پرەمەر-مينيستر ماەك-ءتىڭ جىلۋ بەرۋ ماۋسىمىنا دايىندىعىن تەكسەردى

پرەمەر-مينيسترگە «ماەك» جشس باس ديرەكتورى جاسۇلان سۇيىنشاليەۆ كاسىپورىننىڭ اعىمداعى دايىندىعى جانە ونى ودان ءارى جاڭعىرتۋ جوسپارلارى تۋرالى باياندادى. ماەك – ءبىرتۇتاس ەنەرگەتيكالىق جانە سۋ ءوندىرۋشى كەشەن, ونىڭ نەگىزگى مىندەتى – ماڭعىستاۋ جانە اتىراۋ ء(ىشىنارا) وبلىستارىن ەلەكتر ەنەرگياسىمەن, ال, اقتاۋ قالاسىن جىلۋ ەنەرگياسىمەن, اۋىزسۋمەن, ىستىق جانە تەحنيكالىق سۋمەن قامتاماسىز ەتۋ. مۇنداعى توتەنشە جاعدايلارعا الىپ كەلىپ وتىرعان نەگىزگى قۇرال-جابدىقتاردىڭ توزۋى 80%-دان اسادى.

بيىل كاسىپورىننىڭ ءوز قاراجاتى ەسەبىنەن تۋربواگرەگاتتارعا, قازاندىق اگرەگاتتارىنا جانە قوسالقى جابدىقتارعا كۇردەلى جوندەۋ جۇمىستارى جۇرگىزىلىپ جاتىر. ابدەن توزىعى جەتكەن قۇرىلعىلاردى اۋىستىرۋ ءۇشىن ماڭعىستاۋ وبلىسى اكىمدىگىنىڭ رەزەرۆىنەن 2,6 ملرد تەڭگە ءبولىندى. سونىمەن قاتار پرەمەر-ءمينيستردىڭ تاپسىرماسى بويىنشا جاڭا جابدىقتار مەن قوسالقى بولشەكتەر ساتىپ الۋعا ۇكىمەت رەزەرۆىنەن تاعى 4,9 ملرد تەڭگە ءبولىندى. قازىرگى ۋاقىتتا جابدىقتاردى جەتكىزۋشىلەرمەن كەلىسىمشارتتار جاسالدى, ولار وسى جىلدىڭ قاراشا-جەلتوقسان ايلارىندا جەتكىزىلەدى.

ءاليحان سمايىلوۆقا جەو جابدىعىنىڭ ەداۋىر توزۋىنا بايلانىستى 2024 جىلى №3 ەنەرگوبلوكتى ءىشىنارا جاڭعىرتۋ ارقىلى كۇردەلى جوندەۋ جۇمىستارى جوسپارلانعانى تۋرالى باياندالدى. سونداي-اق 2025 جىلى №2 ەنەرگوبلوكتى جانە 2026 جىلى №1 ەنەرگوبلوكتى تولىق جاڭعىرتۋ ارقىلى كۇردەلى جوندەۋ جۇرگىزۋ جوسپارلانعان. جىلۋ ەلەكتر ورتالىعىنىڭ باس عيماراتىنداعى اياقتالماعان قۇرىلىس الاڭىندا №4 ەنەرگوبلوك سالۋ جوسپارلانىپ وتىر. قۇرىلىس الاڭىنا بارلىق قاجەتتى ينجەنەرلىك كوممۋنيكاتسيالار تارتىلعان. ىسكە اسىرۋ مەرزىمى – 2027 جىلدىڭ 4-ءشى توقسانى. جالپى, قولدانىستاعى ەنەرگوبلوكتاردى جاڭعىرتۋ جانە جاڭالارىن سالۋ ەسەبىنەن گەنەراتسيا تۇتاستاي العاندا 420 مۆت-قا ارتادى دەپ كۇتىلەدى.

بۇل رەتتە, ەكى سۋ جىلىتۋ قازاندىعىنىڭ قۇرىلىسى مەن 1-جەو-دەگى №7 قازاندىق اگرەگاتىن, سونداي-اق №10 قازاندىق اگرەگاتىن جاڭعىرتۋ جانە 2-جەو-داعى №7 تۋربواگرەگاتتى كوندەنساتورلىق تۋربيناعا اۋىستىرا وتىرىپ قايتا جاڭارتۋ سىندى جوبالار بويىنشا قازىرگى تاڭدا تەحنيكالىق قۇجاتتار دايىندالىپ, مەملەكەتتىك ساراپتامانىڭ وڭ قورىتىندىسى الىندى. بۇگىندە جوبالىق-سمەتالىق قۇجاتتامانى ازىرلەۋ بويىنشا كونكۋرستىق راسىمدەر جۇرگىزىلىپ جاتىر.

