پرەمەر-مينيستر ءاليحان سمايىلوۆتىڭ توراعالىعىمەن وتكەن ينۆەستيتسيالىق احۋالدى جاقسارتۋ جونىندەگى كەڭەستىڭ كەزەكتى وتىرىسىندا قازاقستاننىڭ دەنساۋلىق ساقتاۋ سالاسىن ودان ءارى دامىتۋ ماسەلەلەرى تالقىلاندى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ءىس-شاراعا ۇلىبريتانيانىڭ قازاقستان رەسپۋبليكاسىنداعى ەلشىسى كەتي ليچ, كانادا ەلشىسى الان حەمسون, اقش ەلشىسى دەنيەل روزەنبليۋم, دۇنيەجۇزىلىك بانك پەن سيتيبانكتىڭ قازاقستان بويىنشا وكىلدەرى, Ernst & Young, AstraZeneca, Janssen جانە Pfizer كومپانيالارىنىڭ وكىلدەرى, سونداي-اق قازاقستان رەسپۋبليكاسىنىڭ ورتالىق مەملەكەتتىك ورگاندارىنىڭ باسشىلارى قاتىستى.
جيىنعا قاتىسۋشىلار زاماناۋي مەديتسينالىق تەحنولوگيالاردى ەنگىزۋ, دەنساۋلىق ساقتاۋ ينفراقۇرىلىمىن جاڭعىرتۋ, بىلىكتى ماماندار دايارلاۋ, فارماتسەۆتيكا سالاسىن دامىتۋ, حالىقتىڭ يننوۆاتسيالىق ءدارى-دارمەكتەرگە قولجەتىمدىلىگىن ارتتىرۋ, شالعايداعى ەلدى مەكەندەردىڭ تۇرعىندارىنا مەديتسينالىق قىزمەت كورسەتۋ جانە باسقا دا بىرقاتار ماسەلەنى جان-جاقتى تالقىلادى.
پرەمەر-مينيستر سوڭعى جىلدارى قازاقستاندا دەنساۋلىق ساقتاۋ سالاسىندا اۋقىمدى رەفورما جۇرگىزىلىپ جاتقانىن اتاپ ءوتتى. اتاپ ايتقاندا, بىرىڭعاي ۇلتتىق دەنساۋلىق ساقتاۋ جۇيەسى قۇرىلدى, مىندەتتى مەديتسينالىق ساقتاندىرۋ ەنگىزىلدى, تەلەمەديتسينا دامىپ كەلەدى, قۇرال-جابدىقتار مەن ءدارى-دارمەكتەر ساتىپ الۋ پروتسەسى جاقساردى, دارىگەرلەردىڭ جالاقىسى ەداۋىر ارتتى.
«جالپى, ۇكىمەت 2027 جىلعا قاراي مەديتسينا سالاسىن قارجىلاندىرۋ دەڭگەيىن ءىجو-ءنىڭ 5%-نا دەيىن جەتكىزە وتىرىپ, اتالعان سالانى دامىتۋدىڭ تۇراقتى مودەلىن قۇرۋ بويىنشا جۇمىس جۇرگىزىپ جاتىر. وسىعان وراي ءبىز ينۆەستيتسيالار مەن وزىق تەحنولوگيالار تارتۋعا مۇددەلىمىز», دەدى ءاليحان سمايىلوۆ.
ول ۇكىمەت قابىلداپ جاتقان شارالار سالانىڭ ينۆەستيتسيالىق تارتىمدىلىعىنا وڭ اسەرىن تيگىزەتىنىن ايتتى. ماسەلەن, وتكەن جىلدىڭ قورىتىندىسىنا سايكەس دەنساۋلىق ساقتاۋ سالاسىنداعى نەگىزگى كاپيتالعا سالىنعان ينۆەستيتسيا كولەمى شامامەن $540 ملن-دى قۇراپ, 30%-عا ءوستى. سونىمەن قاتار سوڭعى 7 جىلدا فارماتسەۆتيكا نارىعىنىڭ كولەمى 2,9 ەسەگە ارتتى.
ونىڭ ايتۋىنشا, مەديتسينا ينفراقۇرىلىمىن جاقسارتۋ بويىنشا كەشەندى شارالار قابىلدانىپ كەلەدى. ماسەلەن, پرەزيدەنت تاپسىرماسى بويىنشا جەكە ينۆەستيتسيالار تارتۋ ارقىلى 20 زاماناۋي كوپبەيىندى اۋرۋحانا سالۋ جوسپارلانىپ وتىر. سونداي-اق «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 655 العاشقى مەديتسينالىق-سانيتاريالىق كومەك كورسەتۋ نىسانى پايدالانۋعا بەرىلىپ, 32 كوپبەيىندى اۋداندىق اۋرۋحانا جاڭعىرتىلادى.
پرەمەر-مينيستر ۇكىمەت مەملەكەتتىك قولداۋ شارالارىنىڭ پاكەتتەرىن ۇسىنا وتىرىپ, فارماتسەۆتيكالىق يندۋستريانىڭ الەمدىك ءىرى وكىلدەرىمەن دە بەلسەندى ىسكەرلىك بايلانىستاردى ارتتىراتىنىن اتاپ ءوتتى. وسىلايشا, Pfizer كومپانياسىمەن ءدارى-دارمەك ءوندىرىسىن لوكاليزاتسيالاۋ بويىنشا ينۆەستيتسيالىق كەلىسىم جاساۋ جوسپارلانىپ وتىر. AstraZeneca كومپانياسىمەن ينۆەستيتسيا كولەمى $32 ملن بولاتىن بىرەگەي دارىلىك زاتتاردىڭ كەلىسىمشارتتىق ءوندىرىسىن قۇرۋ تۋرالى ۋاعدالاستىققا قول جەتكىزىلدى.
سونىمەن بىرگە قازاقستان پرەزيدەنتىنىڭ اقش-قا ساپارى بارىسىندا GE Healthcare كومپانياسىمەن قۇنى $60 ملن بولاتىن مەديتسينالىق تەحنيكا ءوندىرىسىن لوكاليزاتسيالاۋ جونىندەگى نەگىزدەمەلىك كەلىسىمگە قول قويىلدى. سونداي-اق Roche كومپانياسىمەن $2,5 ملن سوماعا بىرقاتار جوبا پىسىقتالىپ جاتىر. وڭتۇستىك كورەيا, تۇركيا, ەگيپەت جانە يزرايل ينۆەستورلارىمەن كەلىسىم-شارتتىق ءوندىرىس جوبالارى جۇزەگە اسىرىلىپ جاتىر.
«دارىلىك زاتتارعا سۇرانىستىڭ ارتۋى اياسىندا دەنساۋلىق ساقتاۋ سالاسىنىڭ, ونىڭ ىشىندە فارماتسەۆتيكا ونەركاسىبىنىڭ دامۋ الەۋەتى وتە زور», دەپ اتاپ ءوتتى ءاليحان سمايىلوۆ.
جيىندى قورىتىندىلاي كەلە پرەمەر-مينيستر ۋاكىلەتتى مەملەكەتتىك ورگاندارعا كەڭەس بارىسىندا ايتىلعان ۇسىنىستار مەن ۇسىنىمدار بويىنشا جۇمىستى پىسىقتاۋدى تاپسىردى.