بي تىلىندەگى ديالوگ

– ء«جاسوسپىرىم جانە ءولىم» – مەنىڭ سۇيىكتى بالەتتەرىمنىڭ ءبىرى. نەگە دە­سەڭىزدەر, مۇندا اكتەرلىك شەبەرلىكتى كور­سەتىپ, ىشتەگى ەموتسيالاردى شىعارۋعا بولادى. نەگىزى بۇل بالەت جاس جىگىتتىڭ ءوز-وزىنە قول جۇمساۋ الدىندا ونىڭ ويىندا بولعان دۇنيەلەردى بەينەلەيدى. سونداي كۇيزەلىستە بولعان جىگىتتىڭ ءحالىن بي ارقىلى جەتكىزۋ وتە اۋىر. الايدا بالەت ونەرى ماعان سونىسىمەن ۇنايدى جانە ول باسقالارىنان ايرىقشا تەحنيكاسىمەن ەرەكشەلەنەدى. بالەت ي.س.باحتىڭ مۋزىكاسىنا قويىلعان. بىراق اۋەن فون رەتىندە عانا ءجۇرىپ تۇرادى, سەبەبى ءىس-قيمىل وعان دالمە-ءدال ىلەستەيدى. سوندىقتان دايىندىق كەزىندە ءبىز سپەكتاكلگە مۋزىكاسىز دايىندالا بەرەمىز. قازىر ارىپتەسىم اناستاسيا ەكەۋمىز زالدا وسى قويىلىممەن تىڭعىلىقتى جۇمىس ىستەۋدەمىز. پرەمەراعا بىرنەشە كۇن قالعاندا رولان پەتيدىڭ اسسيستەنتى لۋيدجي بونينومەن بىرگە تاعى دايىن­دالىپ, سپەكتاكلدىڭ ءبىرىنشى كۇنى ونەرىمىزدى پاش ەتۋ ءۇشىن شۆەيتساريالىق كورەرمەندەردىڭ الدىنا شىعامىز, – دەدى باقتيار ادامجان.

رولان پەتيدىڭ ء«جاسوسپىرىم جانە ءولىم» ءبىر اكتىلى بالەتى العاش رەت 1946 جىلى 25 ماۋسىمدا پاريجدەگى «ەليسەي الابى» تەاترىندا كورسەتىلگەن. سودان بەرى ول الەمنىڭ كوپتەگەن ەلىندە قويىلدى. ونىڭ ءبىرى وسى – شۆەيتساريا ساحناسى. سamerata Venia جانە Geneva Dance Events ۇجىمدارىنىڭ ۇيىم­داستىرۋىمەن وتەتىن بىرەگەي گالا-كەش جەنەۆاداعى باتيمەنت دەس فورسەس موتريسەس تەاترىنىڭ ساحناسىندا كورەرمەنىن قۋانتادى. ايتۋلى بالەت­تىڭ پرەمەراسىندا ونەر كورسەتۋگە ەلىمىزدىڭ ۇزدىك ارتىستەرىن ارنايى شاقىرىپ وتىر.

اتاپ ايتساق, باستى رولدەگى باقتيار ادامجان ء«جاسوسپىرىم جانە ءولىم» بالەتىندە ءبىرىنشى جىل ونەر كورسەتىپ جاتقان جوق. ال ونىڭ ساحناداعى جۇبى, تەاتر ءسوليسى اناستاسيا زاكلينسكايا وسىناۋ حورەوگرافيا جاۋھارىمەن كورەرمەن قاۋىمنىڭ الدىنا العاش رەت شىعادى.

– ارىپتەسىم باقتيار ەكەۋمىز رولان پەتيدىڭ ء«جاسوسپىرىم جانە ءولىم» دەپ اتالاتىن ءبىر اكتىلى بالەتىن بيلەي­مىز. مەن جاسوسپىرىمگە بويجەتكەننىڭ بەينەسىندە كەلەتىن ءولىمنىڭ ءرولىن سومدايتىن بولامىن. اتالعان پارتيانى تانىمال بالەرينالار ورىندايتىندىقتان جانە ءوزىم بۇل رولمەن ساحناعا العاش رەت شىعايىن دەپ جاتقاندىقتان ەكى ەسە قوبالجۋ بار. ءوز زامانىنىڭ ءبىرتۋار حورەوگرافى رولان پەتيدىڭ وسىنداي اڭىزعا اينالعان قويىلىمىندا ءوزىمدى سىناپ كورەتىنىمە وتە قۋانىشتىمىن. بۇل – مەن ءۇشىن ۇلكەن جاۋاپكەرشىلىك, – دەگەن تالانتتى ءبيشى اناستاسيا زاكلينس­كايانىڭ ءسوزىن ساحنالىق سەرىكتەسى تەاتر پرەمەرى باقتيار ادامجان:

– ەندى بۇل بالەت ءوزىمىزدىڭ «استانا وپەرا» تەاترىندا دا قويىلسا دەگەن ارما­نىم بار. كورەر­مەن­دەردىڭ دە وسى سپەكتاكلمەن تانىس­قانىن, ونىڭ تەاتر رەپەرتۋارىندا بولعانىن قالايمىن. سوندىقتان الەمدەگى ءتۇرلى سپەكتاكلدەردە ونەر كورسەتە وتىرا, شەتەلدەگى بالەت كەشتە­رىنە ترۋپپاداعى ارىپتەستەرىمدى دە بىرگە الىپ بارۋعا تىرىسامىن. سەبەبى ۇجىمدا وسى بالەتتى بيلەيتىن ارتىستەر بارىنشا كوپ بولسا, سپەكتاكلدىڭ ءبىزدىڭ ساحنادا كورسەتىلەتىنىنە سەنىم مول بولادى, – دەپ ساباقتادى.

ايتۋلى ونەر وقيعاسى ەلوردا تەاترىنىڭ نەگىزگى جاڭالىعى ەمەس. سونىمەن قاتار جاڭا ماۋسىمدا «استانا وپەرا» بالەت ترۋپپاسىنىڭ ارتىستەرىن گەرمان لەۆەنسكولدتىڭ «سيلفيدا» بالەتىندە تاماشا تاجىريبە كۇتەدى. شارتاراپتى بەكزات ونەر شاراپاتىنا شومىلدىراتىن مازمۇندى گاسترولدىك ساپارلار دا تەاتردىڭ كاسىبي تىنىسىن اشاتىن جارقىن جوبالار ساناتىندا. بۇدان بولەك, ارتىستەردىڭ جەكە گاسترولدەرى دە ءوز جالعاسىن تابادى دەپ جوسپارلانىپ وتىر. اتاپ ايتساق, جاقىن كۇندەرى باقتيار ادامجان وڭتۇستىك كورەيا استاناسى سەۋلدە Star Gala-دا, اقش-تىڭ سان-فرانتسيسكو قالاسىندا Petipa Awards ماراپاتىن تابىستاۋ راسىمىندە, سونىمەن قاتار كيپر جانە باسقا دا ەلدەردە ونەرىن پاش ەتەدى.