مەملەكەت باسشىسى قاسىم-جومارت توقاەۆ بۇگىنگى «ادىلەتتى قازاقستاننىڭ ەكونوميكالىق باعدارى» اتتى جولداۋىندا ءىرى ءوندىرىس ورىندارىنىڭ ەكولوگياعا زيان كەلتىرىپ جاتقانىن, كاسىپورىنداردا جۇمىسشىلاردىڭ مەرتىگىپ, قازاعا ۇشىراۋى جيىلەگەنىن سىنعا الدى, دەپ حابارلايدى Egemen.kz.
«قازاقستاندا كەن ءوندىرۋ ونەركاسىبى جاقسى دامىعانى بارشاعا بەلگىلى. وسى سالا ۇلتتىق ەكونوميكانىڭ ءوسىمىن قامتاماسىز ەتەتىن سەنىمدى تابىس كوزى بولىپ كەلەدى. بولاشاقتا دا سولاي بولۋعا ءتيىس. كوپتەگەن مەتالدىڭ الەمدىك نارىقتاعى باعاسى بۇرىن-سوڭدى بولماعان دەڭگەيگە جەتتى. سوعان قاراماستان ءىرى ءوندىرىس ورىندارىنا جاقىن تۇراتىن جۇرتتىڭ نارازىلىعى كۇشەيىپ بارادى. ولار ەكولوگيا ناشارلاپ, دەنساۋلىققا زيان كەلتىرىپ جاتقانىن ايتىپ, شاعىمدانۋدا», دەدى مەملەكەت باسشىسى.
بۇدان سوڭ ول جۇمىسشىلاردىڭ وندىرىستە مەرتىگۋى جانە قازاعا ۇشىراۋى كوپ بولىپ كەتكەنىن ايتتى.
«ۇكىمەت كاسىپورىنداردىڭ تەحنولوگيالىق جانە ەكولوگيالىق احۋالىن, دەنساۋلىق ساقتاۋ جۇيەسىن جاقسارتۋ ءۇشىن باتىل شارالار قابىلداۋى قاجەت. سوندىقتان ءىرى ءوندىرىس كاسىپورىندارى 5 جىل سايىن تەحنولوگيالىق جانە ەكولوگيالىق اۋديت جاساۋى كەرەك. بۇل تالاپ ينفراقۇرىلىم سالاسىنداعى كاسىپورىندارعا دا قويىلۋعا ءتيىس», دەدى پرەزيدەنت.