اۋداندار مەن وبلىستىق ماڭىزى بار قالالار اكىمدەرىن سايلاۋ جونىندەگى ناۋقاندى ۇيىمداستىرۋ جانە وتكىزۋ اياسىندا 26-29 قىركۇيەك ارالىعىندا ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ جانە وسك مۇشەلەرى ءسابيلا مۇستافينا مەن اناستاسيا ششەگورتسوۆا سولتۇستىك قازاقستان, اقمولا جانە شىعىس قازاقستان وبلىستارىنا باردى.
ينسپەكتسيالىق ساپارلاردىڭ نەگىزگى ماقساتى – الداعى اكىمدەردى تىكەلەي سايلاۋدى وتكىزەتىن اۋداندىق سايلاۋ كوميسسيالارىنا باسا نازار اۋدارا وتىرىپ, وڭىرلىك سايلاۋ ورگاندارىنا ادىستەمەلىك كومەك كورسەتۋ جانە وقىتۋ. ينسپەكتسيالىق ساپار بارىسىندا ازاماتتاردى ناۋقان كەزەڭدەرى مەن داۋىس بەرۋ كۇنى تۋرالى اقپاراتتاندىرۋ ماسەلەسىنە ەرەكشە نازار اۋدارىلدى.
سولتۇستىك قازاقستان وبلىسىنا ساپارى كەزىندە وسك توراعاسىنىڭ ورىنباسارى كونستانتين پەتروۆ سەمينار-كەڭەستەردىڭ جۇمىسىنا قاتىستى. جيىندا وبلىستىق ءماسليحات دەپۋتاتتارى اكىمدەردى سايلايتىن ءۇش اۋداندى انىقتاعان. ولار: ەسىل, تيميريازەۆ جانە ءماملۇت.
كەڭەس بارىسىندا سونداي-اق اۋماقتىق سايلاۋ كوميسسيالارى, اۋدانداردىڭ جەرگىلىكتى اتقارۋشى جانە قۇقىق قورعاۋ ورگاندارىنىڭ وكىلدەرى سايلاۋعا دايىندىق تۋرالى باياندادى. ولار سايلاۋ ناۋقانىنىڭ نەگىزگى ەرەكشەلىكتەرى, سايلاۋدى ۇيىمداستىرۋدان باستاپ داۋىس بەرۋ كۇنىنە دەيىنگى سايلاۋ راسىمدەرى, اكىمگە كانديداتتاردى ۇسىنۋ جانە تىركەۋ ءتارتىبى, سايلاۋ الدىنداعى ۇگىت جۇرگىزۋ, ۋچاسكەلىك سايلاۋ كوميسسيالارىنىڭ سايلاۋعا دايىندىق كەزەڭىندە جانە ونى وتكىزۋ كۇنىندەگى قىزمەتىن ءتۇسىندىرىپ ءوتتى.
سەمينار-كەڭەستەردىڭ قورىتىندىسى بويىنشا وسك توراعاسىنىڭ ورىنباسارى ك.پەتروۆ اۋداندىق سايلاۋ كوميسسيالارى مۇشەلەرى مەن ۋچاسكەلىك سايلاۋ كوميسسيالارى توراعالارىنىڭ سۇراقتارىنا جاۋاپ بەردى.
ال وسك مۇشەسى ءسابيلا مۇستافينا اۋماقتىق سايلاۋ كوميسسيالارىنىڭ اقمولا وبلىسىنداعى ۋچاسكەلىك سايلاۋ كوميسسيالارىنىڭ توراعالارىن, توراعالارىنىڭ ورىنباسارلارى مەن حاتشىلارىن وقىتۋعا قاتىستى. ءماسليحاتتار سايلاۋ وتەتىن بەس ايماقتى – اقكول, استراحان, جاقسى, ەسىل جانە شورتاندى اۋداندارىن بەلگىلەگەن.
