قازاقستاندا توعىز سۋ قويماسى پايدا بولادى, دەپ حابارلايدى Egemen.kz 24kz news سايتىنا سىلتەمە جاساپ.
ايتا كەتەيىك, الداعى ەكى جىلدا رەسپۋبليكادا 9 سۋ قويماسى سالىنادى, قازىرگى ۋاقىتتا اپاتتى جاعدايداعى 16 نىساندا كۇردەلى جوندەۋ جۇمىستارى اياقتالدى. ەندى ماماندار 15 سۋ قويماسىندا قايتا جوندەۋ جۇمىستارىن جۇرگىزۋى كەرەك. ەلباسىنىڭ تاپسىرماسى بويىنشا رەسپۋبليكادا 20 سۋ قويماسى سالىنۋى ءتيىس. بۇل قوسىمشا 800 ميلليون تەكشە مەتر سۋ جيناۋعا مۇمكىندىك بەرەدى.
«حالىقتىڭ جانە ەكونوميكا سالالارىنىڭ قاجەتتىلىكتەرى ءۇشىن سۋ الۋدىڭ جالپى كولەمى شامامەن 25 تەكشە شاقىرىمدى قۇرايدى, ونىڭ 65 پايىزى اۋىل شارۋاشىلىعىنا, 30 پايىزى ونەركاسىپكە, قالعانى حالىققا پايدالانىلادى. قازىر ازىرلەنىپ جاتقان سۋ كودەكسىندە جاڭا تاريفتىك ساياساتتىڭ نەگىزگى باعىتتارى ەسكەرىلەدى. ماسەلەنىڭ شەشىمى سالانى تسيفرلاندىرۋ جانە ءتيىمدى تاريف قالىپتاستىرۋ بولۋى ءتيىس», دەدى سۋ رەسۋرستارى كوميتەتى توراعاسىنىڭ ورىنباسارى سەيىلبەك نۇرىمبەتوۆ.
بيىلعى جىلدىڭ شىلدە ايىندا مەملەكەت باسشىسىنىڭ سىنىنان كەيىن استانا سۋ قويماسىن تازالاۋ جۇمىستارى باستالدى. بۇعان دەيىن ەكولوگيا جانە تابيعي رەسۋرستار مينيسترلىگى مالىمدەگەندەي, ەلوردالىق سۋ قويماسى 1970 جىلى سالىنعان جانە سودان بەرى تازارتىلماعان. بۇل ەلوردانى اۋىز سۋمەن قامتاماسىز ەتەتىن جالعىز سۋ قويماسى. ونىڭ جالپى كولەمى 410,9 ملن تەكشە مەتردى قۇرايدى.
ەسكە سالايىق, قاسىم-جومارت توقاەۆ 11 شىلدەدە ەلوردانى دامىتۋ ماسەلەلەرىنە ارنالعان كەڭەستە ەكولوگيا مينيسترلىگىنىڭ جۇمىسىن سىنعا العان ەدى. ودان كەيىن ەلوردانىڭ استانا سۋ قويماسىنا تولىقتاي تاۋەلدى ەكەنىن اتاپ وتكەن ەدى.