مەملەكەت باسشىسى بۇۇ ورنىقتى دامۋ ماقساتىنداعى سامميتتە ماجارستان پرەزيدەنتى كاتالين نوۆاكپەن تەڭ توراعالىق ەتتى. كوشباسشىلاردىڭ ءبىرىنشى سەسسياسىندا قازىرگى جاھاندانۋ زامانىندا ءارتۇرلى ءادىس-تاسىلدەردى, سىن-قاتەرلەردى مەڭگەرۋ, تۇراقتى دامۋعا بايلانىستى تاقىرىپتار كوتەرىلدى.
وسى رەتتە پرەزيدەنت قاسىم-جومارت توقاەۆ: «بۇل – وسكەلەڭ ۇرپاق ءۇشىن جاسالىپ وتىرعان بىردەن-ءبىر مۇمكىندىك. ەگەر مۇنى بارلىق مەملەكەتتەر قولعا الماسا, بۇۇ اياسىندا وسى ماسەلەلەر شەشىلمەسە, وندا كوپتەگەن ەلدەردىڭ دامۋ كورسەتكىشتەرى تومەندەيدى», دەگەن ەدى. 2015 جىلدان باستاپ بۇۇ وزدەرىنىڭ ينديكاتورىن ەنگىزدى. ياعني ورنىقتى دامۋ كورسەتكىشتەرى كىرىستىرىلدى. 2015 جىلدان 2030 جىلعا دەيىنگى بۇل ينديكاتوردىڭ 17 باعىتىن ءبىز ءوزىمىزدىڭ دامۋ باعىتىمىزعا قوستىق. سوعان سايكەس ەلدە ۇلەستىرۋشى كەڭەس قۇرىلدى. بۇعان قوسا بەس جۇمىس توبى جۇمىس ىستەي باستادى. سونداي-اق بۇۇ ينديكاتورىنىڭ ىشىنە ەلىمىز ءوزىنىڭ ينديكاتورىن جاسادى.
ەۋروپاداعى قاۋىپسىزدىك جانە ىنتىماقتاستىق جونىندەگى ۇيىمنىڭ 2022 جىلعى سامميتىندە ينديكاتور بويىنشا باقىلاۋ جاساۋ جۇمىستارىن كۇشەيتۋدى سۇراعان ەدى. سوعان سايكەس ەلدە ءماجىلىس پەن سەناتورلار اراسىندا ۇيلەستىرۋشى كەڭەس قۇرىلدى. ينديكاتورلاردىڭ ورىندالۋىن باقىلاۋ پارلامەنت دەپۋتاتتارىنا باعىتتالدى. وسى ورايدا ايتا كەتەتىنى ادام ءومىرىنىڭ ساپاسىن ارتتىرۋ, گەوساياسي قاقتىعىستارعا بايلانىستى شيەلەنىستەردەن اۋلاق بولۋ, ديالوگ ورناتۋ ءتۇرلى 17 سالاعا بايلانىستى ينديكاتور ورىندالاتىن بولسا, ارينە, ەلىمىزدىڭ الەۋەتى ارتادى. سامميتتە كوتەرىلگەن ماسەلەلەردىڭ كوبى وزەكتى.
بۇۇ ورتالىق ازياعا كوپ نازار اۋدارۋدا. سەبەبى رەسەي, قىتاي, يران, اۋعانستان سەكىلدى مەملەكەتتەردىڭ جانە ورتالىق ازيا حالقىنىڭ سانىنا بايلانىستى كوپتەگەن ماسەلە تۋىنداپ جاتىر. بۇل رەتتە بۇۇ قازاقستاندى بەيبىتشىلىك ديالوگ الاڭى رەتىندە كورەدى. پرەزيدەنتىمىز اۋعانستانعا بايلانىستى ايماقتىق حاب قۇرۋ تۋرالى ماسەلەنى كوتەرگەن ەدى. مۇندا ءبىلىم, يننوۆاتسيا, يندۋستريا, دەنساۋلىق سالاسىنداعى ماسەلەلەر جان-جاقتى قاراستىرىلادى. وسىلايشا, ورتالىق ازيادا تۇراقتى دامۋ كورسەتكىشتەرى باعىتتاعى ءىس-شارالار تۇزىلەدى.
عالياسقار سارىباەۆ,
سەنات دەپۋتاتى