استانادا الاياقتىق جاسادى دەگەن كۇدىكپەن تۇرعىن ءۇي كومپانيالارىنىڭ باسشىلىعى ۇستالدى, دەپ حابارلايدى Egemen.kz.
باس پروكۋراتۋرانىڭ مالىمەتىنشە, قىركۇيەك ايىنىڭ باسىندا قالا پروكۋراتۋراسىنىڭ نۇسقاۋى بويىنشا پوليتسيا دەپارتامەنتىنىڭ وندىرىسىنە «R-Club» جانە «R-Club Deluxe» تۇك ۇلەسكەرلەرىنىڭ ۇجىمدىق ارىزى نەگىزىندە الاياقتىق فاكتىسى بويىنشا قىلمىستىق ءىس بەرىلدى.
«ۇلەسكەرلەردىڭ 4 ملرد تەڭگەدەن استام اقشالاي قاراجاتى تارتىلعان, الايدا ءىس جۇزىندە قۇرىلىسقا 900 ملن تەڭگە جۇمسالعانى انىقتالدى. قۇرىلىس سالۋشى 2022 جىلدىڭ 4-ءشى توقسانىندا اياقتاۋعا ءتيىس قۇرىلىستى ۋاقىتىندا بىتىرمەگەن. قۇرىلىس كومپانيالارىنىڭ باسشىلارى ۇستالىپ, ولارعا «كۇزەتپەن ۇستاۋ» تۇرىندەگى بۇلتارتپاۋ شاراسى قولدانىلدى», دەپ جازىلعان ۆەدومستۆو حابارلاماسىندا.
اتالعان ءىس بويىنشا جەدەل-تەرگەۋ توبى قۇرىلدى.
قازىر قىلمىستىڭ قالعان قاتىسۋشىلارى مەن ولاردىڭ اكتيۆتەرى انىقتالىپ جاتىر.