كەزەكتى وقۋ جىلىنان كەيىنگى جازعى دەمالىس وقۋشى ءۇشىن دە, ۇستاز ءۇشىن دە جاننىڭ ءدارۋى ەكەنى بەلگىلى. اسىرەسە ارقانى كەڭگە سالىپ, دوستارمەن ارقا-جارقا بولىپ اسىر سالاتىن بالالار بۇل ءساتتى اسىعا كۇتەدى. ال جازعى دەمالىس بوسقا وتپەي, ءماندى دە مازمۇندى ورىلسە, زور باقىت. بۇل ورايدا جازعى لاگەرلەردىڭ ورنى ايرىقشا.
جازعى دەمالىس بەل ورتاسىنان اسسا دا, لاگەرلەردەگى جۇمىس ءالى قىزىپ تۇر. استانانىڭ ىرگەسىندەگى «بوروۆيچوك» ساۋىقتىرۋ ورتالىعىنا بارعاندا وسىعان تاعى دا كوز جەتكىزدىك. ورتالىق الدا كەلە جاتقان ايتۋلى داتا – اباي كۇنىنە وراي ارنايى ءىس-شارا ۇيىمداستىردى. كوپپەن بىرگە ءبىز دە سونىڭ كۋاسى بولدىق. استانا قالالىق ءبىلىم باسقارماسىنىڭ باسشىسى قاسىمحان سەنعازىەۆ باستاپ بارعان دەلەگاتسيا وقۋشىلاردىڭ ورىنداۋىندا اباي اندەرى مەن ولەڭدەرىن, قاراسوزدەرىن تىڭدادى. بالالار اراسىندا ءتۇرلى ينتەللەكتۋالدى ويىنداردى تاماشالادى.
«جازعى لاگەردە بالالاردىڭ دەمالۋى مەن ساۋىقتىرۋىنا قانداي جاعداي جاسالىپ جاتقانىن كورۋ ءۇشىن جينالدىق. وسى ءبىر ىزگى نيەتىمىز اباي كۇنىمەن تۇسپا-تۇس كەلىپتى. سوعان وراي لاگەردە اباي كۇنىنە ارنالعان ءىس-شارالار ءوتىپ جاتىر. ءار كەزەڭنىڭ ءوز باعىتى بار. سوعان سايكەس وسى كەزەڭدى اباي كۇنىنە ارنادىق. بۇعان دەيىنگى ءىس-شارالار استانا كۇنى مەن بالالاردىڭ قۇقىقتارىن قورعاۋ كۇنىنە ورايلاستىرىلعان ەدى. جالپى, جازعى ماۋسىمدا لاگەرلەردە بالالاردىڭ تاربيەسىنە, ۇلتتىق قۇندىلىققا ەرەكشە كوڭىل ءبولۋ كوزدەلگەن», دەدى باسقارما باسشىسى.
قاسىمحان سەنعازىەۆتىڭ ايتۋىنشا, ۇلتتىق قۇندىلىقتارعا سايكەس تاربيە, ءبىلىم بەرۋ ۇدەرىسى تەك لاگەردە عانا جۇرگىزىلمەيدى. باسقارما مۇنى ۇزدىكسىز ۇدەرىسكە اينالدىرۋ باعىتىندا جۇمىس جۇرگىزىپ جاتىر.
«ماسەلەن, بىلتىر مۇنى بەس مەكتەپكە پيلوتتىق نەگىزدە جوسپارعا ەنگىزگەن بولاتىنبىز. 2022-2023 وقۋ جىلىندا 20 مەكتەپكە كوبەيتتىك. قازىر قالعان مەكتەپتەردىڭ وكىلدەرى دە وقۋ بىلىكتىلىگىن ارتتىرۋ كۋرستارىنان ءوتىپ جاتىر. 2025 جىلعا دەيىن بارلىق مەكتەپ ۇلتتىق قۇندىلىقتاردا نەگىزدەلگەن ءبىلىم بەرۋ باعىتى بويىنشا جۇمىس ىستەيتىن بولادى. قاناتقاقتى جوبا ۇيىمداستىرىلعان كەزدە تەك ءبىر مەكتەپتىڭ وزىنەن وڭ وزگەرىستەردى بايقادىق. ايتالىق, بۇل جوبا قالاداعى №8 مەكتەپتە ويداعىداي ىسكە اسىرىلدى. ناتيجەسىندە, مۇندا بالالاردىڭ ساباققا كەشىگۋى, ساباققا كەلمەي قالۋى سەكىلدى ءتارتىپ بۇزۋشىلىقتار تىركەلگەن جوق. وقۋ جىلى بويى ەشقانداي قۇقىق بۇزۋشىلىقتار تىركەلمەگەن. بۇل – ساباق بەرۋ ۇدەرىسىندە تاربيەگە كوبىرەك كوڭىل بولگەنىمىزدىڭ ناتيجەسى», دەدى ول.
ەلوردادا جازعى كەزەڭدە بالالاردىڭ شامامەن 98 پايىزى جازعى لاگەرمەن قامتىلعان. بۇل 1-دەن 10 سىنىپقا دەيىنگى 186 مىڭنان استام وقۋشى بولسا, ونىڭ ىشىندە از قامتىلعان جانە جەتىم بالالار شامامەن 10 مىڭدى قۇرايدى. قالانىڭ ءبىلىم بەرۋ ۇيىمدارىنىڭ بازاسىندا 155 دەمالىس لاگەرى, ونىڭ ىشىندە 85 مەكتەپ جانىنداعى لاگەر, 68 بەيىندىك لاگەر جۇمىس ىستەدى. قالا سىرتىنداعى «ارمان», «بوروۆيچوك» لاگەرىنىڭ 1, 2, 3, 4 كەزەڭىندە 1 363 بالا قامتىلعان. ونىڭ ىشىندە 500 بالا «جالپىعا بىردەي مىندەتتى وقۋمەن قامتۋ» باعدارلاماسى اياسىندا تەگىن قامتىلىپتى. بۇل لاگەرلەردە بالالاردىڭ دەمالىسى 29 تامىزعا دەيىن جالعاسادى.
لاگەردە دەمالىپ جاتقان بالالارمەن دە تىلدەسىپ كوردىك. راحمەتوللا استاناداعى اباي اتىنداعى №87 مەكتەپ-گيمنازيانىڭ 4-سىنىبىن ءبىتىرىپتى.
«ماعان مۇنداعى دەمالىس ۇنادى. اباي كۇنىنە ارنالعان ءىس-شارالارعا بەلسەنە قاتىسۋعا تىرىستىم. ويتكەنى ءوزىم اباي اتىنداعى مەكتەپتە وقيمىن. ءبىزدىڭ مەكتەپتە حاكىم اتامىزدى ناسيحاتتاۋعا ەرەكشە كوڭىل بولىنگەن. مۇنداعى ءاربىر وقۋشى ونىڭ ءومىربايانىن, شىعارمالارىن جاقسى بىلەدى. ءوز باسىم اباي اتامىزدىڭ 50-گە جۋىق ولەڭىن جاتقا بىلەمىن», دەيدى راحمەتوللا.
«بۇل لاگەرگە جىل سايىن كەلەمىن. جاڭا دوستار تاۋىپ, قىزىقتى كۇندەردىڭ كۋاسى بولامىز. مۇندا تەك ويىن ويناپ قانا قويماي, ءتۇرلى تانىمدىق ءىس-شاراعا دا قاتىسامىز», دەيدى استانالىق الەكساندر ەسىمدى وقۋشى.
سالتانات بايتەكەنوۆا,
ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ 4-كۋرس ستۋدەنتى