ء«سوز اياقتالعان جەردە مۋزىكا باستالادى» دەگەنگە كەلىسپەسكە كەيدە لاجىڭ دا قالمايدى. راسىندا, مۇندا كوركەم ادەبيەتتەگىدەي وبراز دا جوق, كوزبەن كورىپ, سانامەن سەزىنەتىن بەينەلەۋ ونەرى دە ەمەس. ادام ايتا الماعان دۇنيەنى كەيدە مۋزىكا, ءان جەتكىزىپ جاتادى. كوڭىلدەگىنى تاپ باسىپ, وزگە ءبىر الەمگە جەتەلەي جونەلەتىن مۋزىكا قۇدىرەتى دە بولەك.
راسىندا, ەسترادالىق ءان دەسە كوپشىلىكتىڭ ويىنا بىردەن كوڭىل كۇي كوتەرەتىن جەڭىل ىرعاقتى شىعارمالار ورالاتىنى داۋسىز. شىن مانىندە, ولاي ەمەس قوي. ەسترادالىق جانرداعى اندەردىڭ دە ىشىندە كوڭىلدەگى شەردى قوزعايتىن, ادام جانىنا جىلۋ سىيلايتىن ەستى شىعارمالار از ەمەس. سولاردىڭ ءبىرى – ءسوزىن ءشومىشباي ساريەۆ, ءانىن كەڭەس دۇيسەكەەۆ جازعان «وكىنبە سەن» ءانى.
بەلگىلى ءانشى جۇبانىش جەكسەن ۇلىنىڭ ورىنداۋىندا جۇرتتىڭ جۇرەگىنە جەتكەن شىعارمانى كوپشىلىك جاقىندا جازىلعان تۋىندى دەپ پايىمدايتىنى راس. ويتكەنى جازىلعانىنا ەلۋ جىلعا جەتەعابىل ۋاقىت وتكەن ءاننىڭ جۇلدىزى ءا دەگەننەن جانا قويعان جوق. ورىنداۋشىسىن تابۋ دا وڭايعا تۇسپەگەن سىڭايلى. الايدا جارىققا شىقپاي كەتكەن تالاي تۋىندىعا قاراعاندا «وكىنبە سەن» ءانى اراعا جىلدار سالىپ بولسا دا, ويلى تىڭدارماننىڭ ولجاسىنا اينالدى.
ءانشىسىن تاپقان ءان قاي كەزدە دە تىڭدارماننىڭ جۇرەگىنەن ويىپ تۇرىپ ورىن الاتىنى داۋسىز. بۇگىندە جۇرت ءدال وسى «وكىنبە سەن» ءانىن جۇبانىش جەكسەن ۇلىنىڭ تولقۇجاتى دەپ تانيتىنى دا اقيقات. شىعارماعا جاڭا شىراي, سونى لەپ بەرگەن ءانشىنىڭ باعىن جاققان ءان دەپ ءدال وسى تۋىندىنى ايتسا دا بولادى. قالاي دەسەك تە, جۇبانىشتى «وكىنبە سەن» انىنەن, «وكىنبە سەندى» جۇبانىشتان ءبولىپ الا المايسىڭ. باسقا ءبىر ورىنداۋشى شىرقاسا دا بۇل ءاندى جۇبانىشتىڭ دەڭگەيىندە شىرقاي المايتىنداي كورىنەدى. بالكىم, ءبىزدىڭ سانامىزعا سولاي ءسىڭىپ قالعاندىقتان شىعار. ايتەۋىر ءوز بوياۋىمەن ەرەكشەلەنگەن جەكسەن ۇلىنىڭ جاعىمدى ءۇنى قۇلاققا مايداي جاعاتىنى ايداي اقيقات.
اسىلىندە «وكىنبە سەن» ءانى ماحاببات تاقىرىبىنداعى ناقتى ءبىر كەيىپكەرگە جازىلعان تۋىندى ما؟ الدە ۋاقىت وتە كەلە ءاننىڭ ماتىنىنە قانداي دا ءبىر وزگەرىس ەنگەن بە؟ ەستى شىعارمانى قۇلاق قويىپ تىڭداعان ادام ءا دەگەننەن مىنا ءبىر شۋماققا دەن قوياتىنى انىق.
«بار قىزىعىن ءومىردىڭ الا الماسسىڭ,
قۋانىش بوپ ماڭگىلىك جارالماسسىڭ.
