قاجەت. قازىر سوعان ساي وڭىردە جۇمىستار ءجۇرىپ جاتىر.
تالدىقورعاندا وڭالتۋ قىزمەتتەرى 300 ادامعا كورسەتىلىپ وتىرسا, سونىڭ 54-ءى – بالا. وسى ىزگىلىكتى ءىستىڭ باسىندا جۇرگەن وڭالتۋ ورتالىعىنىڭ باسشىسى ەلدوس بايالىشباەۆتىڭ ەڭبەگى زور. وعان وبلىس باسشىسى جۇرتشىلىق اتىنان العىسىن ءبىلدىردى.
«مەن بۇل ورتالىقتا بولعانمىن. بۇگىن اشىلۋى وتكىزىلىپ وتىرعانىنا قۋانىشتىمىن. ءبىز ءوز تاراپىمىزدان قولداۋ كورسەتۋدى جالعاستىرامىز. مۇندا گاز تارتىپ بەرەمىز, شامامەن 1,5 اي ىشىندە جۇمىستى اياقتايمىز. وسىنداي ورتالىقتار ەرەكشە كۇتىمگە مۇقتاج ازاماتتاردىڭ الەۋمەتتىك-تۇرمىستىق ورتاعا بەيىمدەلۋىنە, سونداي-اق كورسەتىلەتىن وڭالتۋ قىزمەتتەرىنىڭ ساپاسىن ارتتىرۋعا ىقپال ەتەتىنىنە سەنىمدىمىن», دەگەن ب.يساباەۆ بۇدان ءارى ەڭبەك جانە حالىقتى الەۋمەتتىك قورعاۋ ءمينيسترىنىڭ قۇتتىقتاۋ جەدەلحاتىن وقىپ بەردى. وندا ە.بايالىشباەۆتىڭ الەۋمەتتىك قورعاۋ ىسىنە قوسقان ۇلەسى اتالىپ ءوتىلىپ, ورتالىق باسشىسى مەن ۇجىمىنىڭ اتىنا تىلەكتەر جولداندى.
قاتىسۋشىلاردى ورتالىقتىڭ اشىلۋىمەن تالدىقورعان قالاسىنىڭ «ەر» تىرەك قيمىل جۇيەسى زاقىمدانعان مۇگەدەكتەردىڭ قوعامدىق بىرلەستىگىنىڭ توراعاسى, قالالىق ءماسليحات دەپۋتاتى روزا اقجاركەنوۆا قۇتتىقتادى.
«ەلدوس, سەنىڭ ءبىزدىڭ قالامىزدا بولعانىڭا ريزامىن. ءبارى نەدەن, قالاي باستالعانىن بىلەمىز جانە وسىنداي جاعدايعا جەتىپ وتىرعانىڭ – ءوزىڭنىڭ قاجىرلى ەڭبەگىڭنىڭ ناتيجەسى. كوبىسى ورتالىققا اربامەن كىرىپ, وڭالتۋدان كەيىن بالداقپەن شىعادى. ەلدوسقا قولداۋ كورسەتىپ, جوبانى جۇزەگە اسىرۋعا كومەكتەسكەندەردىڭ بارلىعىنا شىن جۇرەكتەن العىس بىلدىرەمىن, ويتكەنى بۇل جاي عانا پايدالى ءىس قانا ەمەس, ناعىز يگى, ىزگى ءىس. دەندەرىڭىز ساۋ بولسىن, ءومىردى باعالاڭىزدار جانە ءبىر-بىرىڭىزگە قامقور بولىڭىزدار», دەدى ر.اقجاركەنوۆا.
ودان كەيىن ورتالىقتىڭ ديرەكتورى ە.بايالىشباەۆ قولداۋ كورسەتكەن ءاربىر ازاماتقا العىسىن ايتىپ, ورتالىقتىڭ قۇرىلۋ تاريحىنان سىر تارتتى.
