اقش-تا وتكەن Copernicus Olympiad ءبىلىم باسەكەسىنە الەمنىڭ 23 ەلىنەن 360-قا جۋىق وقۋشى قاتىستى. قازاقستان نامىسىن ارنايى ىرىكتەۋدەن وتكەن 51 وقۋشى قورعادى. ونىڭ قاتارىندا ءالي ناسىربەك تە بار.
ءالي استاناداعى «Nurorda» مەكتەبىنىڭ 4-سىنىبىندا وقيدى. ول نيۋ-يوركتە ۇيىمداستىرىلعان وليمپيادادا توپ جاردى.
– ماتەماتيكا – مەنىڭ قالاۋىم. وعان دايىندالۋ ءۇشىن IELTS باعدارلاماسىن قولدانامىن. اقش-تاعى سايىس ەكى كەزەڭنەن تۇردى. ءبىرىنشى كەزەڭ ونلاين فورماتتا ءوتتى. ونى ەڭسەرگەندەر فينالعا جولداما الدى. ءبىرىنشى كەزەڭگە 1 ساعات 30 مينۋت بەرىلدى. تاپسىرما 20 سۇراقتان تۇردى. فينالداعى تاپسىرما سانى 25 سۇراقتى قامتىدى. بولاشاقتا ماسساچۋسەتس تەحنولوگيالىق ينستيتۋتىنا تۇسكىم كەلەدى. ينجەنەرلىك باعىتتى ۇناتامىن, – دەيدى ءالي.
ءۇش كۇنگە سوزىلعان وليمپيادا كەزىندە قاتىسۋشىلار كولۋمبيا, بوستون, گارۆارد, ماسساچۋسەتس سەكىلدى وقۋ ورىندارىن ارالاپ كوردى.
– ينتەللەكتۋالدى سايىس تۋرالى ءاليدىڭ سىنىپ جەتەكشىسى ايتقان ەدى. جالپى, Copernicus Olympiad باسەكەسى بيىل ءتورتىنشى رەت وتكىزىلدى. ءداستۇرلى وليمپياداعا قازاقستان العاش رەت قاتىستى. ەرەجە بويىنشا فينالعا ءوتۋ ءۇشىن ءبىرىنشى كەزەڭدە قاتىسۋشىلاردىڭ العاشقى 40 پايىزىنىڭ قاتارىنا قوسىلۋ كەرەك بولدى. ءالي تىڭعىلىقتى دايىندالدى. سونىڭ ناتيجەسىندە جەڭىسكە جەتتى. وليمپيادادان ءبىرىنشى ورىن الىپ كەلۋ كەرەك دەگەن ماقساتتى كوزدەمەدىك. قاتىسىپ, تاجىريبە جيناسا ەكەن دەدىك. باقىتىمىزعا وراي, باعى جانىپ, ولجالى ورالدى, – دەيدى وقۋشىنىڭ اكەسى نۇربول تولەباەۆ.
ايتپاقشى, حالىقارالىق سايىستان توپ جارىپ, ءبىلىمى مەن دارىنىنىڭ ارقاسىندا جۇزدەن جۇيرىك, مىڭنان تۇلپار اتانعان وقۋشى دومبىرانىڭ قۇلاعىندا وينايدى, ءجۇزۋ مەن شاحماتتى دا جەتىك مەڭگەرگەن. سونىمەن قاتار كاراتەنىڭ كوك بەلبەۋ يەگەرى. LEGO-نىڭ روبوتتەحنيكا كۋرسىنا دا قاتىسادى.
سالتانات بايتەكەنوۆا,
ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ 4-كۋرس ستۋدەنتى