بالۋاندار ۇزدىك بەستىك قاتارىندا

دۋناي مەن ساۆا وزەندەرىنىڭ توعىسقان جەرىندە ورنالاسقان بەلگراد قالاسىندا جالاۋى جەلبىرەگەن جارىس قازاقستان قۇ­راماسى ءۇشىن ءساتتى اياقتالدى دەپ اي­تۋعا تولىق نەگىز بار. ويتكەنى ەلىمىزدىڭ ەركىن كۇ­رەس شەبەرلەرى ءوز تاريحىندا تۇڭعىش رەت الەم چەمپيوناتىنىڭ باس جۇلدەسىنە قول جەتكىزدى. كەزىندە بۇل – ابىلسەيىت ايحانوۆ, امانجول بۇعىباەۆ, امانكەلدى عابساتاروۆ ارمانداعان اسۋ ەدى. كەڭەس وداعىنىڭ سولاقاي ساياساتىنىڭ سالدارىنان اسىل اعالارىمىزعا دۇنيەجۇزىلىك دودالاردا باق سىناۋ باقىتى بۇيىرمادى. بۇل – ماۋلەن مامىروۆ پەن يسلام بايرامۋكوۆ, اقجۇرەك تاڭاتاروۆ پەن نۇرلان بەكجانوۆ, داۋلەت نيازبەكوۆ, داۋرەن جۇماعازيەۆ, نۇريسلام ساناەۆ, قورلان جاقانشا, دانيار قايسانوۆ, نۇرقوجا قايپانوۆ باستاعان بەلدى با­لۋاندارعا باعىنباعان بيىك بەلەس ەدى. سونىڭ ۇشار شىڭىنا 19 جاستاعى قازاق­تىڭ ءور مىنەزدى ۇلى ريزابەك ايتمۇحان كوتەرىلدى. تاريحي جەڭىس!

ۇندەمەي ءجۇرىپ, ۇلكەن ءىس تىندىراتىن ازامات داۋلەتبەكوۆ قاتارىنان ەكىنشى مارتە الەم چەمپيوناتىنىڭ قولا مەدالىن موينىندا جارقىراتتى. الاش جۇرتى ءۇشىن بۇل جۇلدەنىڭ دە ءجونى بولەك. مەيرامبەك قارتباي (57 كيلو) مەن بولات ساقاەۆ (79 كيلو) قولا مەدال ءۇشىن تالاس­تى. بىراق اتاقتى قارسىلاستارىنا جول بەرىپ, بەسىنشى ورىندى قاناعات تۇتتى. وسى دەرەكتەردىڭ ءوزى-اق بىلتىر عانا ۇلت­تىق كوماندامىزدىڭ باس باپكەرى بولىپ تاعايىندالعان ماديار قۇرامىسوۆتىڭ قىسقا عانا مەرزىمدە جاقسى كوماندا جاساقتاعانىن اڭعارتىپ تۇر.

جارىستىڭ سوڭعى كۇنى تاعى ەكى سالماق دارەجەسى بويىنشا ءتۇرلى-ءتۇستى مەدالدەر ساراپقا سالىندى. وكىنىشكە قاراي, ءادىل وسپانوۆ (65 كيلو) پەن الىشەر ەرعالي (97 كيلو) ەل سەنىمىن اقتاي المادى. ءادىل تۇساۋكەسەر كەزدەسۋىندە الەم چەمپيوناتىنىڭ ەكى دۇركىن قولا جۇلدەگەرى, ەۋروپا چەمپيونى يسمايل مۋسۋكاەۆتان ۇتىلدى. ماجارستاننىڭ تۋى استىندا ونەر كورسەتىپ جۇرگەن بالقار بالۋانى فينالعا شىعىپ, سونىڭ ارقاسىندا جەرلەسىمىز جۇبانىش باسەكەسىندە بەلدەستى. وليمپيا ويىندارى مەن الەم بىرىنشىلىگىنىڭ جەڭىمپازى تاكاتو وتوگۋرو وسپانوۆپەن كۇرەسۋدەن باس تارتتى. بىراق كوپ كەشىكپەي قازاق سپورتشىسى رەسەيلىك ءشامىل ما­مەدوۆتەن ۇتىلدى. ال الىشەر العاشقى اينالىمداردا قىتايلىق قانداسىمىز ءابۋسايمان حابيلا مەن ۇندىستاندىق سانيل ءسانيدى سان سوقتىرعانىمەن, شيرەك فينالدا الەم چەمپيوناتىنىڭ قولا جانە ەۋروپا ويىندارىنىڭ كۇمىس جۇلدەگەرى, قۇرلىق چەمپيونى گرۋزيالىق گيۆي ماچاراشۆيليدەن جەڭىلدى.