جارقىراپ ايلى تۇندە جۇلدىزدارداي,
بالكىم, سەن باقىتىم بوپ جانا
الماسسىڭ»,
دەپ تۇيىندەلەتىن شۋماقتىڭ ءتورتىنشى تارماعىنداعى «باقىتىم بوپ جانا الماسسىڭ» دەگەن سوزدەر راسىندا دا ءاندى جالپىدان وقشاۋلاپ, جالقى وبرازعا نەگىزدەلگەن شىعارما ەتىپ كورسەتەتىنى راس. ويتكەنى مۇندا «باقىت» دەپ تۇرعان جوق, «باقىتىم» دەپ ناقتىلاپ تۇر.
اقيقاتىندا ءاننىڭ ماتىنىندە تەرەڭ ءمان-ماعىنا بار ەكەنى تالاس تۋدىرمايدى. ءبىرىنشى شۋماقتان باستاپ, ءاننىڭ قايىرماسى دا, شارىقتاۋ شەگى سانالاتىن سوڭعى شۋماعىنا دەيىن ءتورت اياعىن تەڭ باسقان تارماقتارىمەن ادام جانىن استان-كەستەن ەتەدى. تىڭدارمانىن ويلاندىرادى, تولعاندىرادى. قىسقاسى, قالاي دەسەك تە جۇرەكتەگى شوقتى مازداتا تۇسەدى. مۇنداعى تەرەڭ مازمۇن جۇبانىشتىڭ بوياۋى بولەك ۇنىمەن استاسقاندا ءتىپتى كەرەمەت اسەر ەتەتىنى داۋسىز.
جوعارىدا كەلتىرگەن سوڭعى شۋماقتاعى «باقىتىم بوپ جانا الماسسىڭ» دەپ تۇيىندەلەتىن تارماقتا ءبىر كىلتيپان بار سەكىلدى كورىنە بەرەتىن. راسىندا سولاي ەكەن...
كەرەك دەرەككە كوز جۇگىرتسەك, ورىنداۋشى جۇبانىش جەكسەن ۇلى ءاننىڭ ءدال وسى تارماعىن ءوز ىڭعايىنا قاراي وزگەرتكەن كورىنەدى. اۋەلدە ءماتىن اۆتورى, قازاقتىڭ ايتۋلى اقىنى ءشومىشباي ساريەۆ «بالكىم, سەن باقىت بولىپ جانا الماسسىڭ» دەپ ناقتىلاپ جازعان تارماقتى ءانشى ءاننىڭ ىرعاعىنا يكەمدەگىسى كەلدى مە, الدە باسقا ءبىر ويى بولدى ما, كىم ءبىلسىن؟ ايتەۋىر «بالكىم سەن باقىتىم بوپ جانا الماسسىڭ» دەپ ءبىرىنشى جاقتا ورىنداۋدى ءجون دەپ تاۋىپتى.
ەندى ءاننىڭ وزگە شۋماقتارىنا زەر سالىپ كورەيىكشى. مۇندا اۆتوردىڭ تۇپكى ويى نەگە نەگىزدەلگەن؟
«كۇنسىز بولماس دۇنيە, ءتۇنسىز بولماس,
ءتۇنسىز بولماس دۇنيە, كۇنسىز بولماس,
عاشىقتىق قۋانىش بوپ سەزىلگەنمەن,
ماحاببات ەشقاشان دا مۇڭسىز
بولماس»,
دەپ كەلەتىن ءاننىڭ العاشقى شۋماعىن تىڭداپ وتىرىپ-اق شىعارمانىڭ ءون بويىنان ناقتى ءبىر كەيىپكەردى كەزدەستىرە المايسىز.
قىسقاسى, ايتقاندا ءاننىڭ تابيعاتىنا قاراپ-اق شىعارما ءماتىنى تاپسىرىسپەن جازىلعانىن باعدارلاۋ قيىنعا سوقپايدى. سولاي بولا تۇرا تاماشا تۋىندى كۇللى قازاق دالاسىنداعى تىڭدارماننىڭ كوڭىلىنە قوندى. ويتكەنى ءاننىڭ بۇكىل تابيعاتى جۇبانىش جەكسەن ۇلىنىڭ داۋسىمەن ۇيلەسىم تاپتى. قازىرگىلەردىڭ تىلىمەن ايتساق ءاننىڭ فيشكاسىنا اينالعان قايىرماداعى «ومىرگە كەلگەنىڭە وكىنبە سەن» دەگەن تارماق كىمنىڭ دە بولسىن جادىنان وشپەيتىنى اقيقات.