جەڭىل ونەركاسىپ سالاسىنداعى مامان تاپشىلىعى ماسەلەسى قاشاننان وزەكتى بولىپ تۇر. بۇل رەتتە وڭىرلىك كاسىپكەرلەر پالاتاسىندا وڭدەۋ ونەركاسىبى, ءبىلىم بەرۋ جانە دەنساۋلىق ساقتاۋ سالالىق كەڭەستەرىنىڭ بىرلەسكەن وتىرىسى بارىسىندا تەحنيكالىق كاسىپ ماماندارىن دايارلاۋ ماسەلەسى تالقىلاندى.
جيىندا «Lomuang» جشس ديرەكتورى لوبار ابدۋگاپاروۆا اياقكيىم ءوندىرىسى پروبلەماسىن كوتەردى. ونىڭ ايتۋىنشا, وتكەن جىلى رەسپۋبليكادا 41 ملن جۇپ اياقكيىم ساتىلعان. سونىڭ ىشىندە نەبارى 1,7 ملن اياقكيىمدى وتاندىق وندىرۋشىلەر جاساعان. وسى ورايدا ينجەنەرلەر, اياقكيىم تەحنولوگتارى, ورتا بۋىن قىزمەتكەرلەرى باعىتتارىنداعى مامانداردىڭ جەتكىلىكسىزدىگى ماسەلەسى العا شىعىپ وتىر.
«اياقكيىم تىگۋ تەحنولوگياسىن بىلەتىن ماماندارسىز ءوندىرىستى دامىتۋ مۇمكىن ەمەس. قازىرگى جاعدايدا وتاندىق فابريكالار مامانداردى ءوزى وقىتادى. بارلىق وندىرىستە بوس جۇمىس ورىندارى بار, ال جۇمىس قولى جەتىسپەيدى», دەيدى ل.ابدۋگاپاروۆا.
بۇل رەتتە كاسىپكەر وتاندىق اياقكيىم يندۋسترياسى جويىلۋ الدىندا تۇر دەپ سانايتىنىن جەتكىزدى. بۇگىنگى تاڭدا جوعارى بىلىكتى تەحنولوگتار ساناۋلى. ال بار كادرلاردىڭ ءبىلىمى مەن تاجىريبەسىن ۇيرەنەم دەۋشىلەر جوقتىڭ قاسى. وكىنىشكە قاراي, بۇگىندە وسى سالا ماماندارىن ماقساتتى دايارلاۋ قاراستىرىلماعان. وسى تۇستا وڭدەۋشى ونەركاسىپتىڭ سالالىق كەڭەسىنىڭ مۇشەسى ءوڭىر كوللەدجدەرىندە قاناتقاقتى كۋرس وتكىزۋدى ۇسىندى. مىسالى, «Samhat» اياقكيىم فابريكاسى ءوز قىزمەتكەرلەرىنە بىلىكتىلىكتى ارتتىرۋ كۋرستارىن وتكىزۋگە ترەنەر رەتىندە ل.ابدۋگاپاروۆانى بىرنەشە رەت شاقىرعان ەكەن.
وبلىستىق ءبىلىم باسقارماسى باسشىسىنىڭ ورىنباسارى ۆالەري گامازوۆ اياقكيىم ونىمدەرىن تىگۋ بويىنشا كوللەدجدەردە جاڭا ماماندىقتاردى ەنگىزۋ تۋرالى ۇسىنىستى قولدادى. وسى ورايدا اقمولا وبلىسىنىڭ كاسىپكەرلەر پالاتاسى وبلىستىق ءبىلىم باسقارماسىمەن بىرلەسىپ, اقمولا اياقكيىم فابريكالارىنىڭ ورتا بۋىن ماماندارىنا قاجەتتىلىگىن انىقتاۋ بويىنشا ەگجەي-تەگجەي جۇمىس جۇرگىزۋگە, وبلىستىڭ وقۋ ورىندارىندا كاسىپتىك باعدارلاۋ ءىس-شارالارىن ۇيىمداستىرۋعا نيەتتى ەكەنىن ءبىلدىردى.
«جەڭىل ونەركاسىپ سالاسىنداعى مامانداردىڭ ناقتى قاجەتتىلىگى بويىنشا بارلىق مالىمەت ءبىلىم باسقارماسىندا جيناقتالادى, بۇدان ءارى ۋاكىلەتتى ورگان سۇرانىستاعى ماماندىقتارعا مەملەكەتتىك تاپسىرىستى ءبولۋ ماسەلەسىن قارايدى. بۇل رەتتە 2020 جىلى جەڭىل ونەركاسىپ كاسىپورىندارى سالالىق قاۋىمداستىققا بىرىككەنىن ايتا كەتكەن ءجون. قاۋىمداستىقتىڭ نەگىزگى مىندەتتەرى – وڭىردەگى جەڭىل ونەركاسىپتى جانداندىرۋ, جەڭىل ونەركاسىپ كاسىپورىندارىنىڭ, اسىرەسە, ميكروبيزنەس وكىلدەرىنىڭ مۇددەسىن قورعاۋ جانە سالانىڭ تۇيتكىلدى ماسەلەلەرىن شەشۋدە كۇش بىرىكتىرۋ. ماسەلەن, وتكەن جىلى ءوڭىردىڭ جەڭىل ونەركاسىبىندە بىلعارى اياقكيىم ءوندىرىسى 1,6 ەسەگە, جۇننەن جاسالعان اياقكيىم ءوندىرىسى 5,4%-عا ۇلعايدى», دەدى وڭىرلىك پالاتانىڭ ادامي كاپيتالدى دامىتۋ ءبولىمىنىڭ باستىعى دينارا بۋلگاەۆا.