مەملەكەت باسشىسى قاسىم-جومارت توقاەۆ وتاندىق بيزنەس وكىلدەرىمەن كەزدەسۋ بارىسىندا قازاقستاندا زاڭ ۇستەمدىگىن جانە جەكە مەنشىكتىڭ قورعالۋىن قامتاماسىز ەتۋ كەرەك ەكەنىن ايتتى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
پرەزيدەنتتىڭ ايتۋىنشا, بۇل – كاسىپكەرلىكتى دامىتۋدىڭ جانە ينۆەستيتسيا تارتۋدىڭ نەگىزگى شارتى. الايدا ونى مۇلتىكسىز ساقتاۋ ءۇشىن جۇيەدەگى بىرقاتار تۇيتكىلدى شەشۋ قاجەت.
«ماسەلەن, باقىلاۋشى ورگاندار مەن سوتتار زاڭ بۇزۋشىلىقتىڭ فورمالدى بەلگىلەرىن انىقتاعان كەزدە, ونىڭ ءمان-جايىن تەكسەرۋ قاعيداتىن باسشىلىققا المايدى. كاسىپورىن قىزمەتىندەگى كەز كەلگەن, ءتىپتى بولماشى قاتەلىكتىڭ ءوزى كوبىنە قىلمىس سياقتى قارالادى. ناتيجەسىندە ەلىمىزدىڭ ەكونوميكاسى ۇدايى قىلمىستىق-قۇقىقتىق قىسىمعا ۇشىرايدى. وسى جيىنعا قاتىسىپ وتىرعان قۇقىق قورعاۋ ورگاندارىنىڭ باسشىلارى بۇل ماسەلەگە ايرىقشا نازار اۋدارعانى ءجون. بيزنەستەن كۇشتىك قۇرىلىمداردىڭ ارەكەتتەرىنە قاتىستى ارىز-شاعىمدار تولاسسىز ءتۇسىپ جاتىر», دەدى قاسىم-جومارت كەمەل ۇلى جيىن بارىسىندا.
سونداي-اق مەملەكەت باسشىسى ەكونوميكالىق سيپاتتاعى قىلمىسقا قارسى كۇرەس تەك قانا زاڭ اياسىندا جۇرگىزىلۋى كەرەك ەكەنىن قاداپ ايتتى.
«قىلمىسقا, ونىڭ ىشىندە ەكونوميكالىق سيپاتتاعى قىلمىسقا قارسى كۇرەس تەك قانا زاڭ اياسىندا جۇرگىزىلۋى كەرەك. مۇنداي اسىراسىلتەۋشىلىك مەملەكەتتىڭ مۇددەسىنە عانا قايشى كەلمەيدى, سونىمەن قاتار قازاقستاننىڭ ابىروي-بەدەلىنە نۇقسان كەلتىرىپ, مەنىڭ باستامالارىما حالىقتىڭ سەنىمىن ازايتادى. بىزگە قاداعالاۋدىڭ تەڭگەرىمدى مەحانيزمىن قۇرۋ قاجەت. مەن بۇعان دەيىن ءاربىر ماڭىزدى ينۆەستيتسيالىق جوبانىڭ جۇزەگە اسىرىلۋىن باقىلاۋ ءۇشىن قاداعالاۋشى ورگاننان ءبىر قىزمەتكەردى بەكىتۋ تۋرالى باستاما كوتەردىم. الايدا بۇل ماسەلەدە ايتارلىقتاي ناتيجە جوق. پرەزيدەنت اكىمشىلىگىنە باس پروكۋراتۋرامەن جانە بيزنەس-ومبۋدسمەنمەن بىرلەسە ءبىر ايدىڭ ىشىندە ءتيىستى ۇسىنىس ەنگىزۋدى تاپسىرامىن», دەدى ەل پرەزيدەنتى.