استانا قالاسىنىڭ دەنە شىنىقتىرۋ جانە سپورت باسقارماسىنا قاراستى «سپورتتىڭ وليمپيادالىق ەمەس تۇرلەرى بويىنشا دامىتۋ ديرەكتسياسى», استانا قالاسىنىڭ توعىزقۇمالاق فەدەراتسياسى جانە «Asarume» قايىرىمدىلىق قورى بىرلەسە وتىرىپ, «كەڭ جۇرەك مىڭ بالا» اكتسياسىن جۇزەگە اسىردى. بۇل تۋرالى ەلوردا اكىمدىگىنىڭ رەسمي سايتى حابارلادى, دەپ جازادى Egemen.kz.
«Asarume» قايىرىمدىلىق قورى باستاعان بۇل اكتسيانىڭ باستى ماقساتى – مۇقتاج جاندارعا قامقورلىق جاساۋ, مورالدىق, ماتەريالدىق تۇرعىدان, ءبىلىم, سپورت سالالارىنان قولدان كەلگەنشە كومەك كورسەتۋ.
قالالىق سپورتتىڭ وليمپيادالىق ەمەس تۇرلەرى بويىنشا دامىتۋ ديرەكتسياسى اتاۋلى اكتسيانى نازاردان تىس قالدىرمادى. اكتسيا اياسىندا توعىزقۇمالاقتان استانا قالاسى قۇراما كومانداسىنىڭ سپورتشىلارى مەن مەكەمەنىڭ اعا جاتتىقتىرۋشىسى نۇرجان قونارباەۆ «Asarume» قايىرىمدىلىق قورىنىڭ ءتىزىمى بويىنشا شاقىرىلعان بالالارعا ايتۋلى سپورتتىڭ قىر-سىرىن جانە ويىن بارىسىن كورسەتتى.
قالالىق سپورتتىڭ وليمپيادالىق ەمەس تۇرلەرى بويىنشا دامىتۋ ديرەكتسياسىنىڭ باسشىسى داستان جۇماباي ۇلىنىڭ ايتۋىنشا كەيىنگى جىلدارى ەلىمىزدە ءتۇرلى جوبالار مەن اكتسيالاردى قولداعان جومارت جاندار سانى ارتىپ كەلەدى. ەلوردادا سپورتتىڭ بۇل تۇرىمەن 3500-دەن استام سپورتشى اينالىسادى, ونىڭ 51-ءى قالا قۇراماسىندا, 10-ى ۇلتتىق قۇرامادا. سپورتشىلارىمىز استانا قالاسىندا «وقۋشىلار سارايى», «بەرەكە» اۋلا كلۋبى, «اقشوقى» پاراليمپيادالىق ورتالىعى, «ارقا الان» سپورت كلۋبى, «تەمىرلان» اۋلا كلۋبى, «زامانداس» اۋلا كلۋبى, №87 مەكتەپ-گيمنازيادا توعىزقۇمالاق سپورت تۇرىمەن اينالىسا الادى.