اتىراۋ وبلىسىمەن ەكونوميكالىق, ىسكەرلىك قارىم-قاتىناستى ورناتۋدى كوزدەگەن ەلدەر قاتارى ارتىپ كەلەدى. مۇنايلى وڭىرمەن الىس-بەرىستى, بارىس-كەلىستى نىعايتۋعا بەت بۇرعاندار ساۋدا-ەكونوميكالىق, ينۆەستيتسيالىق بايلانىستى دامىتۋدى كوزدەيدى.
ينۆەستيتسيا قۇيۋعا ىنتالى ينۆەستور كوپ. ءوزارا ىنتىماقتاستىقتى ودان ءارى نىعايتۋعا مۇددەلى تاراپتار ەكونوميكانىڭ بارلىق سەكتورىن, ونىڭ ىشىندە مۇناي-گاز ونەركاسىبى مەن قۇرىلىس يندۋسترياسىن, اۋىل شارۋاشىلىعىن, تۋريزم سالاسىن بىرلەسە وركەندەتۋدى قولاي كورەدى.
قويناۋى مۇناي مەن گاز, وزگە دە تابيعي بايلىققا تولى ءوڭىر مەن وزگە ەلدەر اراسىنداعى يمپورتتىڭ دا, ەكسپورتتىڭ كولەمى ازايعان ەمەس. وبلىس اكىمىنىڭ ورىنباسارى جاسۇلان بيسەمبيەۆتىڭ مالىمەتىنشە, بيىل ءۇش ايدا اقش-پەن اراداعى سىرتقى ساۋدا اينالىمى 50,1 ملن اقش دوللارىن قۇراعان. ونىڭ ىشىندە يمپورتتىڭ ۇلەسى باسىم – 49,6 ملن اقش دوللارى. ال ەكسپورتتىڭ كولەمى 436,9 مىڭ اقش دوللارىنا جەتكەن.
مۇنداي بايلانىس بالتىق جاعالاۋىنداعى ەلدەرمەن دە ورناعان. ماسەلەن, ارىپتەستىك قارىم-قاتىناستىڭ ناتيجەسىندە بەس ايدا اتىراۋ وبلىسى مەن ليتۆا اراسىنداعى سىرتقى ساۋدا اينالىمى 222,8 ملن اقش دوللارىنا جەتتى. قازىر مۇنايلى وڭىردە ترانسپورت, تاسىمال باعىتىندا ليتۆالىق ءۇش كاسىپورىن جۇمىس ىستەيدى. ەندى مۇندا ليتۆانىڭ قۇرمەتتى ەلشىلىگى اشىلدى.
مۇنايلى وڭىرگە قىزىعۋشىلىق تانىتقان ەلدەردىڭ قاتارىندا گرۋزيا دا بار. وبلىس اكىمى سەرىك شاپكەنوۆتىڭ مالىمەتىنشە, اتىراۋدا گرۋزيا رەسپۋبليكاسى كاپيتالىنىڭ قاتىسۋىمەن 16 كاسىپورىن تىركەلگەن. بۇل ەلمەن سىرتقى ساۋدا اينالىمى بيىلعى قاڭتار-مامىردا 396,9 مىڭ اقش دوللارىن قۇراعان. اتىراۋ قالاسىنان كۋتايسي باعىتىنا اپتاسىنا 3 اۋە رەيسى قاتىنايدى. بىلتىر اتىراۋ وبلىسىنىڭ 18 مىڭنان استام تۇرعىنى گرۋزياعا دەمالۋ ءۇشىن بارعان. ونىڭ 6 مىڭعا جۋىعى «Borjomi Palace» ساناتوريىندە ەم العان. ال بيىل ءتورت ايدا 10 مىڭعا جۋىق اتىراۋلىق اتالعان ەلگە ساياحاتتاعان.
ەندى اتىراۋ مەن بورجومي قالالارى اراسىنداعى ساۋدا-ەكونوميكالىق, ينۆەستيتسيالىق ىنتىماقتاستىقتى, تۋريزم سالاسىن بۇرىنعىدان دا جانداندىرۋعا باعىت ۇستالىپ وتىر. اتىراۋعا ارنايى كەلگەن بورجومي قالاسىنىڭ مەرى وتار ءاربوليشۆيليدىڭ پىكىرىنشە, ءبىرى مۇنايىمەن, ەكىنشى مينەرالدى سۋىمەن اتى ءمالىم شاھارلار باۋىرلاس بولۋى قاجەت.
«بىلتىر ءبىزدىڭ قالاعا قازاقستاننان 120 مىڭعا جۋىق ادام دەمالۋعا كەلدى. كۋتايسي اۋەجايىنا كەلگەن جولاۋشىلاردىڭ 80 پايىزى بورجومي قالاسىن تاڭدايدى. دەمالۋشىلاردىڭ اراسىندا اتىراۋلىقتار دا بار. ءبىز اتىراۋ قالاسىمەن باۋىرلاستىق قارىم-قاتىناس ورناتۋدى كوزدەدىك. سول سەبەپتەن, ەكى قالانىڭ باسشىسى بورجوميدە كەزدەسىپ, ىنتىماقتاستىق تۋرالى مەموراندۋمعا قول قويدى. مەموراندۋم – ءبىر-ءبىرىمىزدى قولداۋعا سەپتىگى تيەتىن دوستىق پەن ىنتىماقتاستىق قۇجاتى. بۇدان بىلاي ءبىزدىڭ قالاعا كەلەتىن اتىراۋلىقتار كوبەيەتىنىنە سەنىمدىمىن», دەيدى وتار اربوليشۆيلي.
اتىراۋ وبلىسى