الماتى وبلىسىندا 11 مەكتەپ پەن 1 بالاباقشادا كۇردەلى جوندەۋ جۇمىستارى جۇرگىزىلىپ جاتىر. ونىڭ تورتەۋى جىل سوڭىنا دەيىن, ال قالعانى كەلەسى جىلى پايدالانۋعا بەرىلمەك. ءماجىلىس دەپۋتاتى, «AMANAT» پارتياسى فراكتسياسىنىڭ مۇشەسى جاناربەك ءاشىمجان وبلىسقا جۇمىس ساپارى بارىسىندا تالعار اۋدانىنىڭ بەلبۇلاق اۋىلىندا كۇردەلى جوندەۋ ءجۇرىپ جاتقان مەكتەپكە باردى, دەپ حابارلايدى Egemen.kz.
ءبىلىم مەكەمەسىندە 600-گە تارتا بالا وقىپ كەلگەن. جوسپار بويىنشا كەلەسى جىلدىڭ ناۋرىز ايىندا قۇرىلىسى اياقتالۋعا ءتيىس. بىراق مەردىگەرلەر وسى جىلدىڭ سوڭىنا دەيىن اياقتاپ بەرەمىز دەپ وتىر. ال بالالار وعان دەيىن سول ەلدىمەكەندەگى ەسكى مەكتەپتە وقيدى.
«بۇل مەكتەپ 60 جىل بۇرىن سالىنعان. سول جىلدان بەرى قاراي ەشقانداي كۇردەلى جوندەۋ جۇمىستارى جۇرمەگەن. كۇردەلى جوندەۋ ۋاقىتىندا 640 وقۋشى №32 مەكتەپتىڭ ەسكى عيماراتىندا وقيدى», دەدى تالعار اۋدانى اكىمىنىڭ ورىنباسارى ايبەك بيداەۆ.
قالا ىرگەسىندەگى ءبىلىم وردالارىندا ورىن تاپشىلىعى – باستى ماسەلە. ءتىپتى, ءۇش اۋىسىمدا ءبىلىم بەرەتىندەرى بار. بۇل ماسەلە «AMANAT» پارتياسىنىڭ نازارىندا. جول كارتاسىندا كوزدەلگەن جوسپارلاردى ورىنداۋ ماقساتىمەن ءماجىلىس دەپۋتاتى ءبىلىم بەرۋ نىساندارىن ارالاپ, وقۋ جىلىنا دايىندىقتارىن تەكسەردى.
«بىلتىردان بەرى وڭىرلەردى ارالاپ كەلەمىن. ءۇش اۋىسىمدى مەكتەپتەردىڭ پروبلەماسى ءار وبلىستا بار. وڭىردەگى قالا ىرگەسىندەگى مەكتەپتەردىڭ ماسەلەسى كۇن تارتىبىندە تۇر. اسىرەسە تالعار, ەڭبەكشىقازاق, ىلە اۋدانىندا مۇنى جەدەلدەتىپ شەشۋ كەرەك. ويتكەنى ساياجايداعى ازاماتتار بالالارىن كورشىلەس ەلدى مەكەندەگى مەكتەپتەرگە تاسىپ الەك», دەدى جاناربەك ءاشىمجانوۆ.
ماجىلىسمەننىڭ ايتۋىنشا, وبلىس بويىنشا اۋداننىڭ ءبىلىم بولىمدەرى وقۋعا 100 پايىز دايىن ەكەندىكتەرىن جەتكىزدى. بىراق كەي جەرلەر 2-3 ايعا دەيىن كەشىگەتىنىن ايتتى. بۇل ماسەلەنى جەرگىلىكتى اتقارۋشى بيلىك قولعا الماق.
ايتا كەتەيىك, تالعار اۋدانىندا ءۇش اۋىسىمدى مەكتەپ ماسەلەسى وزەكتىلىگىن جويعان جوق. جاڭا وقۋ جىلىندا 43 مەكتەپتىڭ بەسەۋى ءۇش اۋىسىمدا وقىتۋدى جالعاستىرادى.
جالپى, وبلىس بويىنشا ءۇش اۋىسىمدى وقىتاتىن 51 مەكتەپ بار. پارتيانىڭ سايلاۋالدى باعدارلاماسى اياسىندا وسى ماسەلەنى جويۋ ءۇشىن بەس جىلدا 53 جاڭا مەكتەپتىڭ قۇرىلىسى جوسپارلانعان. ال 39 ءبىلىم بەرۋ نىسانىندا ساپالى كۇردەلى جوندەۋ جۇمىستارى جۇرگىزىلەدى.