23-27 تامىز ارالىعىندا يسپانيانىڭ ۆالەنسيا قالاسىندا كوركەم گيمناستيكادان الەم چەمپيوناتى وتەدى. بۇل جارىستا كەلەسى جىلى پاريجدە الاۋى تۇتاناتىن وليمپيا ويىندارىنىڭ 19 جولداماسى ساراپقا سالىنادى. باق سىناۋشىلار قاتارىندا اتاقتى ءاليا يۋسۋپوۆا جەتەكشىلىك ەتەتىن قازاقستاننىڭ ۇلتتىق قۇراما كومانداسى دا بار.
پيرەنەي تۇبەگىندەگى دودانىڭ جەكەلەگەن سايىسىندا ەلجانا تانيەۆا مەن ەريكا جايلاۋوۆا سىنعا تۇسەدى. ەلجانانىڭ ەسىمى جانكۇيەرلەرگە جاقسى تانىس. ول – ەلىمىزدىڭ ەڭ ۇزدىك گيمناسشىسى. 17 جاستاعى سىمداي تارتىلعان سىمباتتى قىز سوڭعى ەكى ازيا چەمپيوناتىندا 1 التىن, 6 كۇمىس جانە 2 قولا مەدال ولجالادى. دۇنيەجۇزىلىك ۋنيۆەرسيادادا – ءۇش, يسلام ىنتىماقتاستىعى ويىندارىندا ءتورت رەت جەڭىس تۇعىرىنا كوتەرىلدى. ودان بولەك, الەم كۋبوگىنىڭ كەزەڭدىك سايىسىندا, ازيا كۋبوگى, «Gracia Fair Cup», «Aphrodite Cup», «حولون» جانە «سوفيا كۋبوگى» سەكىلدى حالىقارالىق تۋرنيرلەردە جۇلدەگەرلەر ساناتىنا قوسىلدى. بىلتىرعى الەم چەمپيوناتىن تانيەۆا سەگىزىنشى ورىنمەن قورىتىندىلادى. ال ەريكا – جاستار بۋىنى اراسىنان ايەلدەر دۋىنا ەندى عانا قوسىلعان سپورتشى. ول بيىل بولگاريادا جالاۋى جەلبىرەگەن جارىستا قولا مەدالدى موينىندا جارقىراتىپ, كوپشىلىكتىڭ قوشەمەتىنە بولەندى. ەل جانكۇيەرلەرى اتالعان ەكى گيمناسشى قىزعا ءۇمىت ارتىپ وتىر.
توپتىق باسەكەدە ارۋجان قاسەنوۆا, ايدانا شاياحمەتوۆا, بايان قويباعار, ارۋجان قالساەۆا, اقسۇڭقار ءابدىراحمان جانە اياۋلىم قادىر سىندى سۇلۋلار قازاق ەلى نامىسىن قورعايدى.
كوركەم گيمناستيكادان سوڭعى الەم چەمپيوناتى بىلتىر بولگاريانىڭ باس شاھارى – سوفيادا ءوتتى. ۆيتوش تاۋىنىڭ ەتەگىندە جالاۋى جەلبىرەگەن جارىستا يتاليا قۇراماسى كەرەمەت ونەر كورسەتتى. اپەننين تۇبەگىنەن كەلگەن ارۋلار 6 التىن, 1 كۇمىس جانە 2 قولا مەدال يەلەنىپ, جالپىكوماندالىق ەسەپتە جەكە-دارا كوش باستادى. جەكەلەگەن سايىستا سوفيا راففاەلليدىڭ جالعىز ءوزى ءتورت رەت التىننان القا تاقتى. ول «قۇرساۋ», «دوپ», «تاسپا» جانە كوپسايىستا الدىنا جان سالمادى. ودان بولەك, اتالعان مەملەكەتتىڭ وكىلدەرى ەكى رەت كوماندالىق سايىستا توپ جاردى. سوفيا تورىندە بولگاريانىڭ ءانۇرانى ەكى رەت (2 التىن+3 كۇمىس+1 قولا), گەرمانيانىڭ گيمنى ءبىر رەت (1+3+1) شىرقالدى. سونداي-اق جۇلدە العاندار قاتارىندا يزرايل (0+2+0), يسپانيا (0+0+3), ازەربايجان (0+0+1) جانە سلوۆەنيانىڭ (0+0+1) گيمناسشىلارى بولدى.
بىلتىرعى الەمدىك دودانىڭ كوپسايىسىندا ەلجانا تانيەۆانىڭ سەگىزىنشى ورىن العانىن ءبىز جوعارىدا ايتتىق. سول جارىستا 121.000 ۇپاي جيناعان جەرلەسىمىز تەك سوفيا راففاەللي (يتاليا, 133.250 ۇپاي), داريا ۆارفولومەەۆا (گەرمانيا, 132.450), ستيليانا نيكولوۆا (بولگاريا, 128.800), ۆيكتوريا ونوپريەنكو (ۋكراينا, 125.050), ميلەنا بالداسساري (يتاليا, 124.900), ادي اسيا كاتس (يزرايل, 124.450) جانە ەكاتەرينا ۆەدەنەەۆا (سلوۆەنيا, 123.150) سىندى سپورتشىلاردان قالىپ قويدى.