تۇركىستاندا ءى دارەجەلى «بارىس» وردەنىنىڭ يەگەرى, قر ەڭبەگى سىڭگەن سپورت شەبەرى, سيدنەي وليمپياداسىنىڭ جەڭىمپازى بەكزات ساتتارحانوۆتى ەسكە الۋعا ارنالعان ءداستۇرلى رەسپۋبليكالىق تۋرنير باستالدى, دەپ جازادى Egemen.kz.
قالا اكىمى نۇربول تۇراشبەكوۆ ءتۋرنيردىڭ اشىلۋ سالتاناتىندا سپورتشىنىڭ اناسىنا قۇرمەت ءبىلدىرىپ, قاتىسۋشىلارعا جەڭىس تىلەدى, جاتتىقتىرۋشىلاردى ماراپاتتادى.
بەكزات ساتتارحانوۆتىڭ اناسى, تۇركىستان قالاسىنىڭ قۇرمەتتى ازاماتى سىرلىكۇل شويبەكوۆا ۇلىنىڭ جەتىستىكتەرى تۋرالى ەستەلىك ايتىپ, ءتۋرنيردى ۇيىمداستىرۋشىلارعا انالىق العىسىن ءبىلدىردى.
رەسپۋبليكالىق دودادا بيىل قولعاپ تۇيىستىرەتىن 2010-2011 جىلعى جاسوسپىرىمدەر اراسىندا مىقتىلارى انىقتالادى. 175 سپورتشى سايىساتىن جارىس ءۇش كۇن بويى وتەدى.