قازاقستاندىقتاردىڭ قاي تەلەارنالاردى كوپ كورەتىنى انىقتالدى

ساۋالناما ەلىمىزدىڭ 17 وبلىسى مەن رەسپۋبليكالىق ماڭىزى بار قالالارىندا جۇرگىزىلدى. وعان قالا جانە اۋىلدىق ەلدى مەكەندەردە تۇراتىن جاسى 18-دەن اسقان ەكى مىڭ رەسپوندەنت قاتىستى. تۇرعىندار كونتەنت تۇتىنۋ تۋرالى 50 نەگىزگى سۇراققا جانە الەۋمەتتىك-دەموگرافيالىق سيپاتتاعى 8 سۇراققا جاۋاپ بەردى.

الەۋمەتتانۋلىق زەرتتەۋ ناتيجەسىندە تۇرعىندار اراسىندا ەلىمىزدەگى توپ-10 تانىمال تەلەارنا انىقتالدى. ءبىرىنشى ورىندا «كتك» تەلەارناسى, رەسپوندەنتتەردىڭ 35,7%-ى وسى تەلەارنانى تاڭداعان. ەكىنشى ورىندا «ەۋرازيا ءبىرىنشى ارناسى» (34,7%). «Qazaqstan» تەلەارناسىن 31,6% رەسپوندەنت  تاڭداعان. تۇرعىندار بۇل ارنالاردى نەگىزىنەن جاڭالىقتار, سپورتتىق ترانسلياتسيالار مەن سەريالدار كورۋ ءۇشىن قوسادى.

ال تەك قازاقتىلدى اۋديتوريا اراسىنداعى ساۋالناما ناتيجەسى بويىنشا, «Qazaqstan» تەلەارناسى ءبىرىنشى ورىندا (41,5%), «كتك» (36,6%) ارناسى ەكىنشى جانە «ەۋرازيا ءبىرىنشى ارناسى» (36,3%) ءۇشىنشى ورىندا تۇر.

رەسپوندەنتتەردىڭ 56,1%-ى «Qazaqstan» تەلەارناسىن سەنىمدى ارنا  رەتىندە  اتاعان. ارنانىڭ ەڭ تانىمال جوبالارىنىڭ قاتارىنا «Aqparat», «اپتا», «تاڭشولپان», «1001 ءتۇن», «قىزىق ەكەن» باعدارلامالارى ەندى.

بالالار كونتەنتىن تۇتىنۋ بويىنشا ەڭ جوعارى كورسەتكىش «Balapan» تەلەارناسىنىڭ ۇلەسىندە (36,4%). سونداي-اق توپ-3 تانىمال بالالار ارناسىنىڭ قاتارىن «Nickelodeon RU» (10,4%) جانە «مۋلت» (9,2%) تەلەارنالارى تولىقتىرادى.

زەرتتەۋ كەزىندە قازاقستاندىقتاردىڭ سپورتتىق ترانسلياتسيالاردى نەگىزگى ءۇش ارنادان ىزدەيتىنى انىقتالدى. ءبىرىنشى ورىندا «Qazsport» تەلەارناسى (39,6%) , ەكىنشى ورىندا «Qazaqstan» (18,1%) جانە ءۇشىنشى ورىندا «حابار» (12,2%) ارناسى.

قازاقستاندىقتاردىڭ 59,6%-ى اقپاراتتى تەلەارنالار ارقىلى الاتىنىن ايتقان. تانىمال كونتەنت تۇرلەرى: جاڭالىقتار (61,7 %), سەريالدار (41,2 %), ساياسي حابارلار (24, 4%) جانە ويىن-ساۋىقتىق جوبالار (22, 3%).  جاڭالىقتاردى كورۋ بويىنشا دا ۇزدىك ءۇش ارنانىڭ قاتارىندا «كتك» (40,3%), «ەۋرازيا ءبىرىنشى ارناسى» (37,5%) جانە «Qazaqstan» (36,3%)  ارناسى تۇر.

جالپى, بارلىق كورسەتكىشتەر بويىنشا تانىمال ارنالار رەيتينگىسىنە جوعارىدا اتالعان ءۇش تەلەارنامەن بىرگە «نتك» جانە «31 ارنا» ەندى.

ال ساۋالناما ناتيجەسىندە انىقتالعان تانىمال راديولاردىڭ ۇشتىگىندە  «جۇلدىز FM», «رۋسسكوە راديو ازيا» جانە «قازاق راديوسى» بار.