ەڭ سوڭعى ەكى سالماقتا مىنا بالۋان­دار جۇلدەلى ورىنداردى يەلەندى: 65 كيلو – 1. يسمايل مۋسۋكاەۆ (ماجارستان), 2. سەباستيان ريۆەرا (پۋەرتو-ريكو). 3. ءشامىل مامەدوۆ (رەسەي) پەن ۆازگەن تەۆانيان (ارمەنيا). 97 كيلو – 1. احمەد تاجۋدينوۆ (باحرەين). 2. ماگومەدحان ماگومەدوۆ (ازەربايجان), 3. كايل سنايدەر (اقش) مەن گيۆي ماچاراشۆيلي (گرۋزيا).

ەركىن كۇرەستەن وتكەن جارىستىڭ جالپىكوماندالىق ەسەبىندە اقش-تىڭ اپايتوستەرى الدارىنا جان سالمادى. ولار 3 التىن, 1 كۇمىس جانە 3 قولا مەدال ولجالادى. ەكىنشى ورىندى رەسەي (2+1+1) يەلەنسە, ءۇشىنشى ساتىعا يران (1+2+1) جايعاستى. ءتورتىنشى جانە بەسىنشى ورىنداردى قازاقستان مەن سەربيا (1+0+1) ءوزارا ءبولىستى. التىنشى جانە جەتىنشى ساتى­لارعا باحرەين مەن ماجارستان (1+0+0) تۇراقتادى. سونداي-اق جۇلدەگە قول جەتكىزگەندەر قاتارىندا گرۋزيا (0+2+2), ازەر­بايجان (0+2+0), جاپونيا (0+1+1), پۋەرتو-ريكو (0+1+0), ارمەنيا (0+0+3), تۇركيا (0+0+2), البانيا, قىرعىزستان, بولگاريا, ۋكراينا جانە سان-مارينو قۇرامالارى (0+0+1) بار.

ال جولدامالار جايىندا ايتار بولساق, اقش پەن رەسەيدىڭ – ءتورت, يراننىڭ – ءۇش, سەربيا, جاپونيا, گرۋزيا, تۇركيا جانە ارمەنيانىڭ ەكى بالۋانى كەلەسى جىلى پاريجدە الاۋى تۇتاناتىن وليمپيا ويىن­دارىنا قاتىسۋ قۇرمەتىنە يە بولدى. قازاقستان قۇراماسىنا ءبىر عانا ليتسەنزيا بۇيىردى. ونىڭ يەگەرى – 86 كيلو سالماقتا كۇش سىناسقان ازامات داۋلەتبەكوۆ. سان-مارينو, وزبەكستان, البانيا, گرەكيا, پۋەرتو-ريكو, ماجارستان, باحرەين جانە ازەربايجاننىڭ وكىلدەرى دە جالقى جولدامانى قالتاعا باستى. الدا ءالى ەكى بىردەي ليتسەنزيالىق تۋرنير وتەدى. ءبىزدىڭ بالۋاندار سول ولقىلىقتىڭ ورنىن قۇرلىقتىق نەمەسە الەمدىك ىرىكتەۋ تۋرنيرلەرىندە تولتىرادى دەپ ۇمىتتەنەمىز.

ەركىن كۇرەس شەبەرلەرىنىڭ جارىسى ءتامامدالار تۇستا ايەلدەر كۇرەسىنەن باسە­كەلەر باستالدى. بوز كىلەمگە شىق­قان مارال تاڭىربەرگەنوۆا (50 كيلو) مەن ان­كارا جاڭاتاەۆا (76 كيلو) تۇساۋ­كەسەر كەزدەسۋلەرىندە ءسۇرىندى. مارال ۇن­دىستاندىق نيلامعا, انكارا بەلورۋس­سيالىق اناستاسيا زيميانكوۆاعا جول بەردى. سول سەكىلدى اينۇر ءاشىموۆا (57 كيلو) وزبەكستاندىق ءلايلوحون سوبيروۆادان, ال يرينا كازيۋلينا (65 كيلو) ۋكراينالىق وكسانا حەرگەلگە ەسە جىبەردى.