ەۋرازيالىق دامۋ بانكىنىڭ (ەادب) قازاقستانعا سالعان ينۆەستيتسيالارىنىڭ كولەمى 2022-2026 جىلدارعا ارنالعان ستراتەگيانى ىسكە اسىرۋدىڭ العاشقى ەكى جىلىنىڭ قورىتىندىسى بويىنشا جوسپاردان 70%-عا ارتىپ, $2,2 ملرد-تان اسۋى مۇمكىن. بۇل تۋرالى پرەمەر-مينيستر ءاليحان سمايىلوۆتىڭ بانكتىڭ باسقارما توراعاسى نيكولاي پودگۋزوۆپەن كەزدەسۋى بارىسىندا بەلگىلى بولدى, دەپ حابارلايدى Egemen.kz.
نيكولاي پودگۋزوۆ قازاقستان ەادب-دەن تارتىلعان ينۆەستيتسيالار كولەمى بويىنشا كوش باستاپ تۇرعانىن اتاپ ءوتتى. ءتۇرلى سالالاردا $5,6 ملرد-قا 104 جوبا ىسكە اسىرىلدى. بۇل كۇن جانە جەل گەنەراتسياسىنىڭ قۇرىلىسى, وڭدەۋ سەكتورى, حيميا ونەركاسىبى كاسىپورىندارىن, جەو, كوشەلەردى جارىقتاندىرۋ جەلىلەرىن جاڭعىرتۋعا, سونداي-اق پويىزداردىڭ قۇرامداس بولىكتەرى پاركىن جاڭارتۋعا, اوك سەكتورى كومپانيالارىن دامىتۋعا, اۋەجايلار, ماگيسترالدىق گاز قۇبىرى قۇرىلىسىنا جانە ت. ب. قاتىستى.
بيىلعى ماۋسىم ايىندا ەۋروپا قايتا قۇرۋ جانە دامۋ بانكى, يسلام دامۋ بانكىمەن سەرىكتەستىكتە ەادب-نىڭ قارجىلاندىرۋىمەن سالىنعان ۇلكەن الماتى اينالما اۆتوموبيل جولى بويىنشا كولىك قوزعالىسى اشىلدى. قازىرگى ۋاقىتتا ەادب حالىقارالىق سەرىكتەستەرمەن بىرلەسىپ, الماتى اۋەجايىن كەڭەيتۋ مەن جاڭعىرتۋدى قارجىلاندىرىپ جاتىر. وعان قوسا «اياگوز – باقتى» ت/ج جەلىسى جانە قازاقستان-قىتاي شەكاراسىندا جاڭا شەكارا بەكەتىن سالۋ جوبالارىنىڭ پەرسپەكتيۆاسى دا جوعارى بولىپ وتىر. جاڭا ينفراقۇرىلىم جۇك اينالىمىن جىلىنا 20 ملن تونناعا ارتتىرۋعا مۇمكىندىك بەرەدى دەگەن بولجام بار.
سونىمەن قاتار بانك «استراحان – ماڭعىشلاق» ماگيسترالدىق سۋ قۇبىرىن رەكونسترۋكتسيالاۋعا جانە كەڭەيتۋ جوباسىنا دا قاتىسۋعا نيەتتى. جوبانىڭ الەۋمەتتىك ماڭىزى جوعارى ەكەنىن ەسكەرە وتىرىپ, ارنايى قارجىلاندىرۋ شارتتارىن ۇسىنۋ جوسپارلانىپ وتىر.
ءاليحان سمايىلوۆ ەادب-نىڭ رەسپۋبليكانىڭ ينفراقۇرىلىمدىق دامۋىنداعى ءرولى ماڭىزدى ەكەنىن جانە ەلىمىزدىڭ ۇلتتىق دامۋ ماقساتتارىن ەسكەرەتىن ءتاسىلىنىڭ دۇرىس ەكەنىن اتاپ ءوتتى.
ايتا كەتەيىك, ەۋرازيالىق دامۋ بانكى – ەۋرازيالىق كەڭىستىكتە ينۆەستيتسيالىق قىزمەتىن جۇزەگە اسىرىپ كەلە جاتقان حالىقارالىق قارجى ۇيىمى. 17 جىلدان استام ۋاقىت بويى ەادب قاتىسۋشى ەلدەردىڭ ەكونوميكالىق بايلانىستارىن نىعايتۋعا جانە كەڭەيتۋگە, سونداي-اق جان-جاقتى دامۋىنا جاردەمدەسىپ كەلەدى. ەادب-نىڭ جارعىلىق كاپيتالى $7 ملرد-تى قۇرايدى. ەادب پورتفەلىندەگى نەگىزگى ۇلەس كولىك ينفراقۇرىلىمى, تسيفرلىق جۇيەلەر, جاسىل ەنەرگەتيكا, اۋىل شارۋاشىلىعى, ونەركاسىپ جانە ماشينا جاساۋ سالالارىنداعى ينتەگراتسيالىق اسەرى بار جوبالارعا تيەسىلى. بانك ءوز جۇمىسىندا بۇۇ-نىڭ تۇراقتى دامۋ ماقساتتارىن جانە ESG قاعيداتتارىن باسشىلىققا الادى.