وبلىس ورتالىعىندا اۋدانداردىڭ مادەني كۇندەرىن وتكىزۋ ءداستۇرى قايتا جانداندى. ءار اۋدان اپتانىڭ ءار سەنبىسى سايىن جارمەڭكە ۇيىمداستىرىپ, وسكەمەندىكتەرگە ءوز ونىمدەرىن ۇسىنادى, ونەرلەرىن ورتاعا سالادى. بۇل جولى ات ارىتىپ كەلگەن زايسان اۋدانى ەدى.
اۋەلى «ەرتىس كونتسەرت» زالىندا زايساندىق ونەرپازداردىڭ قاتىسۋىمەن «تۋعان جەر – التىن بەسىگىم» اتتى گالا كونتسەرت ءوتتى. مادەني شاراعا اقىن ۇلىقبەك ەسداۋلەت, كۇمىس كومەي ءانشى قانات, ايتكۇل قۇدايبەرگەنوۆتەر سىندى زايسان ءوڭىرىنىڭ ونەرلى تۋمالارى قاتىستى. دۇركىرەپ وتكەن كونتسەرتتەن كەيىنگى مادەني كۇن «Fresh Market» ساۋدا ورتالىعىنىڭ اۋلاسىنداعى جارمەڭكەگە ۇلاستى. مۇندا دا انشىلەر اننەن شاشۋ شاشىپ, بيشىلەرى مىڭ بۇرالا بي بيلەدى. سپورتتىق سايىستار دا ءوتتى. ايتا كەتەرلىگى, جارمەڭكەدە اۋىلشارۋاشىلىق ونىمدەرى حالىققا قولجەتىمدى باعادا ساتىلدى. جىلقى ەتىنىڭ كەلىسى 2 500 تەڭگەدەن ساتىلسا, سيىر ەتى 2 300 تەڭگەدەن ۇسىنىلدى. ال قوي ەتى 2 200 تەڭگەگە باعالاندى. ودان وزگە دە زايساننىڭ برەند ونىمدەرى سورەلەرگە قويىلدى. بارىنەن بۇرىن حالىقتى قىزىقتىرعانى جەمىس-جيدەك پەن كوكونىستەردەن جاسالعان ەرەكشە كومپوزيتسيا ەدى.
– ۇمىتىلىپ كەتكەن وسىنداي مەرەكەلەردىڭ قايتا جاڭعىرىپ, جالعاسىپ جاتقانىنا قۋانىشتىمىن. بۇل ءداستۇردىڭ بۇعاناسى بەكىپ, قاناتىن كەڭگە جايىپ, ونەرپازداردىڭ ورلەۋىنە جول اشادى دەپ ويلايمىن. جارمەڭكەگە وزدەرىنىڭ اق ادال ونىمدەرىن اكەلىپ, ويداعى ەل قىرداعى ەلمەن ارالاسىپ جاتقانىن كورۋ ءبىر مارتەبە, – دەيدى اقىن ۇلىقبەك ەسداۋلەت.
سونىمەن قاتار زايساننىڭ مادەني كۇندەرى اياسىندا ارباتتا دا سپورتتىق جارىستار ۇيىمداستىرىلعان. ساداق اتۋدان ءبىرىنشى ورىنعا ەرحان ەسىمدى جىگىت شىقسا, ءبىر قاپ كارتوپ كوتەرۋدە 9-سىنىپ وقۋشىسى جاسمين ەشكىمگە دەس بەرمەدى. ءتۇرلى سپورتتىق سايىستارعا بەلسەنە قاتىسقاندارعا كارتوپ, ۇن, قانت تارتۋ ەتىلدى.
شىعىس قازاقستان وبلىسى