مەملەكەت باسشىسى كەزدەسۋ قاتىسۋشىلارىنا جۋىردا گەرمانيالىق HMS Bergbau كومپانياسىنىڭ باسشىلىعىمەن گەولوگيالىق بارلاۋ جۇمىستارىن جۇرگىزۋ جانە الداعى ۋاقىتتا ليتي وڭدەۋ كەشەنىن سالۋ تۋرالى ۋاعدالاستىققا قول جەتكىزىلگەنى جونىندە مالىمەت بەردى. ينۆەستيتسيا كولەمى – 500 ميلليون دوللاردى قۇرايدى, دەپ حابارلايدى Egemen.kz.
«ونەركاسىپ سالاسىنداعى ىنتىماقتاستىعىمىز دا مۇلدە جاڭا دەڭگەيگە كوتەرىلىپ كەلەدى. Linde كومپانياسىنىڭ كارباميد وندىرىسىنە ارنالعان گازدى تولىق وڭدەۋ جوباسىن جۇزەگە اسىرۋ بۇل ىسكە تىڭ سەرپىن بەرەدى. ينۆەستيتسيانىڭ جالپى كولەمى 1,4 ميلليارد تەڭگەگە باعالانىپ وتىر», دەدى پرەزيدەنت.
مەملەكەت باسشىسىنىڭ پىكىرىنشە, كومىرسۋتەگى شيكىزاتىن جەتكىزۋ, جاھاندىق ازىق-ت ۇلىك قاۋىپسىزدىگىن كۇشەيتۋ, كولىك-ترانزيت جانە قارجى سالالارىنداعى كووپەراتسيا ءوزارا قارىم-قاتىناستىڭ باسقا دا باسىم باعىتتارىنىڭ قاتارىنا كىرەدى.
پرەزيدەنت كەزدەسۋگە قاتىسۋشىلاردىڭ نازارىن ورنىقتى دامۋ جانە جاسىل ەكونوميكا سالالارىندا بىرلەسە جۇمىس ىستەۋدىڭ ماڭىزدىلىعىنا اۋداردى. – قازاقستان ايماقتىق كليمات ماسەلەسىن ىلگەرىلەتۋگە جان-جاقتى اتسالىسۋعا دايىن. ءبىز نەمىس سەرىكتەستەرىمىزدى 2026 جىلى بۇۇ اياسىندا قازاقستاندا وتەتىن ايماقتىق كليماتتىق سامميتكە قاتىسۋعا شاقىرامىز. ءبىز 2060 جىلعا قاراي كومىرتەگى بەيتاراپتىعىنا قول جەتكىزۋ جونىندە مىندەتتەمە الدىق. الايدا ول ءۇشىن بىزگە ەكونوميكانى ايتارلىقتاي جاڭعىرتىپ, «جاسىل» تەحنولوگياعا 600 ميلليارد دوللاردان استام ينۆەستيتسيا تارتۋ قاجەت, – دەدى قاسىم-جومارت توقاەۆ.
پرەزيدەنت ءسوز سوڭىندا اتالعان كەزدەسۋدىڭ قورىتىندىسى ورتالىق ازيا ەلدەرى مەن گەرمانيا اراسىنداعى ەكونوميكالىق ىنتىماقتاستىقتىڭ كوكجيەگىن كەڭەيتەتىنە سەنىم ءبىلدىردى.