جول جۇرگەندە كوبىنە پويىزدى قولاي كورەمىن. جاقىندا عانا ساپارلاتۋعا تۋرا كەلىپ قالدى. قاراپ جۇرمەي پويىزدارداعى قىزمەت ساپاسىنا, جولسەرىكتەردىڭ قىزمەتىنە سىني كوزبەن قارايتىنىمىز تاعى بار عوي. كوبىنەسە كوڭىلىمىز تولمايتىنى دا راس. دەگەنمەن, قىزمەتى ءتانتى ەتەتىن, جۇمىسىنا دەگەن جاۋاپكەرشىلىگى جانىڭدى جادىراتىن جولسەرىكتەر دە جوق ەمەس ەكەن.
تاياۋدا جولعا شىققانىمدا №117 قىزىلوردا – پاۆلودار باعىتىنداعى جولاۋشىلار پويىزىنىڭ 5-ۆاگونىنداعى جولسەرىكتىڭ جولاۋشىلارعا دەگەن ەلگەزەكتىگى ريزا ەتپەي قويمادى. ۆاگوننىڭ ءىشى تاپ-تازا, شايدىڭ بۋى بۇرقىراپ تۇر. كۇن ىستىقتا قوسىلعان كونديتسيونەردىڭ بىرەۋگە جاققانمەن, كەيبىرەۋگە جاقپاۋى دا مۇمكىن عوي. ءبىر اپامىز كوزىنە وپەراتسيا جاساتقان با, سالقىن تيگىزىپ الۋدان قورقىپ, «مىنانى سوندىرۋگە بولماي ما؟» دەگەن ءوتىنىش ايتىپ ەدى, جولسەرىك جىگىت جالپى ءتارتىپتى وزگەرتە المايتىنىن, بىراق, قالاسا كونديتسيونەرى جوق ۆاگونداردىڭ بىرىنەن ورىن تاۋىپ, اۋىستىرىپ بەرۋگە بولاتىنىن ايتىپ, ءتۇسىندىردى. بىراق, الگى اپاي «انا ۆاگوننان مىنا ۆاگونعا سەكىرىپ جۇرمەيىن» دەگەن سوڭ, «ەندى قايتسەم ەكەن؟» دەپ ءسال ويلانىپ تۇردى دا, لىپ ەتىپ بارىپ, ودەيال اكەلىپ, جوعارىدان تومەن قاراي كولەگەيلەپ اپاعا جەل سوقپايتىنداي قورعانىش جاساپ بەرە قويدى. «مىناۋىڭ, قانداي دۇرىس بولدى» دەگەن اپامىز ريزاشىلىعىن ءبىلدىرىپ, العىسىن جاۋدىرىپ جاتتى.
ءتۇننىڭ ءبىر ۋاعىندا جولسەرىكتىڭ «اپا, ءبۇرىسىپ جاتىرسىز عوي, توڭىپ قالعانسىز با؟» دەپ, تاعى ءبىر ۇلكەندەۋ كىسىنىڭ اياق جاعىن ودەيالمەن قىمتاپ جاتقانىن كورىپ قالدىم. مۇنداي دا جولسەرىك بولادى ەكەن-اۋ... قانشاما جىل جول ءجۇرىپ, مۇندايدى العاش كورۋىم. شىنىمدى ايتسام, تاڭعالدىم. سوسىن ارنايى بارىپ تانىستىم. ونىڭ اتى-ءجونى – ايان سارسەنباي ۇلى الداشەۆ ەكەن. جولسەرىك بولىپ جۇرگەنىنە 10 جىل تولىپتى.
– ءبىزدىڭ مىندەت – جولاۋشىلارعا قىزمەت كورسەتۋ. سول مىندەتىمىزگە ادال بولساق, دەيدى ايان. قانداي قاراپايىمدىلىق!
اركىم ءوز مىندەتىنە ناق وسىنداي تۇسىنىكپەن قاراسا, كوپ نارسە باسقاشا بولار ەدى. جولسەرىكتەردىڭ دە نەشە ءتۇرلىسىن كورىپ ءجۇرمىز عوي. ەندى ولارعا «جولسەرىك بولساڭدار, ايانداي بولىڭدار!», دەگىمىز كەلەدى.
ۇلىتاۋ وبلىسى