جاقىندا ونىنشى مەرەيتويلىق ماۋسىمىن ءساتتى قورىتىندىلاعان «استانا وپەرا» تەاترىنىڭ الەم بويىنشا تۋرلارى ءالى دە جالعاسىپ جاتىر. وتكەن اپتادا سلوۆەنيادا وتكەن 71-ءىنشى جازعى ليۋبليانا فەستيۆالى اياسىندا مازمۇندى گاسترولدىك باعدارلاماسىن تارتۋ ەتىپ, تابىستى ونەر كورسەتىپ قايتقان تەاتردىڭ بالەت ترۋپپاسى شەتەلدىك كورەرمەندەرىن تەڭدەسسىز تالانتىمەن ءتانتى ەتتى. الەمدىك بالەت جۇلدىزى, «استانا وپەرا» بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆا قۇرعان گاسترولدىك باعدارلاما ەكى كۇننىڭ ىشىندە كريجانكە جازعى ساحناسىندا 10 مىڭعا جۋىق كورەرمەن جينادى.
ءيا, رەپەرتۋارىنداعى ۇزدىك قويىلىمدار ىرىكتەلىپ الىنعان «استانا وپەرانىڭ» جاۋھار تۋىندىلارى, شىن مانىندە, كريجانكە ساحناسىنىڭ كوركىن كىرگىزدى. گاسترول شىمىلدىعى كلاسسيكامەن ءتۇرىلدى. ادولف اداننىڭ «كورسار» بالەتىنەن ءۇزىندىنى اتاقتى ارتىستەر – پاريجدەگى ۇزاق مەرزىمدىك ونەر كورسەتۋدەن جۋىردا عانا ورالعان انەل رۇستەموۆا, سونداي-اق ولجاس تارلانوۆ پەن ترۋپپا ءسوليسى دياس قۇرمانعازى ورىندادى. جەتەكشى ءسوليسى ەركىن راحماتۋللاەۆ پەن سوليست شۇعىلا ادەپحاننىڭ ينتەرپرەتاتسياسىنداعى ريككاردو دريگونىڭ «بويتۇمار» بالەتىنەن پا-دە-دە كورەرمەندەردىڭ زور سۇيىسپەنشىلىگىنە يە بولدى. اشىق اسپان استىنداعى تەاتر ساحناسىنا قازاقستاندىق پريما ايگەرىم بەكەتاەۆا بيدەگى جۇبى ولجاس تارلانوۆپەن بىرگە شىققاندا قوشەمەتتىڭ قاتتى ەستىلگەنى سونشا, بۇكىل ليۋبليانا قول سوققانداي بولدى. ورىنداۋشىلار ماكس ريحتەردىڭ مۋزىكاسىنا رايموندو رەبەكتىڭ «قازىرگى ءسات قانشا ۋاقىتقا سوزىلادى؟» سپەكتاكلىنەن دۋەت ۇسىندى.
ال رولان پەتيدىڭ «لەدا مەن اققۋ» ءنومىرىن ورىنداعان سوليستەر اناستاسيا زاكلينسكايا مەن جانىبەك احمەديەۆتىڭ جالىندى جۇبىنا تاڭداي قاقپاعان كورەرمەن كەم دە كەم. وسىناۋ بىرەگەي ءنومىر ەۋروپادا سيرەك كورسەتىلەدى, سوندىقتان كوپشىلىك ارتىستەردىڭ ونەر كورسەتۋىن ايرىقشا سۇيىسپەنشىلىكپەن قارسى الدى. سونىمەن قاتار تەاتردىڭ جەتەكشى سوليستەرى – شۇعىلا ادەپحان, سەرىك ناقىسپەكوۆ, ارمان ورازوۆ, بالەت ءارتىسى سوفيا ءادىلحانوۆا دا جوعارى كاسىبيلىكتى پاش ەتتى.
كەشتىڭ باستى وقيعاسى رەنات گايسيننىڭ مۋزىكاسى ءمان بەرگەن «دالا ءۇنى» مەن «تۇران» ەتنو-فولكلورلىق ءانسامبلىنىڭ مۋزىكاسىنا قويىلعان حورەوگراف پاتريك دە بانانىڭ «قيلى زامان» ۇلتتىق ءنومىرىنىڭ ورىندالۋى بولدى دەسەك, تيتتەي دە ارتىق ايتقانىمىز ەمەس. ورىنداۋشىلار اناستاسيا زاكلينسكايا, عالىمجان نۇرمۇحامەت, بەكزات ورىنباەۆ پەن سۇلتانبەك عۇمار جەتكىزگەن ۇلتتىق كولوريتتى, قازاق حالقىنىڭ رۋحىن سلوۆەنيالىقتار لايىقتى باعالاپ, سوليستەرگە دۋ قول شاپالاق پەن «براۆو!» دەگەن لەبىزدەرىن جاۋدىردى.
