23 قىركۇيەكتە قىتايدىڭ حانچجوۋ قالاسىندا الاۋى تۇتاناتىن ءحىح جازعى ازيا ويىندارىندا قازاقستاننىڭ كاراتەشىلەرى قانداي قۇرامدا ونەر كورسەتەتىنى بەلگىلى بولدى.
بايراقتى باسەكەدە 12 سالماق دارەجەسى بويىنشا ءتۇرلى-ءتۇستى مەدالدار ساراپقا سالىنادى. سونىڭ سەگىزىندە جەرلەستەرىمىز ونەر كورسەتەدى. جارىس جولىنا شىعاتىنداردىڭ دەنى – تالاي ءدۇبىرلى دودادا دارالانعان ساقا سپورتشىلار. سولاردىڭ اراسىنداعى ەڭ اتاقتىسى – سوفيا بەرۋلتسەۆا. +68 كيلو سالماق دارەجەسىندە سايىسقا ءتۇسىپ جۇرگەن ول – توكيو وليمپياداسىنىڭ قولا جۇلدەگەرى, يسلام ىنتىماقتاستىعى مەن دۇنيە ءجۇزى ويىندارىنىڭ جەڭىمپازى. 67 كيلو سالماقتاعى ديدار ءامىرالى 2018 جىلى دجاكارتادا وتكەن ازيا ويىندارىندا كۇمىسپەن كۇپتەلسە, 84 كيلو سالماقتاعى دانيار يۋلداشەۆ ءدال سول دودادا قولاعا قول سوزدى. ءمولدىر جاڭبىرباي (50 كيلو), قايسار الپىسباي (60 كيلو) جانە نۇرقانات اجىقانوۆ (75 كيلو) پرەمەر-ليگا سەرياسىندا جەڭىس تۇعىرىنا كوتەرىلدى. ولاردان بولەك, اسەل قاناي (61 كيلو) مەن لاۋرا الىقۇل (68 كيلو) تاتاميگە شىعادى. ولار دا حالىقارالىق تۋرنيرلەردە مول تاجىريبە جيناعان.
قازىرگى كەزدە ەلىمىزدىڭ ۇلتتىق قۇراما كومانداسى فرانتسيادا وزدەرىنىڭ سوڭعى وقۋ-جاتتىعۋ جيىنىن وتكىزۋ ۇستىندە.