«2015 جىلدان باستاپ وسى جوبانى ىسكە اسىرا باستادىم, ءۇش جىل قاتارىنان ء«سابي» قورىنىڭ ء«وز بيزنەسىڭدى قۇر» كونكۋرسىنا قاتىستىم. ءۇشىنشى جىل دەگەندە جەڭىسكە جەتتىم. سونىمەن قاتار ءار جىلدارى جاپونيا ەلشىلىگىنىڭ جابدىق ساتىپ الۋعا بەرىلەتىن ء«شوپ تامىرلارى» گرانتىن ەكى رەت جەڭىپ الدىم. ايتپاقشى, حالىقارالىق گرانتتى ءبىر ادامنىڭ ەكى رەت ۇتۋى الەمدەگى ەكىنشى جاعداي ەكەن. بۇل زاماناۋي جەتىلدىرىلگەن جابدىقتى ساتىپ الۋعا ۇلكەن قولداۋ بولدى. «دامۋ» قورىنىڭ جەڭىلدىك شارتتارى بار كرەديتتىك قاراجاتىن دا پايدالاندىم. اكىمدىك ماعان قۇرىلىس سالاتىن جەر تەلىمىن بەردى. جالپى, كوپ ۋاقىت كەتتى, قانشاما كۇش جۇمسالىپ, جۇمىس ىستەلدى. سونىڭ ءبارى ناتيجەسىن بەردى. بۇگىن ورتالىق رەسمي تۇردە اشىلىپ وتىر. ءبىز حابارلاسقانداردىڭ بارلىعىنا كومەكتەسۋگە تىرىسامىز. وسى مۇمكىندىكتى پايدالانا وتىرىپ, ءوز ۇجىمىما العىسىمدى بىلدىرەمىن. باستاپقىدا بىزدە 4-5 ادام عانا جۇمىس ىستەگەن, قازىر ولاردىڭ سانى 30-عا جۋىقتادى. سىزدەر بولماساڭىزدار, وسىنداي جەتىستىككە جەتپەس ەدىم», دەدى ە.بايالىشباەۆ.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, «اسار» سپورتتىق-وڭالتۋ ورتالىعى عيماراتىنىڭ جالپى اۋدانى 700 شارشى مەتردى قۇرايدى. فيزيوتەراپيا, كينەزوتەراپيا كابينەتتەرى, ماسساج جانە ەمدەۋ كابينەتتەرى, پسيحولوگ جانە لوگوپەد كابينەتتەرى, بۋفەت بار, كەدەرگىسىز ورتا قالىپتاستىرۋ ءۇشىن بارلىق جاعداي جاسالعان. جوبانىڭ جالپى قۇنى – 120 ملن تەڭگە. مەملەكەتتىك الەۋمەتتىك تاپسىرىس ارقىلى ورتالىقتا قىزمەتتەر تەگىن كورسەتىلەدى, مۇندا قىزمەت الۋ ءۇشىن دارىگەردىڭ تاعايىنداۋى قاجەت.
جالپى, «اسار» سپورتتىق-وڭالتۋ ورتالىعىنىڭ جوعارى تەحنولوگيالىق جابدىقتارى ەرەكشە. مىسالى, يسپاندىق ەكزوسكەلەت ادامعا قايتادان ءجۇرۋدى ۇيرەنۋگە كومەكتەسەدى. «بۇل سالماعى نەبارى 17 كگ بولاتىن مودەل, رەسەيلىك ءوندىرىس مودەلىنىڭ سالماعى – 46 كگ. ەلىمىزدە مۇنداي مودەل جوق, بۇل مودەل قوزعالىس داتچيكتەرىنىڭ فۋنكتسياسىنا يە. ترەناجەردىڭ قۇنى – شامامەن 107 ملن تەڭگە», دەپ ءتۇسىندىردى ورتالىق ديرەكتورى.
زاماناۋي ەمدەۋ جابدىقتارىنىڭ تاعى ءبىرى – «لۋنا» كوپفۋنكتسيونالدى روبوتتانعان وڭالتۋ جۇيەسى. بۇل ەرەكشە ترەناجەر نەۆرولوگيالىق جانە ورتوپەديالىق پاتولوگياسى بار, باستان وتكەرگەن جاراقاتتارى مەن اۋرۋلارىنا بايلانىستى قوزعالىس بۇزىلىستارى بار ناۋقاستاردى ەمدەيدى. «اسار» ورتالىعىندا اقش, جاپونيا, گەرمانيا, يتاليا, ۇلىبريتانيا, يسپانيا, پولشادان اكەلىنگەن ەرەسەكتەر مەن بالالاردى وڭالتۋعا ارنالعان 30-دان اسا ترەناجەر مەن ارنايى جابدىق بار.
جەتىسۋ وبلىسى