وقىتۋ سەمينارلارى شەڭبەرىندە وتكىزىلگەن «داۋىس بەرۋ كۇنى» ىسكەرلىك ويىنى بارىسىندا داۋىس بەرۋ كۇنىنىڭ بارلىق كەزەڭدەرى ەگجەي-تەگجەي قارالدى. سونىمەن قاتار ۋسك مۇشەلەرى ءۇشىن سايلاۋعا قاتىسۋشىلاردىڭ قۇقىقتارى مەن مىندەتتەرى تۋرالى كەيس تاپسىرمالار دايىندالدى, داۋىس بەرۋ كۇنى تۋىندايتىن ستاندارتتى ەمەس جاعدايلار مودەلدەنىپ, ولاردى شەشۋ ادىستەرى ءتۇسىندىرىلدى. سەمينارلار قورىتىندىسى بويىنشا وقۋعا قاتىسۋشىلار سايلاۋ زاڭناماسىن بىلۋگە تەستىلەۋدەن ءوتتى.
شىعىس قازاقستان وبلىسىنىڭ ءماسليحاتتىڭ شەشىمىمەن اكىمدەردىڭ العاشقى تىكەلەي سايلاۋى وتەتىن التاي جانە گلۋبوكوە اۋداندارىندا وسك مۇشەسى اناستاسيا ششەگورتسوۆانىڭ قاتىسۋىمەن سايلاۋدى دايىنداۋ جانە وتكىزۋ بويىنشا كوشپەلى سەمينار-كەڭەستەر ۇيىمداستىرىلدى.
سەمينارلاردا جەرگىلىكتى اتقارۋشى ورگاندار مەن پروكۋراتۋرا وكىلدەرى ءسوز سويلەپ, سايلاۋعا دايىندىق جانە ناۋقاندى وتكىزۋ كەزەڭىندە زاڭدىلىقتى ساقتاۋ بويىنشا اتقارىلعان جۇمىستار تۋرالى باياندادى.
سايلاۋ كوميسسياسىنىڭ مۇشەلەرى ءۇشىن ىسكەرلىك ويىن وتكىزىلىپ, ۋچاسكەلىك سايلاۋ كوميسسيالارى مۇشەلەرىنىڭ داۋىس بەرۋ كۇنى ءتيىستى ءىس-قيمىل الگوريتمىمەن جۇمىسى كورسەتىلدى. وقىتۋ ترەنينگتەرىنە 500-دەن اسا سايلاۋ كوميسسيالارىنىڭ مۇشەسى قاتىستى.
سەمينار بارىسىندا ا.ششەگورتسوۆا ازاماتتاردى سايلاۋ ناۋقانىنىڭ بارىسى تۋرالى باق جانە الەۋمەتتىك جەلىلەر ارقىلى عانا ەمەس, باسقا دا كوممۋنيكاتسيا قۇرالدارى ارقىلى ۋاقىتىلى حاباردار ەتۋدىڭ ماڭىزدىلىعىن ەرەكشە اتاپ ءوتتى.
بۇدان باسقا, وسك ينتەرنەت-رەسۋرسى ارقىلى اكىمدەر سايلاۋىن ۇيىمداستىرۋعا جانە وتكىزۋگە تارتىلعان اۋماقتىق جانە ۋچاسكەلىك سايلاۋ كوميسسيالارىنىڭ مۇشەلەرىنە قاشىقتان وقىتۋ جانە تەستىلەۋ ۇيىمداستىرىلادى. سونداي-اق ەلەكتورالدىق وقىتۋ ورتالىعىنىڭ بازاسىندا بارلىق وبلىستىڭ جانە 45 اۋداننىڭ جانە وبلىستىق ماڭىزى بار قالانىڭ اۋماقتىق سايلاۋ كوميسسيالارىنىڭ مۇشەلەرىنە ارنالعان بىرقاتار ونلاين-سەمينارلار جوسپارلانىپ وتىر.