قوستانايدا مىڭ قۇبىلىپ اۋەگە شاپشىعاندا ءتۇرلى-ءتۇستى بوياۋعا مالىنىپ, باتىستىڭ كلاسسيكالىق سيمفونياسى مەن قۇرمانعازى كۇيلەرىنىڭ ىرعاعىنا ىلەسىپ بيلەي جونەلەتىن مۋزىكالىق سۋبۇرقاق ىسكە قوسىلدى. ەرەكشە سۋبۇرقاق ۇلت ۇستازى احمەت بايتۇرسىن ۇلىنىڭ ەسكەرتكىشى تۇرعان ورتالىق ساياباقتا ورنالاسقان.
ادەتتە, جەرگىلىكتى تۇرعىندار مەن قالا قوناقتارى بالا-شاعاسىن ەرتىپ, كوبىنە وسى ساياباقتاعى اتتراكتسيوندارعا ءمىنىپ, بالمۇزداق كافەلەرىندە وتىرىپ, ءبىر اۋىق سەرۋەندەپ كەتىپ جاتادى. دەمالىس كۇندەرى جۇرت اياعى ءتۇن جارىمعا دەيىن تولاستامايدى. ال كۇن ۇياسىنا قونىپ, قاس قارايعان سوڭ باستالعان عاجايىپ سۋبۇرقاقتىڭ العاش رەت ىسكە قوسىلۋ ءساتىن تاماشالاۋعا كەلگەن جۇرتتىڭ قاراسى قالىڭ بولدى.
– كوپتەن كۇتكەن سۋبۇرقاقتىڭ اشىلۋ سالتاناتىنا وتباسىمىزبەن, بالالارىمىزبەن كەلىپ وتىرمىز. وتە قۋانىشتىمىز. قالامىزدا بۇرىن-سوڭدى مۇنداي اۋەندى سۋبۇرقاق بولماعان. بۇرىن مۇندا كەلىپ جاي عانا سەرۋەندەپ, بالمۇزداق جەپ, بالالاردى قىدىرتىپ كەتۋشى ەدىك, ەندى وسى فونتاننىڭ جانىنداعى ساكىگە وتىرىپ مۋزىكا تىڭداپ, مۇنداعى كەرەمەت كورىنىستى تاماشالاپ, ءبىر اۋىق دەمالىپ, ءتىپتى جۇيكەنى تىنىقتىرىپ الۋعا دا بولادى, – دەيدى قالا تۇرعىنى ساۋلە كوپجاساروۆا.
قۇرىلىستى جۇرگىزگەن مەردىگەر دە ەرەكشە نىساننىڭ اسا جوعارى تالعاممەن سالىنعانىن ايتتى. اۋەن تاڭداۋعا دا اسا ءمان بەرىلگەن.
– 20 اۋەن ىرىكتەلىپ الىندى. ۇلتتىق مۋزىكا, الەمدىك كلاسسيكا, زاماناۋي ساز كەزەكتەسىپ وتىراتىنداي 3 توپتاما جاسالدى. ودان كەيىن تاعى ءبىر جيناق جاسايمىز. جۇرتتى مەزى قىلمايتىنداي, تۇرعىنداردىڭ كوڭىلىنەن شىعاتىنداي كومپوزيتسيا قۇراستىرۋعا تىرىستىق. مۇنداي كوپاۋەندى سۋبۇرقاق باسقا جەردە جوق, – دەدى مەردىگەر كومپانيانىڭ باسشىسى ەدۋارد پەتۋشكو.
مۋزىكالىق سۋبۇرقاقتى سالۋعا جەرگىلىكتى بيۋدجەتتەن 130 ميلليون تەڭگەگە جۋىق قارجى بولىنگەن. 350 بۇرىككىشتەن, سونشالىقتى جارىق شامنان تۇراتىن تۇتاس جۇيە اۆتوماتتاندىرىلعان ورتالىقتان باسقارىلادى.
– مۇنىڭ ءبىر ىڭعايلى تۇسى – سۋبۇرقاقتىڭ ءوزىنىڭ تازارتۋ تەتىگى بار. ياعني قاجەت كەزىندە سۋدى تولتىرىپ نەمەسە كەرى اعىزىپ جىبەرىپ وتىرادى. تاسىمالداپ اۋرە بولمايسىڭ. باستى ارتىقشىلىعى – وسى. بيىل قوستانايدا 6 سۋبۇرقاق قايتا جوندەلەدى. قازىر سونىڭ تورتەۋى جۇمىس ىستەپ تۇر. قالعان ەكەۋى جاقىن كۇندەرى ىسكە قوسىلادى. كەلەر جىلى دا قالاداعى سۋبۇرقاقتاردىڭ ءبىرازىن كۇردەلى جوندەۋدەن وتكىزۋ جوسپارلانىپ وتىر, – دەيدى قالالىق تۇكش, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى دانيار ءسابيتوۆ.
تاياۋدا عانا ىسكە قوسىلعان جاياۋ جۇرگىنشىلەر سۋبۇرقاعى دا بۇگىندە قالا تۇرعىندارى ءجيى باراتىن دەمالىس ورنىنا اينالدى. ەندى قالا كۇنى مەرەكەسى قارساڭىندا ا.بايتۇرسىن ۇلى اتىنداعى وڭىرلىك ۋنيۆەرسيتەت پەن فرانتسۋز ورتالىعىنىڭ الدىنان تاعى ەكى سۋبۇرقاق ىسكە قوسىلماق.
قوستاناي