شىعىس قازاقستاندا ەڭبەك كۇنى كەڭ كولەمدە اتالىپ ءوتتى. «ەرتىس كونتسەرت» زالىندا وتكەن ماراپاتتاۋ راسىمىنە وبلىس اكىمى ەرمەك كوشەرباەۆ قاتىسىپ, ەڭبەگى سىڭگەن ازاماتتارعا العىسىن ايتتى.
ەڭبەك كۇنى قىركۇيەكتىڭ سوڭعى جەكسەنبىسىندە جىل سايىن اتالىپ ءوتىپ كەلەدى. بۇگىن دە بارلىق ەڭبەك ارداگەرى ماراپاتتالىپ, ايماق باسشىسى ەرمەك بەدەلباي ۇلى ەڭبەك جانە حالىقتى الەۋمەتتىك قورعاۋ مينيسترلىگى اتىنان «ەڭبەك ارداگەرى» مەدالىن توعىز ادامعا تابىس ەتتى.
– ەلىمىزدە جۇمىسشى مارتەبەسىن ارتتىرۋ ماقساتىندا ەڭبەك ادامى يدەياسىن ناسيحاتتاپ, ولارعا جان-جاقتى قولداۋ كورسەتۋگە ەرەكشە كوڭىل ءبولىنىپ جاتىر. مەملەكەت باسشىسى قاسىم-جومارت توقاەۆ اتاپ وتكەندەي, ناعىز ەڭبەك ادامى – ول ءىستىڭ ادامى. ياعني ءار ىسىنە, ءار قادامىنا جاۋاپكەرشىلىكپەن قارايتىن ادال ازامات. بەرەكە-بىرلىك پەن قاجىرلى ەڭبەكتىڭ ارقاسىندا مەملەكەتىمىزدى دامىتىپ, حالىقتىڭ جاعدايىن جاقسارتامىز. وبلىستاعى ءتۇرلى سالادا جۇمىس ىستەپ, كاسىبي مامان اتانعان ەڭبەك ادامدارىنا العىس ايتامىن. قاراپايىم جۇمىسشىلار قاۋىمىنا دەگەن قۇرمەتىمىز ءاردايىم جوعارى, – دەدى وبلىس اكىمى ە.كوشەرباەۆ.
سالتاناتتى ءىس-شارا اياسىندا الدىڭعى قاتاردان ورىن العان ەڭبەككەرلەر ساحناعا شاقىرىلدى. «كۇرشىم ورمان شارۋاشىلىعى» ورمانشىسى ورازعالي باقتياروۆ, تراكتوريست-ماشينيست پاۆەل ترەگۋب, اگرونوم ۆلاديمير لاريونوۆ, روست جشس جۇرگىزۋشىسى الەكساندر كولەسنيكوۆ, «تەرەزە» جشس باس ينجەنەرى قازىباي قادىربەكوۆ سىندى ازاماتتار «ەڭبەك ارداگەرى» مەدالىن يەلەندى.
جىل سايىن ەڭبەك كۇنىن اتاپ ءوتۋ قارساڭىندا وتباسىلار ءوڭىر اتىنان رەسپۋبليكالىق كونكۋرسقا قاتىسىپ وتىرادى. بۇل رەتتە «ەڭبەك جولى» دەپ اتالاتىن بايقاۋعا اۋشينوۆتەر اۋلەتى قاتىسىپ, جۇلدەلى ەكىنشى ورىنعا يە بولعان. سونىمەن قاتار «ۇزدىك ەڭبەك ديناستياسى» اتالىمىندا وسى اۋلەت توپ جارىپ, كوپشىلىك قۇتتىقتاۋىنا يە بولدى.
– ماماندىعىم العاشقى اسكەري دايىندىق ءپانىنىڭ مۇعالىمى بولعانىمەن, مەتاللۋرگ بولىپ قىزمەت ەتتىم. قازىر ريددەر قالاسىنداعى تاۋ-كەن مەتاللۋرگيا كەشەنىندە جۇمىس ىستەيمىن. شامامەن 13 جىلداي بولدى. اۋلەتىمىزدەگى العاشقى مەتاللۋرگ – اتام مالىك اۋشينوۆ. انامنىڭ ناعاشى اعالارى دا وسى جولمەن ءجۇرىپ, ءوز كەزىندە ءتۇرلى ماراپاتتارعا يە بولدى. سوناۋ 1973 جىلدان بۇگىنگە دەيىن الىپ قاراساق, اۋلەتىمىزدىڭ ەڭبەك ءوتىلىن قوسقاندا 181 جىلعا جەتەدى, – دەدى رينات ەربول ۇلى.
ء«وندىرىس سالاسىنىڭ ۇزدىك جاس مامانى» اتالىمى بويىنشا ساحناعا ءبىرىنشى بولىپ دارىن شاعىمانوۆ شاقىرىلدى. بۇدان سوڭ توڭازىتقىش جۇمىسشىسى گۇلجانات جۇمادىلقىزى, ريددەردەگى «ستال تەح سناب» جشس-دا توكار بولىپ ىستەيتىن ءمادي احمەتوۆ سەكىلدى ەڭبەگىمەن ەلەنگەن ازاماتتار ماراپاتقا يە بولدى.
ءىس-شارانىڭ رەسمي بولىگىنەن سوڭ ەڭبەككەرلەر ءان تىڭداپ, قۇلاق قۇرىشىن قاندىردى. اباي قايىربەك, جانات بيسەمباەۆ, ارنيكا بايبۋسىنوۆا, بوتاگوز جۇمابەكوۆا «وتان» ءانىن شىرقاپ, «تۇران» فولكلورلى ءانسامبلى مەن «التاي» حالىق بي ءانسامبلى «قاراجورعا» ءبيىن تارتۋ ەتتى. سوڭىندا «ەرتىس كونتسەرت» شىعارماشىلىق ۇجىمى ەسكەندىر حاسانعاليەۆتىڭ «اتامەكەن» ءانىن شىرقاپ, كوپشىلىكتىڭ قۇرمەتىنە يە بولدى.
شىعىس قازاقستان وبلىسى