ءماجىلىس دەپۋتاتى ەلنۇر بەيسەنباەۆ ەلدەگى تەمىرجول تاسىمالىنداعى تۇيتكىلدى ماسەلەلەردى كوتەرىپ, پرەمەر-مينيستر ءاليحان سمايىلوۆتىڭ اتىنا ساۋال جولدادى, دەپ حابارلايدى Egemen.kz.
«جاز كەلسە بولدى تەمىرجول تاسىمالىنا شاعىم كوبەيەدى, جىلدا سولاي. جولاۋشىلار تاسىمالى قۇرامىنىڭ كوپ بولىگى - كەڭەستىك كەزەڭنىڭ مۇراسى. جىل سايىن ءبىز ۆاگوندار پاركىن جاڭارتۋ ماسەلەسىن كوتەرەمىز, ىسكە اسىرۋعا كەلگەندە ناتيجە جوق. قازىرگى ۋاقىتتا تەمىرجول قۇرامىنىڭ 60%-ى توزعان, پايدالانۋعا جارامايدى. ال مينيسترلىك پەن قتج تەمىر جول ۆاگوندارى پاركىن تۇبەگەيلى جاڭارتۋدى 2030 جىلعا جوسپارلاپ وتىر ەكەن. ۇلتتىق كومپانيا 1997 جىلى قۇرىلدى, 26 جىل كۇتكەنىمىز ازداي, تاعى 7 جىل كۇتۋىمىز كەرەك. كۇتكەن كۇننىڭ وزىندە ۆاگوندار پاركىنىڭ ءتيىمدى بولاتىنىنا سەنىم از. 2030 جىلى قالعان ۆاگوندار ەسكىرىپ, تەمىرجول قۇرامى پاركىنىڭ توزۋى 80%-عا ارتىپ كەتپەيتىنىنە كىم كەپىل؟», دەدى دەپۋتات.
ەلنۇر بەيسەنباەۆتىڭ ايتۋىنشا, توزىعى جەتكەن ۆاگوندارعا بيلەت ساتىپ الۋ ارمانعا اينالدى.
«بيلەت تاپشىلىعىنىڭ ازابىن تارتقان حالىقتىڭ «امانات» پارتياسىنا جولداعان ارىز-شاعىمى تىم كوبەيدى. بيلەت تاپقان كۇننىڭ وزىندە ەسكى ۆاگونداردىڭ جاعدايى قىنجىلتادى. جىلدان-جىلعا ازاماتتاردىڭ ىشكى تۋريزمگە دەگەن قىزىعۋشىلىعىنىڭ سانى ارتقانىن كورىپ وتىرمىز. سوندىقتان سۇرانىستى قامتۋ ءۇشىن تەمىرجول ماسەلەسىن تۇبەگەيلى شەشۋدى سۇرايمىز», دەپ تۇيىندەدى دەپۋتات.