باستالۋى باستالعانىمەن, اياقسىز قالعان قۇرىلىس كوپ شىعىستا. وعان ەلدىڭ ەتى ابدەن ۇيرەنىپ كەتتى مە, ەلەي بەرمەيتىن بولعان. قۇرىلىسقا, جولعا بولىنگەن قارجىنىڭ قايدا, قالاي جۇمسالعانىن قاداعالاۋ ءالسىز. ايتەۋىر, باسى – دارداي ءىستىڭ اياعى – قىلداي. جۋىقتا مارقاكول اۋىلىنداعى سپورتتىق نىساننىڭ قۇرىلىسى دا تۇرالاپ قالعانىن ايتىپ, جەرگىلىكتى جۇرت رەداكتسيامىزعا حابارلاسقان.
تۇرالاپ قالعانىمەن قويماي, جاڭا عيماراتتىڭ توزىپ بارا جاتقانى جانعا باتادى دەسەدى مارقاكولدىكتەر. شەكارانىڭ شەگەسىندەي بولىپ وتىرعان ەلگە مەملەكەت تاراپىنان تولىققاندى جاعداي جاسالماسا, كوشپەگەندە قايتەدى؟! جاعداي دەپ وتىرعانىمىز, ەڭ اۋەلى ءبىلىم, مەديتسينا, اۋىز سۋ, جول, جۇمىس ورىندارى تاعىسىن تاعى. ءدال قازىرگى تاڭدا مارقاكول وڭىرىندە بۇلاردىڭ تولىققاندى جۇزەگە اسىپ جاتقانى شامالى. باسقاسىن ايتپاعاندا, بالالاردىڭ بوس ۋاقىتىن وتكىزەتىن سپورتتىق نىسان ۋاقىتىلى اياقتالار ەدى عوي.
– اۋىلداعى سالىنا باستالعان سپورتتىق نىساننىڭ قۇرىلىسى اياقسىز قالدى. ەستۋىمشە, قارجى جوق. توقتاپ قالعان قۇرىلىس نىسانى ەندى توزىپ بارادى. قاراۋسىز جاتقان قۇرىلىستىڭ دۇنيەسىن ەل تاسىپ, اكەتىپ جاتىر. بىلايشا ايتقاندا, مەملەكەتتىڭ قىرۋار قارجىسى جەلگە ۇشتى. العاشىندا بالالارىمىز ەندى سپورتپەن اينالىسادى دەپ قاتتى قۋاندىق. ەندى قۇرىلىس جالعاسا ما, كىم ءبىلسىن؟! نەگىزى اۋىلعا ءبىر سپورتتىق نىسان كەرەك-اق, – دەيدى مارقاكول اۋىلىنىڭ تۇرعىنى اركادي بەيسەمبەكوۆ.
تۇرعىنداردىڭ تالاپ-ارىزىن ايتىپ, كۇرشىم اۋداندىق اكىمدىگىنە حابارلاستىق. ادەپكىدە دۇركىرەپ, كەيىننەن كىبىرتىكتەپ قالعان سپورتتىق نىساننىڭ قۇرىلىسى 2020 جىلى باستالىپتى. جوسپار بويىنشا 2021 جىلى پايدالانۋعا بەرىلۋ كەرەك ەكەن. بىراق بەرىلمەگەن.
– تاپسىرىس بەرۋشى – شىعىس قازاقستان وبلىسىنىڭ قۇرىلىس, ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى. مەردىگەر ۇيىم – «QazConstruction» جشس. نىساننىڭ قۇرىلىسى 6 مامىردان باستاپ توقتاعان. ماسەلەنى قۇزىرلى ورگانداردىڭ ءبارى بىلەدى, – دەيدى مارقاكول اۋىلدىق وكرۋگىنىڭ اكىمى رۋستەم كەمەشوۆ.
قىرۋار قارجى دەگەندەي, مەملەكەتتىك ساتىپ الۋ پورتالىندا مارقاكول اۋىلىندا سپورت نىسانىن سالۋ ءۇشىن 433 711 337 تەڭگە قارجى قاراستىرىلعان ەكەن.
– قازىر 390,0 ملن تەڭگە قاراجات يگەرىلدى. نىسان قۇرىلىسىنىڭ 90 پايىزى اياقتالدى. تولىق اياقتالۋى ءۇشىن ەندى 65,9 ملن تەڭگە قارجى قاجەت, – دەيدى كۇرشىم اۋدانى اكىمىنىڭ ورىنباسارى قايرات زاينولدابەك ۇلى.
ەگەر ماسەلە شەشىمىن تاۋىپ, سپورت نىسانى تولىق اياقتالسا, فۋتبول, ۆولەيبول, باسكەتبول, جەڭىل اتلەتيكا, كۇرەس, اۋىر اتلەتيكا, بوكس سىندى سپورت تۇرلەرىنەن ۇيىرمەلەر اشىلادى. ارينە, جاتتىقتىرۋشى مامان تابىلسا... ودان بۇرىن باستالعان ءىستى سوڭىنا دەيىن جەتكىزۋ قاجەت.
ايتقانداي, پرەزيدەنت قاسىم-جومارت توقاەۆتىڭ شەشىمىمەن مارقاكول ءوڭىرى جەكە اۋدان ستاتۋسىنا يە بولدى. دەمەك, اۋدان ورتالىعىندا سپورت نىسانىنىڭ قاڭىراپ تۇرمايتىنى انىق. الايدا كەشەننىڭ قاشان قولدانىسقا بەرىلەتىنىن ءدوپ باسىپ ايتۋ قيىن.
شىعىس قازاقستان وبلىسى,
كۇرشىم اۋدانى,
مارقاكول اۋىلى