مەملەكەت باسشىسى قاسىم-جومارت توقاەۆ «باتىل تويتارىس-2023» ستراتەگيالىق كوماندالىق-شتابتىق اسكەري وقۋ-جاتتىعۋ جيىنىنا باردى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
پرەزيدەنت – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆتىڭ باسشىلىعىمەن «جاعالاۋ» وقۋ-جاتتىعۋ پوليگونىندا «باتىل تويتارىس-2023» ستراتەگيالىق كوماندالىق-شتابتىق اسكەري وقۋ-جاتتىعۋ جيىنى ءوتتى.
قاسىم-جومارت توقاەۆ وقۋ-جاتتىعۋ جيىنىن باقىلاۋ مۇناراسىنان تاماشالادى.
اسكەري ءادىس-تاسىلدەر كورسەتەر الدىندا مەملەكەت باسشىسىنا گەنەرال-مايورلار بولات جوراباەۆ پەن الماز جۇماكەەۆ قورعانىس وپەراتسياسى كەزىندەگى ارناۋلى وپەراتسيالار كۇشتەرى مەن دەسانتتىق-شابۋىلداۋ اسكەرلەرىنىڭ ارەكەتى جونىندە باياندادى.
دەسانتتىق-شابۋىلداۋ اسكەرلەرىنىڭ بريگادالىق-تاكتيكالىق توپتارى اۆياتسيانىڭ قولداۋىمەن, سونداي-اق قۇرلىق اسكەرلەرى جانە ارناۋلى وپەراتسيالار كۇشتەرىنىڭ بولىمشەلەرىمەن بىرلەسە وتىرىپ, سۋدان ءوتۋ ارقىلى قارسى جاعالاۋداعى جاۋ شەبىن باسىپ الۋ ءۇشىن تاكتيكالىق ءىس-قيمىل جۇرگىزدى.
ال ارناۋلى وپەراتسيالار كۇشتەرى مەن ۇلتتىق ۇلان بولىمشەلەرى شارتتى جاۋ قولىنا وتكەن قاپشاعاي گەس-ءىن ازات ەتتى. توتەنشە جاعدايلار مينيسترلىگىنىڭ بولىمشەلەرى تەحنوگەندىك اپات سالدارىن جويۋمەن اينالىسىپ, حالىققا گۋمانيتارلىق كومەك كورسەتۋ مىندەتىن اتقاردى.
قارۋلى كۇشتەردىڭ باس شتابى ازىرلەگەن بىرىڭعاي جوسپار مەن ماقساتقا سايكەس اسكەرلەر وقۋ-جاتتىعۋ جيىنى وتەتىن اۋداندارعا ستراتەگيالىق تۇرعىدا قايتا توپتاستىرىلدى.
اتاپ ايتقاندا, اسكەري-تەڭىز كۇشتەرى اۆياتسيانىڭ جانە ارناۋلى وپەراتسيالار كۇشتەرىنىڭ قولداۋىمەن كاسپي تەڭىزى اكۆاتورياسىنداعى ەكونوميكالىق قىزمەت نىساندارىنىڭ قاۋىپسىزدىگىن قامتاماسىز ەتتى.
الماتى, قاراعاندى, سولتۇستىك قازاقستان جانە اباي وبلىستارىنداعى پوليگونداردا دا وسىنداي وقۋ-جاۋىنگەرلىك مىندەتتەر ورىندالدى.