الماتىداعى ءبىلىم وشاقتارىندا قىركۇيەكتىڭ ورتا شەنىنەن باستاپ انا ءتىلىن ارداقتاۋعا شاقىراتىن ايشىقتى جوبالار سالتانات قۇرادى. ء«تىل مەرەكەسى» قارساڭىندا ۇزبەي وتەتىن ءداستۇرلى شارالار شوعىرى بيىل دا جالعاسىن تاپتى. قالانىڭ الاتاۋ اۋدانىنداعى №26 ورتا مەكتەپتە وتكەن «مەنىڭ ءتىلىم – ۇلى دالا رۋحى» اتتى رۋحاني-تانىمدىق كەشتىڭ كۋاسى بولىپ قايتتىق.
ساحنادا ءسان قۇرعان ورىمدەي ورەندەر اباي, ماعجان, قاسىم, مۇقاعالي شىعارمالارىن جاتقا وقىدى. الاش ارىستارىنىڭ ارمانىن ارقاۋ ەتكەن باسقا دا ولەڭ جىرلار ونە بويىڭىزدى شىمىرلاتپاي كورسىن. كىشكەنتاي جۇرەكتەردىڭ ءلۇپىلى, تۋعان تىلگە, وتانعا دەگەن سۇيىسپەنشىلىكتىڭ سالماعىن ارقالاپ تۇر دەرسىز. مەكتەپ وقۋشىلارى مەن ستۋدەنت جاستاردىڭ ءبىر ساحنادا توعىسۋىن تانىمدىق كەشتىڭ باستى ەرەكشەلىگى دەپ ايتار ەدىك.
ءال-فارابي اتىنداعى قازاق ۇلتتىق ۋنيۆەرسيتەتىنىڭ, ت.جۇرگەنوۆ اتىنداعى ونەر اكادەمياسىنىڭ ۇزدىك ستۋدەنتتەرى ءىزباسار ءىنى-قارىنداستارىنا انا ءتىلدىڭ قادىر-قاسيەتى, ۇلتتىق داستۇرلەردىڭ ۇلاعاتى تۋرالى ويلارىن ايتىپ, ءوز ونەرلەرىن ورتاعا سالدى. ونەر اكادەمياسىنىڭ ستۋدەنتتەرى التايدىڭ اسقاق جىرشىسى ورالحان بوكەيدىڭ «قاسقىر ۇلىعان تۇندە» شىعارماسىنان تەاترلاندىرىلعان كورىنىس قويسا, قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە وقيتىن اتالعان مەكتەپتىڭ تۇلەگى بىرلىك يبراھيم باستاعان ونەرلى جاستار ۇستازدار مەن وقۋشىلارعا ۇمىتىلماس مەرەكە سىيلادى.
– «تاربيە باسى – ءتىل» دەيدى ماحمۇد قاشقاري. جاڭا وقۋ جىلىنا ەرە كەلگەن ءتىل مەرەكەسى كوپۇلتتى مەملەكەتىمىزدىڭ بەرەكە-بىرلىگىن نىعايتاتىن, جاستاردى مەملەكەتشىلدىككە, ىزگىلىككە تاربيەلەيتىن ماڭىزدى كۇن. مەكتەبىمىزدە ءتىلىمىزدى دارىپتەۋ ماقساتىندا «وقۋعا قۇشتار مەكتەپ» جوباسى وقۋشىلار اراسىندا ادەمى ترەندكە اينالدى. بۇگىنگى ءىس-شارانى ۇيىمداستىرعان قازاق ءتىلى مەن ادەبيەتى ءپان بىرلەستىگىنىڭ ۇستازدارى بۇل جوبانى ۇيلەسىمدى جولعا قويدى. وقۋشىلار قازاق اقىن-جازۋشىلارىنىڭ شىعارمالارىن جارىسا وقىپ, تۇيگەن ويلارىن ءبىر-بىرىمەن ءبولىسىپ, ءماجىلىس زالىندا ءوزارا پىكىر الماسادى. وسىلايشا, ولار جىل سوڭىنا دەيىن توم-توم شىعارمالاردى تاۋىسىپ, ءوز ءتىل بايلىقتارىن دامىتىپ, ورىستەرىن كەڭەيتەدى. تاۋەلسىزدىك پەن ءتىل – ەگىز ۇعىم. بۇگىنگى ءىس-شارا شاكىرتتەرىمىزدى ءتىل تازالىعىن ساقتاۋعا, مادەنيەتتى سويلەۋگە, ءتىل جاناشىرى بولۋعا ۇندەيدى. وقۋشىلارعا جاقسى ۇلگى كورسەتسىن دەگەن نيەتپەن جوعارى وقۋ ورىندارىنىڭ ونەرلى جاستارىن ارنايى شاقىردىق, – دەيدى مەكتەپ ديرەكتورى گاليا سەيتاحمەتوۆا.
ءىس-شارا بارىسىندا باستاۋىش سىنىپ وقۋشىلارىنان قۇرالعان «الاۋ» توبى «انا ءتىلى» انىمەن كەش شىمىلدىعىن اشسا, مەكتەپتىڭ ونەرلى ورەنى شالقار سۇلەيمەنوۆ «جاسا قازاق ءتىلى» انىمەن جينالعانداردى ءتانتى ەتتى.
الماتى