بيىل جوعارى جانە جوعارى وقۋ ورنىنان كەيىنگى ماماندار دايارلاۋعا اقتوبە وبلىسىندا جەرگىلىكتى بيۋدجەت ەسەبىنەن 80 گرانت ءبولىندى. 38 ورىن باكالاۆرياتقا تۇسۋشىلەرگە, 42 ورىن ماگيستراتۋرا مەن رەزيدەنتۋرادا ءبىلىمىن جالعاستىرۋشىلار ءۇشىن قاراستىرىلدى.
وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆانىڭ ايتۋىنشا, وڭىرگە قاجەتتى ماماندار دايارلاۋ ماسەلەسى جەرگىلىكتى مەملەكەتتىك ورگان قىزمەتكەرلەرى, ۇكىمەتتىك ەمەس ۇيىمدار, «اتامەكەن» وڭىرلىك ۇلتتىق كاسىپكەرلەر پالاتاسى وكىلدەرى قاتىسۋىمەن وتكەن كوميسسيا وتىرىسىندا قارالعان.
قازىرگى ۋاقىتتا وڭىردە اكتەر, رەجيسسەر, يسلامتانۋشى, تەولوگ, ساۋلەتشى, جوبالاۋشى جانە باعالاۋشى, الەۋمەتتىك قىزمەتكەر, بالىق شارۋاشىلىعى مامانى جانە گيدرولوگ جەتىسپەيدى. سونداي-اق وسى جولى ماتەماتيكا, فيزيكا, حيميا, ورىس ءتىلى مەن ادەبيەتى ءپانى, ورىس مەكتەبىندەگى باستاۋىش سىنىپ مۇعالىمى, العاشقى اسكەري دايىندىق جانە دەنە شىنىقتىرۋ ءپانى مۇعالىمىن دايارلاۋعا 38 گرانت ءبولىندى. وڭىردە جىلدان جىلعا سەزىلىپ كەلە جاتقان مەديتسينا قىزمەتكەرلەرىنىڭ تاپشىلىعىن جويۋ ماقساتىندا سپورتتىق مەديتسينا, اكۋشەر-گينەكولوگ, ونكولوگ, انەستەزيولوگ-رەانيماتولوگ, كارديولوگ, نەۆرولوگ, نەيروحيرۋرگيا, بالالار حيرۋرگياسى جانە جالپى حيرۋرگيا بويىنشا رەزيدەنتۋراعا تۇسۋشىلەرگە گرانت كوپ ءبولىنىپ وتىر. جەرگىلىكتى بيۋدجەت گرانتىنا قول جەتكىزگەندەر ەلىمىزدىڭ كەز كەلگەن جوعارى وقۋ ورنىندا وقي الادى. بۇل جەردە تالاپكەرلەر ءۇشىن جوعارى وقۋ ورىندارىنىڭ رەيتينگى وتە ماڭىزدى. جەرگىلىكتى بيۋدجەت قاراجاتى ەسەبىنەن وقۋعا ءوتىنىش بىلدىرگەن ۇمىتكەر ۇبت-دان 65-تەن جوعارى ۇپاي جيناسا – ۇلتتىق ۋنيۆەرسيتەتكە 50 ۇپاي جيناسا كەز كەلگەن وڭىرلىك ۋنيۆەرسيتەتتىڭ باكالاۆريات بولىمىنە تۇسۋگە مۇمكىندىگى بار. بىراق بۇل جەردە گرانت بولىنگەن ناقتى ماماندىققا قانشا ۇمىتكەردىڭ قۇجات تاپسىراتىنى وتە ماڭىزدى. ۇپايى كوپ تالاپكەر عانا اكىم گرانتىنا قول جەتكىزەدى.
اقتوبە وبلىسىندا جەرگىلىكتى بيۋدجەت ەسەبىنەن مەملەكەتتىك ءبىلىم بەرۋ تاپسىرىسى 2018 جىلدان قولعا الىنىپ, بەس جىل ىشىندە 440 گرانت ءبولىندى. سونىڭ ناتيجەسىندە قازىرگى كەزدە ەلىمىزدىڭ 15 جوعارى وقۋ ورنىندا 293 اقتوبەلىك ستۋدەنت وقىپ جاتسا, ماماندىق العان 124-ءى جولدامامەن جۇمىس ىستەپ جاتىر. تەك كەيىنگى جىلى عانا جەرگىلىكتى بيۋدجەت ەسەبىنەن وقىعان 28 تۇلەك اقتوبە قالاسىندا جۇمىسقا ورنالاسسا, 33 تۇلەك اۋدانداردا ەڭبەك جولىن باستادى. ولاردىڭ كوبى – مال دارىگەرى, IT-مامانى, دارىگەر, كىشى مەديتسينا قىزمەتكەرلەرى. جەرگىلىكتى بيۋدجەت ەسەبىنەن وقىتۋ جۇيەسى ءبىر جاعىنان ۇبت-دان جوعارى ناتيجەگە قول جەتكىزە الماعان تالاپكەر ءۇشىن دە جاقسى مۇمكىندىك. جەرگىلىكتى بيۋدجەت قاراجاتى ەسەبىنەن گرانتقا قۇجات قابىلداۋ باكالاۆرياتقا وقۋعا تۇسۋشىلەر ءۇشىن رەسپۋبليكالىق گرانت ناتيجەسى جاريالانعان كۇنى باستالىپ, ءۇش كۇنگە عانا سوزىلادى. ال رەزيدەنتۋرادا وقىعىسى كەلەتىندەر ءۇشىن وتىنىمدەر 23 تامىزدان باستاپ قابىلدانادى. جەرگىلىكتى كوميسسيا مۇشەلەرى گرانتقا ءوتىنىم تاپسىرۋشىلاردىڭ ۇبت-دان جيناعان ۇپايىنا, ماگيستراتۋرا مەن رەزيدەنتۋراعا تۇسۋشىلەر ءۇشىن مەملەكەتتىك ەمتيحان ناتيجەسىنە نازار اۋدارادى. ەگەر ءبىر ماماندىققا بىرنەشە ۇمىتكەر قۇجات تاپسىرسا, ۇبت مەن ەمتيحانداردان ۇپايى وزگەلەردەن جوعارى تالاپكەر عانا وتە الادى.
سودان كەيىن جەرگىلىكتى بيۋدجەت گرانتىنا قول جەتكىزگەن ستۋدەنت, جەرگىلىكتى مەملەكەتتىك ورگان جانە جوعارى وقۋ ورنى اراسىندا ۇشجاقتى كەلىسىم جاسالىپ, ونىڭ نەگىزىندە وقۋ ورنىن بىتىرگەن جاس مامان جولدامامەن بارعان جەرىندە بەس جىل تابان اۋدارماي ەڭبەك ەتەدى. ەگەر جاس مامان وقۋ ورنىن بىتىرگەن بويى ۇسىنعان جۇمىستان باس تارتسا, وندا مەملەكەتتىڭ وقۋعا جۇمساعان شىعىنى مەن العان شاكىرتاقىسىن قايتارىپ بەرۋگە ءتيىس.