ستاتيستيكا كورسەتكەندەي, ايتۆ جۇقتىرعانداردىڭ 30%-ى بۇل اۋرۋمەن اۋىراتىنىن بىلمەي جۇرە بەرەدى. مۇنداي جاعدايدا اۋرۋدىڭ قوزىپ, جيتس-كە اينالۋ قاۋپى جوعارى. سونداي-اق دەرتىنەن بەيحابار ادامدار باسقالارعا دا قاۋىپ توندىرەدى. بۇل قاتەردىڭ الدىن الاتىن امال – ايتۆ ينفەكتسياسىن انىقتايتىن ەكسپرەسس ءادىس.
ادامنىڭ يممۋن تاپشىلىعى ۆيرۋسىن انىقتاۋعا ارنالعان ەكسپرەسس-تەستتەردىڭ دامۋى ءتورت ساتىدان ءوتتى. العاشقى ساتىسىندا رەاگەنتتەر سەزىمتالدىعى تومەن بولدى جانە تەك 1-ۆيرۋسقا انتيدەنەلەردى انىقتاي الدى. بۇل رەتتە قانداعى انتيدەنەلەردى انىقتاۋ ينفەكتسيا جۇقتىرعاننان 63 كۇننەن كەيىن مۇمكىن بولدى. ەكىنشى ساتىسىندا حيميالىق زاتتار اسا سەزىمتال بولدى, بىراق ايتۆ-1 جانە ايتۆ-2 انتيدەنەلەرى 42 كۇننەن كەيىن انىقتالدى. ءۇشىنشى ساتىسىندا ءارتۇرلى يممۋنوگلوبۋليندەردى (G جانە M كلاستارى) جانە اۋرۋدى ەرتە ساتىسىندا انىقتاۋعا مۇمكىندىك تۋدى. ال ءتورتىنشى ساتىسىندا تەست جۇيەلەرى ودان سايىن جەتىلدىرىلىپ, انتيدەنەلەردى دە, انتيگەندەردى دە انىقتاي الاتىن بولدى. بۇل سىناقتاردىڭ سەزىمتالدىعى كەم دەگەندە 98%-دى قۇرايدى, ياعني ايتۆ ينفەكتسياسىن جۇقتىرعان العاشقى كۇندەردەن-اق انىقتاۋعا بولادى.
زەرتحانالار مەن كلينيكالاردا قولدانىلاتىن ەڭ كەڭ تاراعان, ايتۆ ينفەكتسياسىن جوعارى دالدىكپەن جىلدام انىقتايتىن تەست «Onsite HIV ag/ab4» دەپ اتالادى. بۇل تەستتىڭ ناتيجەلەرى بىلاي شىعۋى مۇمكىن:
– سىناق جولاعىندا قىزىل سىزىق (C بەلگىلەنگەن) بولماسا نەمەسە بۇل وتە ءالسىز بولسا, وندا «Ag» نەمەسە «Ab» دەپ بەلگىلەنگەن جولاقتارعا قاراماستان, تانداۋ ناتيجەسى «انىقتالماعان» بولىپ شىعادى. مۇندايدا تەستتى قايتا تاپسىرۋ كەرەك;
– سىناق جولاعىندا اشىق جانە انىق كورىنەتىن قىزىل جولاق كورسەتىلسە جانە «Ag» نەمەسە «Ab» دەپ بەلگىلەنگەن جولاقتار بولماسا, ناتيجە – «تەرىس» بولىپ شىققانى. ياعني ايتۆ-ينفەكتسياسىنىڭ بەلگىلەرى جوق;
– ەگەر سىناق جولاعىندا اشىق جانە انىق كورىنەتىن قىزىل سىزىقتى (س بەلگىسى) كورسەتسە جانە قىزىل نەمەسە سۇر-قىزىل «Ag» نەمەسە «Ab» دەگەن بەلگىلەنگەن جولاقتاردىڭ كەز كەلگەنىندە كورىنسە, وندا سىناق ناتيجەسى «وڭ» دەگەندى بىلدىرەدى.
ايتۆ دياگنوزىن قويۋ ءۇشىن تەك جەدەل تەست ناتيجەلەرىن پايدالانۋ مۇمكىن ەمەس. بۇل ءۇشىن ايتۆ-ينفەكتسيا ورتالىعىندا تەست تاپسىرۋ ارقىلى قوسىمشا تەكسەرۋلەر قاجەت. وسى تالداۋدىڭ ناتيجەسىندە دەرت انىقتالعان جاعدايدا دارىگەر انتيرەتروۆيرۋستىق تەراپيانى تاعايىندايدى, يممۋنيتەت تاپشىلىعىنىڭ دارەجەسىن باعالايدى جانە ناۋقاستىڭ ديناميكالىق مونيتورينگىن جۇرگىزەدى.
جالپى, دارىگەردىڭ ۇسىنىستارىن قاپەرگە الىپ, Aرۆ پرەپاراتتارىن قابىلداۋ رەجىمىن ۇستانعان ءجون. بۇل – ايتۆ-ينفەكتسياسى بار اعزانىڭ كۇيىن باقىلاۋدىڭ جانە ۆيرۋستىڭ جىنىستىق سەرىكتەسكە بەرىلۋىن بولدىرماۋدىڭ جالعىز جولى.
مايرا موشكالوۆا,
ايتۆ ينفەكتسياسىنىڭ
الدىن الۋ ورتالىعى
سەنىم پۋنكتىنىڭ مەدبيكەسى