سەنات سپيكەرى ماۋلەن اشىمباەۆ ەقىۇ-نىڭ قازىرگى توراعاسى, سولتۇستىك ماكەدونيانىڭ سىرتقى ىستەر ءمينيسترى بۋيار وسمانيمەن كەزدەستى. كەزدەسۋدە تاراپتار قازاقستان پارلامەنتى سەناتى مەن ەقىۇ پارلامەنتتىك اسسامبلەياسى اراسىنداعى ىنتىماقتاستىقتى ودان ءارى دامىتۋ پەرسپەكتيۆالارىن تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
«ەقىۇ – حالىقارالىق قاۋىپسىزدىك پەن ىنتىماقتاستىقتىڭ زاماناۋي كەلبەتىن قالىپتاستىرۋعا قاتىساتىن نەگىزگى ينستيتۋتتاردىڭ ءبىرى. ءبىز ۇيىمنىڭ بارلىق ماڭىزدى باعىتى بويىنشا ءوزارا ءىس-قيمىل ورناتتىق. سەنات قىزمەتىندە پارلامەنتارالىق ىنتىماقتاستىق باسىم باعىتتاردىڭ ءبىرى بولىپ قالا بەرەدى. ۇيىمنىڭ پارلامەنتتىك اسسامبلەياسى ەقىۇ كەڭىستىگىندە قاۋىپسىزدىك پەن ىنتىماقتاستىققا قاتىستى ماڭىزدى ماسەلەلەردى شەشۋدە ايتارلىقتاي مۇمكىندىكتەرگە يە ەكەنى ءسوزسىز», دەدى ماۋلەن اشىمباەۆ.
كەزدەسۋ بارىسىندا اۋعانستان مەن ۋكراينا ماسەلەسى, وڭىردەگى احۋال, سونداي-اق, ورنىقتى دامۋ ماقساتتارى بويىنشا قولعا الىنعان جۇمىس بارىسى تالقىلاندى. وسىعان وراي پالاتا توراعاسى قازاقستان رەسپۋبليكاسىنىڭ ورنىقتى دامۋى سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيا اتقارىپ وتىرعان جۇمىستارعا توقتالىپ ءوتتى.
سونىمەن قاتار سەنات توراعاسى ەقىۇ توراعاسىنا پارلامەنتتىڭ مەملەكەت باسشىسىنىڭ باستاماسىمەن ىسكە اسىرىلىپ جاتقان رەفورمالاردى زاڭنامالىق تۇرعىدان قامتاماسىز ەتۋ باعىتىنداعى جۇمىسى تۋرالى ايتىپ بەردى.
ءوز كەزەگىندە بۋيار وسماني ەلدە جۇرگىزىلىپ جاتقان ساياسي جانە ەكونوميكالىق وزگەرىستەردى جوعارى باعالادى جانە ءارتۇرلى باعىتتا, ونىڭ ىشىندە جاڭا جوبالار بويىنشا ىنتىماقتاستىقتى نىعايتۋعا مۇددەلى ەكەنىن ءبىلدىردى.
كەزدەسۋدە تاراپتار قازاقستان مەن سولتۇستىك ماكەدونيانىڭ ەكىجاقتى بايلانىسىن ارتتىرۋعا, ونىڭ ىشىندە دەپۋتاتتاردىڭ ەكونوميكالىق, ينۆەستيتسيالىق ىنتىماقتاستىقتى نىعايتۋعا, ءتۋريزمدى دامىتۋعا جانە ءوزارا قىزىعۋشىلىق تۋدىراتىن باسقا باعىتتار بويىنشا بىرلەسىپ ارەكەت ەتۋىنە قاتىستى ماسەلەلەرگە دە نازار اۋداردى.