پرەمەر-مينيستر اپاتتى جاعدايداعى جابدىقتى اۋىستىرۋ كومبيناتتىڭ تەحنيكالىق جاعدايىن جاقسارتىپ, جۇمىس قابىلەتىن ارتتىرۋعا مۇمكىندىك بەرەتىنىن اتاپ ءوتتى. ياعني, گەنەراتسيالىق قۋات كوزدەرىنىڭ ءوشىپ قالۋى جانە تۇتىنۋشىلار ءۇشىن شەكتەۋلەردى ەنگىزۋ سياقتى تاۋەكەلدەر بارىنشا ازايادى.

«وبلىس اكىمدىگى جوندەۋ جۇمىستارىنىڭ ۋاقتىلى اياقتالۋىن باقىلاۋدى قامتاماسىز ەتۋى قاجەت», دەدى ول.

بۇدان ءارى ۇكىمەت باسشىسىنا «كاسپي» سۋ تۇششىتۋ زاۋىتى» جشس ديرەكتورى نۇرلىباي اققۇلوۆ زاۋىت ونىمدىلىگىن تاۋلىگىنە 40 مىڭ تەكشە مەترگە جەتكىزۋ جۇمىستارى تۋرالى باياندادى.

نىساندى جاڭعىرتۋعا مەملەكەتتىك بيۋدجەتتەن 12 ملرد تەڭگەدەن استام, ال ۇكىمەت رەزەرۆىنەن – قوسىمشا 5 ملرد تەڭگەدەن استام قارجى ءبولىنىپ, قازىرگى تاڭدا جوبا بويىنشا قۇرىلىس جۇمىستارى 90%-عا ورىندالدى. سونداي-اق زاۋىتتا جاڭا سورعى قوندىرعىلارى, سۋدى الدىن-الا تازارتۋ سۇزگىلەرى, سۋدى مينەرالداندىرۋعا ارنالعان سۇزگى-كونديتسيونەرلەر, ارالاستىرۋ كامەرالارى, ەلەكتر جەلىلەرى مەن ترانسفورماتورلىق قوسالقى ستانسالار ورناتىلعان.

ءاليحان سمايىلوۆ مۇنايلى جانە قاراقيا اۋداندارىنىڭ ەلدى مەكەندەرى ءۇشىن اۋىزسۋدىڭ نەگىزگى كوزى ءدال وسى زاۋىت بولىپ وتىرعانىن اتاپ ءوتتى. قازىر ونىڭ قۋاتى تاۋلىگىنە 20 مىڭ تەكشە مەتردى قۇرايدى. ول 180 مىڭنان استام ادامدى سۋمەن قامتاماسىز ەتەدى.

«حالىقتىڭ جىل سايىنعى ءوسىمىن, سونداي-اق كاسپي تەڭىزىنىڭ جاعالاۋىندا تۋريستىك كلاستەردىڭ دامۋىن ەسكەرە وتىرىپ, اۋىزسۋ ءوندىرىسىن ۇلعايتۋ ماسەلەسى اسا وزەكتى. وسىعان بايلانىستى پرەزيدەنت «كاسپي» تۇششىلاندىرۋ زاۋىتىن تاۋلىگىنە 40 مىڭ تەكشە مەترگە دەيىن كەڭەيتۋ جوباسىن ىسكە اسىرۋدى تاپسىردى. ۇكىمەت تاراپىنان قاجەتتى قارجىلىق قولداۋ كورسەتىلدى. وبلىس اكىمدىگىنە وسى جوبانى اعىمداعى جىلدىڭ سوڭىنا دەيىن اياقتاۋ قاجەتتىگىن تاعى دا ەسكە سالامىن, جاڭا جىلدان باستاپ حالىق سۋمەن قاجەتتى كولەمدە قامتاماسىز ەتىلۋى ءتيىس», دەدى پرەمەر-مينيستر.