يوردانيانىڭ استاناسى امماندا ءوتىپ جاتقان گرەك-ريم كۇرەسىنەن جاستار اراسىنداعى الەم چەمپيوناتىندا (U-20) قازاقستان قۇراماسىنىڭ قورجىنىنا ەكى جۇلدە ءتۇستى.
اسىرەسە, ءبىز يسحار قۇرباەۆتىڭ اسقان شەبەرلىگىنە ءتانتى بولدىق. پارسى شىعاناعىندا 55 كگ سالماق دارەجەسىندە كۇش سىناسقان جەرلەسىمىز باستاپقى باسەكەلەرىندە تۇركيالىق ەمرە مۋتلۋن مەن تۇرىكمەنستاندىق ابدۋالي راحيمباەۆتىڭ اياعىن كوكتەن كەلتىردى. جارتىلاي فينالدا قىرعىزستاندىق نۋريستون سۋيوركۋلوۆتى سان سوقتىرسا, اقتىق سىندا ازەربايجاندىق فاريد ساديحليدەن باسىم ءتۇستى. ءسويتىپ, يسحار قۇرباەۆ الەم چەمپيونى اتاندى. وعان دەيىن ءدال وسىنداي اتاققا 2000 مەن 2001 جىلدارى اسەت يمانباەۆ, 2003 جىلى نۇرباقىت تەڭىزباەۆ, 2006 جىلى ارتۋر ۇمبەتقاليەۆ جانە 2017 جىلى تەمىرلان شادۋكاەۆ قول جەتكىزگەن ەدى.
يسحار قۇرباەۆ جايىندا ايتار بولساق, ول 18 جاسقا دەيىنگى بالۋاندار اراسىندا ازيادا ەكى رەت جۇلدەگەرلەر قاتارىنان كورىنىپ, 2018 جىلى جاسوسپىرىمدەردىڭ الەم بىرىنشىلىگىندە قولا مەدالدى موينىندا جارقىراتتى. قازاقستان چەمپيوناتىندا بىرنەشە رەت جەڭىس تۇعىرىنا كوتەرىلىپ, حالىقارالىق تۋرنيرلەردە سان مارتە توپ جاردى.
ي. قۇرباەۆتان بولەك, 63 كگ سالماقتا سايىسقا تۇسكەن ءدىنيسلام ساعيتجان اتالعان جارىستى قولا مەدالمەن قورىتىندىلادى.