اقتوبەدەگى ۇلىبريتانيا ۋنيۆەرسيتەتى

مەملەكەتتىك گرانت كونكۋرسىنىڭ ناتي­جەسى بويىنشا اقتوبەدە اشىلاتىن Heriot-Watt ۋنيۆەرسيتەتىنىڭ فيليالىنا 3 ءبىلىم باعدارلاماسى بويىنشا 300 ستۋدەنت وقۋعا ءتۇستى. ولاردىڭ ىشىندە 160 تۇلەك كومپيۋتەر ينجەنەرياسى ماماندىعىنا, 80 تۇلەك ەلەكتر ەنەرگەتيكاسى, 60 ۇل-قىز مۇناي ين­جەنەرياسى جانە ەنەرگومەنەدجمەنت مامان­دىعى بويىنشا ءبىلىم الاتىن بولادى. فيليالعا تۇسۋگە وڭىرلەردەن بارلى­عى 500-دەن استام تۇلەك قىزىعۋشىلىق تانىت­قان.

مەملەكەت باسشىسى قاسىم-جومارت توقاەۆ 2022 جىلى پارلامەنت ءماجىلىسى­نىڭ پلەنارلىق وتىرىسىندا 2025 جىلعا قاراي ەلىمىزدە بەدەلدى شەتەلدىك ۋنيۆەر­سي­تەتتەردىڭ كەمىندە 5 فيليالىن اشۋ قاجەت­تىگىن, سونىڭ ىشىندە تەحنيكالىق با­­عىت­تاعى جوعارى وقۋ ورنىنىڭ ەكى في­ليا­لىن ەلىمىزدىڭ باتىس وڭىرىندە اشۋ تۋرالى تاپسىرما بەرگەنى بەلگىلى. وسى­عان وراي عىلىم جانە جوعارى ءبىلىم ­مي­نيستر­لىگىنىڭ قولداۋىمەن اقتوبەدەگى ق.جۇبانوۆ اتىنداعى ۋنيۆەرسيتەتتىڭ بازاسىندا ۇلىبريتانيالىق Heriot-Watt ۋنيۆەرسيتەتىنىڭ فيليالىن اشۋ تۋرالى باستاما كوتەرىلىپ, ءتيىستى كەلىسىم جاسالدى. ەندى, مىنە, وسى فيليال بيىل ال­عاشقى ءبىلىم الۋشىلاردى قابىلداۋعا دايىن.

شوتلانديا استاناسى ەدينبۋرگتە ورنا­لاسقان Heriot-Watt زەرتتەۋ ۋنيۆەرسيتەتى ينجەنەريا جانە IT ماماندىعى بويىنشا الەمدەگى ۇزدىك جوعارى وقۋ ورىندارىنىڭ قاتارىنا كىرەدى. 200 جىلدان استام تاريحى بار ءبىلىم ورداسى الەمدەگى العاشقى مەحانيكا ينستيتۋتى رەتىندە نەگىزى قالانعان. ۋنيۆەرسيتەت دۋباي مەن مالايزيادا وقۋ كورپۋستارىن اشىپ, حالىقارالىق ىنتىماقتاستىق باعىتىنا بەت بۇردى. 2023 جىلى العاش رەت ورتالىق ازيا وڭىرىندە – اقتوبەدە جاڭا فيليال اشۋ تۋرالى كەلى­سىمگە كەلدى.

اتالعان وقۋ ورنىندا ءبىلىم الۋعا گرانت جەڭىپ العان تالاپكەرلەردىڭ اراسىندا تەك اقتوبەلىكتەر عانا ەمەس, باتىس قازاقستان, ماڭعىستاۋ, قىزىلوردا, اقمولا, اتىراۋ, جەتىسۋ وبلىستارىنىڭ, سونداي-اق استانا مەن الماتى قالالارىنىڭ تۇلەكتەرى دە بار.

– Heriot-Watt ۋنيۆەرسيتەتىنىڭ فيليالىن اقتوبەدە اشۋ تۋرالى باستامامىزعا تەك ءوڭىر تۇرعىندارى عانا ەمەس, وزگە ايماقتار مەن استانا, الماتى سەكىلدى ءىرى قالالاردىڭ مەكتەپ تۇلەكتەرى دە قىزى­عۋشىلىق تانىتتى. Heriot-Watt ۋنيۆەر­سيتەتىنىڭ فيليالىندا وقۋعا گرانت جەڭىپ العانداردىڭ 41,7 پايىزى كوپبالالى, مۇمكىندىگى شەكتەۋلى بالالاردى تاربيەلەپ وتىرعان وتباسىلاردان شىققان جانە اتا-انا قامقورلىعىنسىز قالعان بالالار سەكىلدى ءتۇرلى الەۋمەتتىك كاتەگوريالاردى قامتيدى. ال 35 پايىزى اۋىل مەكتەپتەرىن تامامداعان تۇلەكتەر. مەملەكەت قولداۋىنا مۇقتاج وتباسىلاردان شىققان بالالاردىڭ وسى مۇمكىندىككە قول جەتكىزگەنى ەرەكشە قۋانتادى, – دەدى ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ رەكتورى لاۋرا قاراباسوۆا.

ستۋدەنتتەر العاشقى جىلى دەڭگەيىنە قاراي توپقا ءبولىنىپ, وزگە پاندەرمەن قا­تار ينتەنسيۆتى تۇردە اكادەميالىق اعىل­شىن ءتىلىن مەڭگەرەدى. جۇبانوۆ ۋنيۆەر­سي­تەتىنىڭ باسشىلىعى ستۋدەنتتەرگە قوسىم­شا پسيحولوگيالىق قولداۋ مەن باعىت-باع­دار بەرەتىن مەنتورلار قىزمەتى ىسكە قوسىلا­تىنى, سونداي-اق 300 ستۋدەنتكە ارناپ جاتاقحانادان ورىن بەرىلەتىنىن مالىمدەدى.

Heriot-Watt ۋنيۆەرسيتەتىنىڭ وكىلى مۇن­داي ارىپتەستىك قازاقستان ءۇشىن عانا ەمەس, شوتلانديالىق وقۋ ورنى ءۇشىن دە پايدالى بولاتىنىنا سەنىمدى. «بۇل قادام راسىندا ترانسفورماتسياعا باستاپ, ەكى وقۋ ورنىنا دا وزگەرىستەر اكەلەتىنىنە سەنىم­دىمىن. ءبىز دۋبايدا, مالايزيادا اشىلعان كام­پۋستارىمىزدان ۇيرەنگەنىمىز كوپ بول­دى. وندا جۇرگىزىلگەن جۇمىس ءبىلىم بەرۋ جۇيە­مىزگە, عىلىمي زەرتتەۋلەرگە, ءتىپتى, ەدين­بۋرگتە ورنالاسقان كامپۋسكە اسەر ەتتى. بۇل ىنتىماقتاستىق بىزگە عانا ەمەس, جۇ­بانوۆ ۋنيۆەرسيتەتىنە دە پايدالى بو­لادى دەپ سەنەمىن. ستۋدەنتتەر ءوڭىردىڭ, ءتىپتى قازاقستاننىڭ ۇلتتىق ەكونوميكا­سى­نا وڭ ىقپال ەتەتىن مانساپ جولىنا قاجەت­تى دايىندىقتى بەرە الاتىن وقۋ باعدار­لاماسىنا كوڭىلى تولادى دەپ ويلايمىن», دەيدى Heriot-Watt University حالىقارا­لىق ىنتىماقتاستىق ءبولىمىنىڭ ديرەكتورى دجارەد فيليپپي.