«Kieli tabigat» ەكولوگيالىق اكتسياسى جامبىل وبلىسىندا دا جالعاستى. وڭىردەگى كيەلى جەرلەردى تازالاپ, قالپىنا كەلتىرۋ, قۇندىلىقتارعا قۇرمەتپەن قاراۋدى جاستاردىڭ بويىنا ءسىڭىرۋ ماقساتىندا وتكىزىلگەن سەنبىلىكتى وبلىس اكىمدىگى جاستار ساياساتى ماسەلەلەرى باسقارماسى جاستار قوعامدىق بىرلەستىكتەرىمەن بىرلەسە اتقاردى.
اكتسيا بارىسىندا بەلسەندى جاستار وڭىردەگى بارلىق تاريحي ورىندى تازالاۋ جۇمىسىنا جۇمىلا اتسالىستى. «تاريحى مىڭجىلدىقتارمەن استاسىپ جاتقان وڭىرىمىزدە قاسيەتتى ورىندار از ەمەس. اكتسيا اياسىندا جامبىلدىق جاستار ايشا ءبيبى, تاراز قالاسىنداعى قاراحان, بايزاقتاعى بايزاق داتقا, تۇرار رىسقۇلوۆ اۋدانىنداعى دۋلات بابا, جۋالىداعى باتىربەك داتقا, مويىنقۇمداعى كەرەي مەن جانىبەك كەسەنەسىن, سونداي-اق مەركى, تامدى, باركۋاب, بالاساعۇن (اقتوبە) قالاشىقتارى, وزگە دە كيەلى ورىنداردىڭ ماڭىن قوقىستان تازارتۋ جۇمىسىنا بەلسەندى قاتىستى», دەيدى وبلىس اكىمدىگى جاستار ساياساتى ماسەلەلەرى باسقارماسىنىڭ باسشىسى جومارت زۇلپىحار.
ءداستۇرلى تۇردە وتكىزىلىپ جۇرگەن اكتسيانى وڭىرلەردە جاستار رەسۋرستىق ورتالىقتارى ۇيىمداستىرعانىن اتاپ وتكەن ءجون. ورتالىق كەلتىرگەن دەرەككە سەنسەك, سەنبىلىككە 450-گە جۋىق جاس جۇمىلا قاتىسىپتى.
«كيەلى جەرلەردى كۇتىپ ۇستاۋ – بىزگە امانات. وڭىرىمىزدەگى تاريحي قالاشىقتاردى كورۋگە كەلەتىن تۋريستەر از ەمەس. ولار تاريحي ورىنداردىڭ اينالاسىن تازا ۇستاپ, قوقىس لاقتىرىپ كەتپەسە ەكەن دەيمىز. قورشاعان ورتاعا جاناشىرلىقپەن قاراۋ دا مادەنيەت. جۇرت وسىنى ەسىنەن شىعارماسا ەكەن», دەيدى ايشا ءبيبى كەسەنەسىنىڭ ماڭىن قوقىستان تازارتقان جاستار.