ءدىنتانۋشى, تەولوگ, پسيحولوگ, استانا قالاسىنداعى «ىرىسكەلدى قاجى» مەشىتىنىڭ باس يمامى نۇرلان قاجى بايجىگىت ۇلى ءماجىلىس دەپۋتاتى رينات زايىتوۆتىڭ پىكىرىنە جاۋاپ بەردى, دەپ حابارلايدى Egemen.kz.
Instagram جەلىسىندە وتكەن تىكەلەي ەفير بارىسىندا وقىرمانداردىڭ ءبىرى «رينات زايىتوۆتىڭ پىكىرىنە قانداي ءۋاج ايتاسىز؟» دەگەن سۇراق قويدى.
«رينات باۋىرىمىزدىڭ ايتقان پىكىرىنە كوزقاراسىمدى كۇندە سۇرايدى. بۇگىنگى ەفيردە نۇكتە قويىپ, دوعارساق دەيمىن. رينات – قۇدايىن تانيتىن, اللا جولىنان بەزىنبەگەن ادام. اللاعا سەنەتىن, جۇرەگىندە جاراتقانى بار ازامات دەپ بىلەمىن. جالا جاپپاس بۇرىن سول سۇحباتتى تەرەڭدەي ءتۇسىنىپ, تولىققاندى كورىپ شىققان ءلازىم. ريناتتىڭ نە ايتقىسى كەلگەنىن ارىدان اڭعارۋ كەرەك. ومىردە كەڭىنەن ويلاعان ادام ەش ۋاقىتتا كەم بولمايدى. ءدىندى قورعايمىز دەپ بۇلاي بايبالام سالىپ, دۇرلىگۋدىڭ قاجەتى جوق. اللا تاعالا ءوزىنىڭ اسىل ءدىنىن ءوزى-اق قورعاپ, قورشاي الادى. ءدىندى جىبەرىپ, قۇراندى تۇسىرگەن جاراتۋشى يە ءوزى قورعان بولادى. ءسوز قۋىپ, بالە ىزدەۋشىلەر ودان دا ءوزىنىڭ وتباسىن, قارا باسىن قورعاپ الۋى كەرەك. ريناتتىڭ سۇحباتىندا «الاياقتاردىڭ 80 پايىزى ناماز وقيتىندار» دەگەنى ءسال ارتىقتاۋ بولار. ول وسى پىكىرىنىڭ ار جاعىندا ءبىزدىڭ ۇلتتىق قۇندىلىعىمىزعا, سالت-داستۇرىمىزگە, ادەت-عۇرپىمىزعا قارسى شىعۋدى كوزدەيتىن سالافيلىك اعىمداعىلاردان كەلەر قاۋىپتى ايتقىسى كەلدى دەپ ويلايمىن. سونى تۇسىنگەندەرىڭىز ابزال. قازاقتىڭ بالاسى ءبىرىن-ءبىرى تالاپ, اياققا تاپتاپ, اعات باسقانىن اڭدىپ وتىرعاننان ابىروي تاپپايمىز», دەدى نۇرلان اسانوۆ.