الماتىدا ۇستەل تەننيسىنەن WTT Contender Almaty دەپ اتالاتىن حالىقارالىق تۋرنير ءوز مارەسىنە جەتتى.
33 مەملەكەتتەن كەلگەن 150 سپورتشىنىڭ قاتىسۋىمەن وتكەن جارىستا قىتاي قۇراماسى مول ولجاعا كەنەلدى. ولار 3 التىن, 3 كۇمىس جانە 3 قولا مەدالدى يەلەنىپ, جالپىكوماندالىق ەسەپتە باس جۇلدەنى ولجالادى. اتاپ ايتساق, كۋاي مەن (ايەلدەر), لين شيدۋن/سيۋي ينبين (ەرلەردىڭ جۇپتىق سايىسى), چەن ي/كۋاي مەن (ايەلدەردىڭ جۇپتىق سايىسى) جەڭىس تۇعىرىنىڭ ەڭ بيىك ساتىسىنا كوتەرىلسە, سيان پەن (ەرلەر), فان سيتسى (ايەلدەر), ليۋ ۆەيشان/فان سيتسى (ايەلدەردىڭ جۇپتىق سايىسى) كۇمىسپەن كۇپتەلدى. ال شي سيۋنياو (ايەلدەر), سان ۆەن/سيۋي حايدۋن (ەرلەردىڭ جۇپتىق سايىسى) جانە سيان پەن/ ليۋ ۆەيشان (ميكست) قولاعا قول سوزدى. ەرلەر جارىسىندا تايپەيلىك لين يۋنجۋ توپ جارسا, ميكستە وڭتۇستىك كورەيانىڭ وكىلدەرى چو دەسون/دجۋ چحونحۋەي شاشاسىنا شاڭ جۇقتىرمادى. سونداي-اق جۇلدەگەرلەر ساناتىنا قوسىلعاندار اراسىندا پورتۋگاليا, شۆەتسيا, گەرمانيا جانە فرانتسيانىڭ ۇستەل تەننيسشىلەرى دە بار.
وكىنىشكە قاراي, بۇل جارىستا قازاقستاننىڭ بىردە-ءبىر سپورتشىسىنا جۇلدە الۋ باقىتى بۇيىرمادى. سەبەبى ەلىمىزدىڭ ۇزدىك ويىنشىلارى وڭتۇستىك كورەيانىڭ پحەنچحان قالاسىندا ءوتىپ جاتقان ازيا چەمپيوناتىنا قاتىسۋدا. ال ولاردىڭ ءىزىن باسقان جاستار باسەكەگە قابىلەتتى بولماي شىقتى.