– مەن ليۋبليانادا تۋىپ-ءوستىم ءارى ءوزىمدى ناعىز اسقاق ونەر جانكۇيەرىمىن دەپ ايتا الامىن, سوندىقتان ءار جىلداردا وتكەن ليۋبليانا فەستيۆالى جادىمدا جاقسى ساقتالدى. «استانا وپەرا» ارتىستەرىنىڭ ونەر كورسەتۋى – مەن تاماشالاعان ۇزدىك ءارى كاسىبي ونەر كورسەتۋلەردىڭ ءبىرى بولدى. كلاسسيكانى, ۇلتتىق نومىرلەر مەن زاماناۋي بالەتتى ءبىر گاسترولدىك باعدارلاماعا ۇيلەسىمدى سىيعىزۋ – اسقان شەبەرلىك. وسى ورايدا بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆاعا راحمەتىمدى ايتىپ, قازاق بالەتىنىڭ وسكەنىنە نازار اۋدارعىم كەلەدى. ترۋپپا ەرەكشە, ونىڭ ءوز مانەرى بار: ەرلەر قۇرامى دا, ايەلدەر قۇرامى دا ناعىز كاسىبي دەڭگەيدى كورسەتتى. تالانتتى ترۋپپانىڭ ونەرىن تاعى ءبىر تاماشالاسام, وتە قۋانىشتى بولار ەدىم, – دەپ اسەرىمەن ءبولىستى اگاتا رەزنيك ەسىمدى كورەرمەن.
ال گاسترولدىڭ ەكىنشى كۇنى ۇسىنىلعان چەح حورەوگرافى يرجي كيلياننىڭ موتسارت مۋزىكاسىنا قويىلعان «التى بي» بالەتى دە سلوۆەنيالىق بەكزات ونەر جانكۇيەرلەرىنىڭ سەزىم پەرنەسىنە ءدوپ ءتۇستى. تەاتر رەپەرتۋارىن بىلتىر تولىقتىرعان ايتۋلى بالەتتى كورەرمەن كريجانكە ساحناسىنان دا زور قوشەمەتپەن قارسى الدى. بۇل كۇنى سپەكتاكلدە كاريننىڭ رولىندە ادەلينا تولەپوۆا ونەر كورسەتسە, پولدىڭ پارتياسىن ولجاس تارلانوۆ ۇسىندى. كارولينانى باقىتگۇل يسپانوۆا, يوحاندى دانيار جۇماتاەۆ, ليزانى ءمولدىر شاكىموۆا, پاتريكتى سۇلتانبەك عۇمار, نەنسيدى ءمادينا قوجامجاروۆا, ءۋرتسيدى ايبار توقتار ءساتتى سومدادى.
– سپەكتاكلدى باسىنان اياعىنا دەيىن زور قىزىعۋشىلىقپەن تاماشالادىم. بۇل ۋاقىت جاعىنان قىسقا بولسا دا, مازمۇنى جاعىنان ءبىر كەرەمەت, قىزىقتى دۇنيە ەكەن. ول ماعان كۇندەلىكتى كۇيبەڭ تىرلىكتى ۇمىتتىردى. حورەوگرافياسى كۇردەلى ەكەن, سونداي-اق ول اسقان اكتەرلىك شەبەرلىكتى تالاپ ەتتى. بۇل قابىلەت ساحنادا ونەر كورسەتكەن 8 ءبيشىنىڭ ارقايسىسىندا تولىقتاي بولدى. ولار كۇلدىرەتىن جەردە كۇلدىردى, سونىمەن قاتار عالامنىڭ ماڭىزدى ماسەلەلەرى تۋرالى ويلانۋعا جەتەلەدى. وسى ءۇشىن «استانا وپەرا» ارتىستەرىنە العىسىم شەكسىز, ولار بىزگە زور اسەر سىيلادى. بۇل ارتىستەر الەمنىڭ قاي بۇرىشىندا ونەر كورسەتسە دە, ءاردايىم كورەرمەندەردىڭ سۇيىسپەنشىلىگىنە يە بولاتىنىنا سەنىمدىمىن, – دەپ قويىلىمنان ەركشە اسەرمەن شىققان لەو لەبار ەسىمدى تاعى ءبىر تالعامپاز كورەرمەن ەلوردالىق تەاتر ۇجىمىنا ىستىق لەبىزىن جەتكىزدى.
قازاقستاندىق ارتىستەردىڭ ونەرىن تاماشالاۋعا جەر-جەردەن ارنايى كەلگەن كاسىبي ماماندار, بالەت تانۋشىلار مەن بالەت سىنشىلارى دا «استانا وپەرا» تەاترىنىڭ ونەرىنە وڭ باعاسىن بەردى. سونىڭ ءبىرى – سانكت-پەتەربۋرگتەگى ماريا تەاترىنىڭ بۇرىنعى ءسوليسى اناستاسيا ماتۆيەنكو. ول ءوزىنىڭ الەۋمەتتىك جەلىدەگى پاراقشاسىندا: «وتە مىقتى ترۋپپا. ترۋپپادا تەك قازاقستاندىق بالەت ارتىستەرىنىڭ جۇمىس ىستەيتىنى جانە وندا شاقىرىلعان نەمەسە شەتەلدىك ارتىستەردىڭ بولماۋى تاڭدانىس تۋعىزادى. بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆا وسىنداي قيىن جولدى تاڭداعان ەكەن. بارەكەلدى!», دەپ جازدى.
سلوۆەنياداعى ونەر كورسەتۋ بالەت ترۋپپاسىنىڭ ونىنشى مەرەيتويلىق ماۋسىمداعى قورىتىندى تۋرى بولدى. تەاتردىڭ تابىستى تۋىندىلارى استە مۇنىمەن تامامدالماق ەمەس. الداعى ون ءبىرىنشى ماۋسىمدا دا ارتىستەردى شەت ەلدەرگە گاسترولدىك ساپارلار, ءتول تەاتر ساحناسىندا رەپەرتۋارلىق قويىلىمدار مەن پرەمەرالار كۇتەدى. جاڭا ماۋسىمنىڭ جاڭالىعى بۇدان دا جارقىن بولماق!