وقۋ-اعارتۋ مينيسترلىگى اۋىلدىق مەكتەپتەردەگى دارىندى وقۋشىلاردى انىقتاۋ ءۇشىن, سونداي-اق حالىقارالىق وليمپيادالارعا قاتىسۋعا ىنتالاندىرۋ ماقساتىندا اۋىل وقۋشىلارىنا ارناپ العاش رەت 2023-2024 وقۋ جىلىندا رەسپۋبليكالىق وليمپيادا وتكىزەدى, دەپ حابارلايدى Egemen.kz.
وليمپياداعا اۋىل مەكتەپتەرىنىڭ 9-11 (12) سىنىپ وقۋشىلارى قاتىسا الادى. وليمپيادا ءۇش كەزەننەن: اۋداندىق, ىرىكتەۋ جانە رەسپۋبليكالىق كەزەڭدەردەن تۇرادى.
قورىتىندى كەزەڭنىڭ قاتىسۋشىلارى رەسپۋبليكالىق سىرتتاي وقۋ مەكتەبىنە قوسىمشا ءبىلىم الۋعا قابىلدانۋ مۇمكىندىگىنە يە بولادى. ءى-دارەجەلى ديپلوم العان جەڭىمپازدار وقۋ-جاتتىعۋ جيىندارىنا شاقىرتىلىپ, جالپى ءبىلىم بەرەتىن پاندەر بويىنشا ۇلتتىق وليمپياداعا جولداما الادى.
سونداي-اق وقۋ-اعارتۋ مينيسترلىگى تالىمگەر-ۇستازدار ءۇشىن دە دايىندىق جيىندارىن وتكىزۋدى جوسپارلاپ وتىر.