وتكەن اپتادا الماتىدان اقش-قا جول تارتقان قازاقتىڭ تانىمال كاسىپقوي بوكسشىسى, WBO نۇسقاسى بويىنشا ورتا سالماقتاعى الەم چەمپيونى جانىبەك ءالىمحان ۇلى ءوزىنىڭ كەزەكتى جەكپە-جەگىنە دايىندىققا كىرىستى. ESPN ارناسى تاراتقان مالىمەتكە سۇيەنسەك, ول 14 قازاندا تەحاس شتاتىنداعى روزەنبەرگ قالاسىندا گەرمانيانىڭ وكىلى ۆينچەنتسو گۋالتەريمەن كۇش سىناسادى.
ۆينچەنتسو گۋالتەري 1993 جىلدىڭ 4 قاڭتارىندا گەرمانيانىڭ سولتۇستىك بولىگىندە ورنالاسقان ۆۋپپەرتال قالاسىندا دۇنيەگە كەلدى. ول كاسىپقوي رينگتەگى العاشقى كەزدەسۋىن 2015 جىلدىڭ كۇزىندە وتكىزدى. سول كەزدەن بەرى 21 رەت شارشى الاڭعا كوتەرىلگەن ول بارىندە جەڭىسكە جەتتى. جەتى باسەكەنى مەرزىمىنەن بۇرىن اياقتادى. قازىرگى كەزدە نەمىس بوكسشىسى IBF نۇسقاسى بويىنشا چەمپيوندىق بەلبەۋدىڭ يەگەرى. ءوزىنىڭ سوڭعى كەزدەسۋىن ۆينچەنتسو بيىل 1 ماۋسىمدا ەسكيۆا فالكان فلورەنتينوعا قارسى وتكىزدى. بۇل ەسىم جانكۇيەرلەرگە جاقسى تانىس. 33 جاستاعى برازيليانىڭ تۋماسى 2011 جىلى باكۋدە وتكەن الەم چەمپيوناتىندا قولا السا, 2012 جىلى لوندوندا الاۋى تۇتانعان وليمپيا ويىندارىندا كۇمىس مەدال يەلەندى. عالامدىق دودانىڭ فينالىندا ول, جاپونيانىڭ جۇلدىزى رەتە مۋراتاعا ەسە جىبەرگەن ەدى.
كاسىپقوي رينگتە دە ەسكيۆا ءوزىن جاقسى قىرىنان كورسەتە ءبىلدى. ول توعىز جىل ۋاقىت ارالىعىندا قاتارىنان 30 جەكپە-جەكتە جەڭىسكە جەتتى. ال ۆۋپەرتالدا وتكەن كەزدەسۋدە گۋالتەريدەن ۇپاي سانىمەن ۇتىلدى. الايدا برازيليالىق بوكسشى ءوزىنىڭ جەڭىلگەنىن مويىندامادى. «مەن چەمپيوندىق بەلبەۋ ءۇشىن نەمىس جەرىندە جۇدىرىقتاسۋعا ءوز كەلىسىمىمدى بەردىم. بۇل – مەنىڭ قاتەلىگىم! بارلىق تورەشىلەر گەرمانيادان بولدى. ولار جەڭىستى ءوز جەرلەستەرىنە اپەرۋدىڭ بارلىق امالىن ىستەدى. باسەكە بارىسىندا قارسىلاسىم ەكى رەت بەلدەن تومەن ۇردى. بىراق قازى جۇمعان اۋزىن اشپادى. كوك جەلكەدەن دە اۋىر سوققىلار الدىم. بۇل جايت تا ەسكەرۋسىز قالدى. ءبىر سوزبەن ايتساق, ارامزا تورەشىلەر مەنى التىن بەلبەۋدەن ايىردى», دەپ اشىنا سويلەدى.
ءبىر ايتا كەتەرلىگى, ۆينچەنتسو گۋالتەري بارلىق جەكپە-جەگىن ءوزىنىڭ وتانىندا وتكىزدى. تەحنيكالىق تۇرعىدان ول مىقتى بولعانىمەن, «پانچەر» دەپ ايتا المايمىز. ويتكەنى 30 جاستاعى نەمىس بوكسشىسى 21 جەڭىسىنىڭ تەك جەتەۋىندە عانا قارسىلاستارىن نوكاۋتپەن ۇتتى. وعان قاراعاندا جانىبەك ءالىمحان ۇلىنىڭ كورسەتكىشى الدەقايدا جاقسى. قازاق جىگىتى 14 رەت رينگكە كوتەرىلىپ, بارلىعىندا جەڭىسكە جەتتى. توعىز قارسىلاسىن كەسكەن تەرەكتەي سۇلاتىپ سالدى. 30 جاستاعى جەتىسۋ وبلىسىنىڭ تۋماسى ءوزىنىڭ كەيىنگى باسەكەسىن 13 مامىردا ستيۆەن باتلەرگە قارسى وتكىزىپ, ونى ەكىنشى راۋندتا ۇرىپ جىقتى. روزەنبەرگتەگى بوكس كەشىندە ەكى بىردەي بەلدى نۇسقانىڭ چەمپيوندىق بەلبەۋى ساراپقا سالىنادى.
جانىبەك الداعى جەكپە-جەكتە جەڭىسكە جەتەدى دەپ ۇمىتتەنەمىز. قانداسىمىز ءوزىنىڭ ينستاگرام پاراقشاسىندا «تاريحتىڭ ەكىنشى بەتىن جازۋدى باستادىق! چەمپيون بولۋ ءبىر باسقا, تاريحي جەكپە-جەكتەر وتكىزىپ, ءىز قالدىرۋ ءبىر باسقا!» دەگەن جازبا قالدىردى.